أرواح مُقيدة.

البارت 39

ارواح مُقـيدة
ليان اسعد الموسوي
البارت 39

كن سيد الكتب لا عبدها، اقرأ لتعيش ولا تعش لتقرأ

..

ريماس..
تركني وطلع بدون ما يحجي شي ضلت يسرى تباوعلي
تقدمت الي وكالت

يسرى: عادي نحجي شوية؟

ضليت ساكته ، ودايرة وجهي عنها
مجاوبت اعصابي تلفانة وهاي تريد تسولف !

تقدمت الي وجابت كرسي وياها خلتة امامي كعدت علي وباوعتلي بهدوء
باوعتلها واني عاكدة حاجبي معاجبني شي ، ابتسمت وكالت

يسرى: يمكن ما عرفتج عن نفسي زين اعتذر
اسمي يسرى عمري ٢٤ سنة ، دكتورة اختصاص علم نفس ، درست الاختصاص هذا بعد معاناة وعرقلات هواي مع اهلي جانوا رافضين هاي الفكرة بالخصوص امي ، بس دخلت اله ودرست لان القسم احبة من زمان ، ماعرف ليش ماما جانت رافضة لكن حلو الاختصاص

حجت بابتسامة عريضة ، باوعتلي واردفت من جديد

- اي وانتِ عرفيني عليج شكد عمرج شنو تدرسين ؟

ضليت اباوعلها وهي تحجي ومبتسمة طبيعي ، ترددت اسولف الها
بالبداية لكن بعدين من ضلت تباوعلي بنظرات هادئة ولطيفة ، كلت بصوت عادي

ريماس: تعرفين أسمي ريماس .. عمري ٢٠ سنة من بغداد ..

حجيت واني اباوعلها وانزل بعيوني ، من حسيت الدموع تجمعت بيها
حاولت ما ابجي كدامها ، رجعت باوعتلها وسكتت

يسرى: الي الشرف اسمج حلو ، شنو تدرسين

- المفروض اني حالياً مرحلة اولى صيدلة
لكن ما .. شسمة ...

حجيت وخنكتني العبرة سكتت مسحت عيوني ماريد دموعي تنزل
لكن لكيت نفسي ابجي
، بجيت بصوت مكتوم
حطيت ايدي على وجهي حيل وبجيت ..

رغم ماريد ابجي كدام احد اكره روحي من ابجي واتحسس

يسرى: اخذي راحتج حبيبتي ، اذا تحبين تسولفين اني
موجودة راح اسمعج بكل انصات و اذا ما حابة براحتج ..

هزيت راسي بـ لا ودموعي تنزل
حسيت بالاحراج كدامها
رغم جنت محتاجة بنت تفهمني وتكون قريبة من عمري
اخذت نفس وحجيت مكملة

- لا ، كان من المفترض اني جاي ادرس ، لكن الي صار وياي منعني وخرب كلشي

سكتت ورجعت كملت من هزت راسها الي مركزة ويا كل كلمة احجيها
، حجيت واني ابجي وصوتي بالكوة يطلع مني