شوق محرم|| Forbidden Longing

part10:أسد عاشق

Song of the part: ma9ditch nfotk
............................................................................☆•°~

حلات مروى الباب على جاسر... و مع شافها تصدم...ما كانش متوقع تحل عليه هي اولا.. او ثانيا....الكرسي...علاش؟؟ امتا؟؟ او كيفاش؟؟ خلاها برجليها قبل ما يتحول هو مو و خوتاتو...بقا واقف ايديه فجيوب سروالو...و عينيه كيشوفو فيها بلا تعبير...

هدرات مروى هي لولة...ايديها على كرسيها و عينيها فعينيه المصدومين:

"السلام انا مروى خت صفاء..."

بقا ساكت لثواني غير كشوف فيعينيها و ملامحو تجمدو كتر و كتر عاد قال بشرود و عقلو غايب:

"أنا جاسر القاضي..لي كنت كاري عندكم عقلتي علي؟..."

ابتاسمت ليه مروى بدفء و قالت مادة ايديها ليه:

"عرفتك من لول وخا تبدلتي بزاف..."

مد ايديه ليها...تسالمو و قال بسخرية:

"ختك ما عقلاتش علي فاش شافتني..."

ضحكات مروى و بعدات الكصيصة ديالها على عينيها عاد قالت:

"صفاء ديما هكاك كتنسا أي واحد ماشافتوش مدة طويلة و نتا ما شفناكش عشر سنين كاملة...و كيف قلت تبدلتي ديال بصح..."

اختفات الابتسامة من وجه جاسر و سولها السؤال لي ماقدرش يتجاهلو:

"شنو وقع ليك؟..."

تعابيرها البشوشة تبدلو و لكن ما تخلاتش على ابتسامتها الزوينة و قالت:

"كسيدة....ضرباتني طوموبيل و تشللت من رجلي كيف كتشوف..."

الرؤية ضلامت فعينيه..البنت لي كانت كتجري و تلعب فدربهم و ضحكها كيتسمع من بعيد... البنت لي كان كيعاملها مزيان بحال خوتاتو و بحال صفاء...ما بقاتش قادرة تمشي مرة اخرى...قال بصوت ميت كيحاول ما امكن ما يجرحهاش:

"سمحي لي بزاف ما كنتش عارف و صفاء ما شرحاتش لي الحالة ديالك...قاتلي غير مريضة و صافي..."

ابتاسمت ليه مروى بحزن و جاوباتو:

"ما كين لاش أصلا حيت الحمد لله وليت حسن مؤخراً دازت سنوات على الشلل ديالي او ولفتو..دبا قادرة نتعايش معاه...غير صفاء لي كتخاف علي بزاف...و لكن دبا حتى هي مرضات و فيها السخانة داكشي علاش وليت انا لي مقابلها ههه..."

كدبات و هي كتشوف فعينيه... الجملة لخرة خرجات تقيلة... ما كتعرفش تكدب و لكن دارت لي فجهدها باش تعاون ختها... صفاء خاصها تكمل هاد السطاج
و ماتلقاش حسن من جاسر كمدير ليها... ياربي يتيق ياربي ما يشكش... كدبة باينة هادي..

جاسر حرك راسو كيفكر فحاجة وحدة... علاش ما قالتهاش ليه... هادشي كيجيب الشك... و لكن مروى كانت صفرة شوية باينة يله ناضت من المرض... و احتمالية ان الواحد يتعادا بالرواح و السخانة واردة بزاف... و لكن علااااااش خبات عليه انها مريضة...