ريم بحنيّه: بلاك من كم يوم مويّم ؟
عبيد بجمود: مافيني شي
ريم: أفا علي أنا ؟
عبيد تنهد: كانت عندنا محاضرة توعوية، وصادف انها فالمدرسة اللي تشتغل فيها، ولا بعد طلاب صفها وهيه كانت موجودة
ريم: شي سوت يعني ؟ قالتلك شي ؟
عبيد: لا أبدًا، بس تضيقت يوم شفتها
ريم: لمتى عبود !
عبيد يقاطعها: ريموه لا تعاتبيني، هالشي أحس فيه لا إرادي، فترة زمان وبيصير الوضع طبيعي وبنسى مشاعري صوبها
ريم ابتسمت: وهذا الصح
عبيد: انتي عندج رمسة أحس، صح ؟
ريم بارتباك: بصراحة هيه
عبيد: قولي
ريم: اصبر بزقر حمدوه
عبيد يضحك: الله يالدنيا، الحين وجود حمدوه بيخليج ترمسين عـ راحتج ؟
ريم: هيه والله، البنت كبرت وصارت عاقل، ولا بعد تعطيني شور سنع مرات
عبيد: يلا انزين زقريها وهاتيلي فنيان قهوة وانتي رادة
ردت ريم وعندها اختها حمدة، ويايبة دلة القهوة بكبرها
عبيد باهتمام: عسى ماشر خبروني شفيكم ؟
ريم: ما من شر، بس يعني تقدملي واحد فالدوام
عبيد باستنكار: خير ان شاء الله، العرب يوم يخطبون اييون البيت ولا يتواصلون ويا أهل البنت مب .....
ريم تقاطعه: صبر عبود، بس كلمني فتح وياي الموضوع بشكل سطحي، وقال لو فيه مجال للموافقة بيتقدم رسمي وبياخذ رقم أبوي أو رقمك
عبيد: مجال للموافقة ؟ ليش بلاه الريال ؟
ريم: أمممم، عمره 42، مطلق وعنده ولد
عبيد: وانتي شو تشوفين ؟
ريم بحيرة: مادري، انته شو رايك ؟
عبيد: أنا رافض تمامًا، صح الريال مايعيبه موضوع الطلاق، بالنهاية نصيب من رب العالمين مب شرط يكون مطلق يعني سيئ ومعيوب، لكن العمر أشوفه فرق وايد كبير، ويمكن ماتتأقلمين وياه، ويمكن وايد أمور سلبية تستوي، فالأفضل يا ريم يتسكر هالموضوع وما تفكرين فيه حتى
أنت تقرأ
ليلة عيد
Romanceرواية ذات طابع اجتماعي، سنقرأ بين طياتها مشاعر مُختلفة، و عميقة، الكثير من لذة الحب ودفء العائلة
