شوق محرم|| Forbidden Longing

part°~8:غيرة الأميرة

Song: Ayshalak by Elissa
................................................................................................................................................................................☆°~

جاسر هز راسو من فوق ركبتها و الابتسامة باقة مزينة ليه وجهو... شاف فيها و قال:

"ياك واعدتيني ما تقولي والو شتي أ فوزية ها علاش ما كنبغيش نعاود ليك شي حاجة..."

ضحكات فوزية و هبطات ليه راسو لركبتها و بدات كدوز ايديها على شعرو الكحل و قالت بحنان:

"غير عاود لي كثر عليها...مزيان تعاود باش ترتاح و انا مك يا الهبيل راه عادي..."

تنفس جاسر بعمق و خلا قلبو يهدر ماشي عقلو:

"ماشي ماباغيش نعاود و لكن ما عرفتش منين غنبدا أصلاً...أنا متيقن بلي انا و ياها ما تخلقناش البعضياتنا
و لكن فنفس الوقت كنحس شي حاجة كتشدني ليها
و كتخليني مربوط بيها...بحال.........بحال ولدتها
و نسيتها...بحالا من دمي و لحمي و انا فرطت فيها......و لكن الواقع انا و ياها عمرنا كنا شي حاجة لا اصدقاء لا عائلة لا والو
آذيتها و آذاتني هي كثر و لكن فاش كنتفكر داكشي ماكنحسش بالألم...فاش كنتفكر الهبال ديالها كنضحك بلاما نشعر كون ماعارفهاش مزيان غنقول غير ساحرة لي و لكن لا انا مسحوووور غير بوحدي..."

كانت فوزية كتسنط ليه حتى كمل كلامو كامل و سكت عاد جاوباتو بصوت هادئ بحال نسيم الليل...

"نتا ما مسحور ما والو أ وليدي راك غير طايح على راسك و خاصك توكض معايا قبل ليجي حزاق يقول انا مرزاق و يهرب ليك بيها..."

ضحك جاسر على المثل لي كتقولو ليه ماماه ديما من صغرهم و عمرو فشل يضحكو و لكن هاد المرة ماضحكوش بزاف مني فهم شنو كتعني... فكرة انه يتزوجها هو كتجيه ثقيلة على عقلو و لكن يتزوجها واحد اخر غيرو كتجيه ثقيييييلة على قلبو... هو لي عمرو عرف شي حاجة سميتها الحب غير على ايدها هي...

"ما نقدرش نتزوج بيها و هي ما كتحملنيش..."

ضرباتو فوزية فكفاه و قالت:

"قالتها لك هي؟؟ اعتارفتي ليها و رفضاتك؟؟ و لا غير كتخايل؟...."

ناض جاسر بعصبية كيرجع فشعرو لور بحال باغي يقلعو من جدورو...

"واااا الواليدة... واش ماكتفميييش راه انا وياها
ما نقدروش نكونو بجوج اشمن اعتراف و لا رفض؟ حنا امتا وصلنا لهاد الملاحق اصلا..."

فوزية غوبشات و عينيها ضياقو و هي كتشوف فيه واقف بطولتو و عرضو قدامها تحت الاضاءة القليلة لي فالبيت و قالت:

"واش عندها ماضي؟"

جاسر رد عليها بزربة و بحسم:

"بالطبع لاااا.."

فوزية تنفسات بارتياح بعدا نقصات مشكل محتمل
من المشاكل لي واقفة في طريقهم و هاد المرة سولاتو
على العائق المحتمل الثاني ..