شوق محرم|| Forbidden Longing

part12:عبد آخر للأميرة

Song of the part: blue love>>>>.................................................................................................................................................................................☆•°~

دموعها بداو كيهبطو حيت ما استاجبش مع الاعتذار ديالها و بقا صدرو كيطلع و يهبط بعنف و كينهج فوق من وجها و هي حادراه و كتبكي بصمت... خايفة بزاف منو و ماعارفاش شنو دير.. حتى لغوتات ما غيعتقها حتى حد و لمشا حتى عرف باها غيقتلها و لشافها شي حد من الدرب غتشوه خصوصا بعد الفضيحة لي كانت دارت مها فاش هربت مع راجل آخر من بعد ما باعت المحال ديال سعيد و خلاتو على الضص...

جاسر بقا كيشوف فيها ما خفاش عليه بلي كتنخصص ليه تما واخا كان ضلام بزاف... بعد منها و تكا على الكوسان ديالو بتعب... هو فيه السخانة ديال بصح و ماكانش كيكدب عليها... تنفسات هي أخيراً فاش بعد منها... أنفاسو السخان و الدفء ديال الجسد ديالو لي كان قريب منها باقي مدفيها... ملمس نيفو على ودنيها
و ايديه الحرشات على ايديها... كاع الأثار ديالو الحسية باقة كتحس بيها حية على جلدها..

تقادت فبركتها.. و شابكت ايديها بتوتر... زعما يكون عفا عليها.. زعما يكون غير بغا يخلعها.. يمكن بغا يبين ليها بلي ما نساش داكشي لي دارت فيه.. بقات شحال كتسناه ينطق بشي حاجة و لا على الاقل يحل ليها الباب و يخليها تمشي بحالاتها.. و لكن هو سقل.. غير انفاسو المعذبة هي لي كانت كتوصلها.. بحال ضاراه شي حاجة... زعما يكون مريض بصح؟؟...

تماطت بايديها لجبهتو.. حيت ولا كيبان ليها شوية وسط الضلام.. حسات بالسخونية لي ماشي عادية فجبهتو.. هبطات بايديها الحناكو بجوج.. حسات بالحرارة لي فيهم و الوخز من الحية الخفيفة ديالو... رعشة أخرى غريبة سرات فذاتها كاملة.. جمعات ايديها عندها بسرعة.. جاسر مريييييض بصح.. ما كيكدبش.. شنو دير دبا ما بغاش يشرب الدوا... ياكما يكون بحالها كيقضي فيه غير القويلبات..

لا لا ما يمكنش اويلي... خاصها تفيقو.. ايلا ما فيقاتوش و شرب دوا و مشا بحالو غتبقا هنا محبوسة حتى الصباح و غيفيقو عباد الله و الفضيحة غتولي فضيحة السنة ديال بصح...

"جاسر.. جاسر فيييق... جاسر....... جاسر نوض شرب دواك..."

ماجاوبهاش و هي زاذت تخلعات عليه كتر... خدات شي قراعي ديال الما من التحت و كلينيكس و بدات كتسردو و كتحطو على جبهتو و حناكو.. واخا هكاك ما فاقش.. حيدات ديك روينة ديال كلينيكس من وجهو و ايديها بداو كيترعدو.. من بعد غسلات ليه وجهو و حلات ليه كمام القاميجة ديالو و لكن بقات الفيست دايرة ليها العرقلة..

قربات كتر محنية عليه و كتحيد ليه فالفيست بشوية.. ياربي مايفيقش دبا.. ياربي حتى تكمل عاد يفيق.. بقات مدابزة مع الفيستة لي لاصقة عليه الله يستر.. بقا ليها شوية تفركع هي و القاميجة بقوة العضلات لي عندو.. حيدات الفيست بأعجوبة حتى ولات كتنهج.. بقات ليها القاميجة.. كانو محلولين منها واحد جوج صدفات أصلاً... مدات ايديها.. كتشوف فيه مغمض عينيه.. مية فالمية ما كاينش هنا.. السيد غيب و مشا.. خدات نفس عميق كتحاول تزعم راسها.. غير غادي داويه أ صفاء.. غير غادي داويه.. بدات كتحل صدفة بصدفة.. و كل صدفة كتحلها قلبها كيتجاوز جوج حتى لتلاتة ديال الخفقات.. و بانت ليها العضلات ديال صدرو من بعد ديال كرشو.. كيتنافسو شكون فيهم لي غادي تأثر فيها كتر..