شوق محرم|| Forbidden Longing

part25: اصابها بسحره...سحر عيناه و لسانه

..............................................................................................................................................................................☆•°~

دموعها نزلو و عضات شفايفها.. ما مصدقاش داكشي لي كتسمع ودنيها.. كلشي طرا بالزربة.. ديما كتسمع بكلشي جا على غفلة و لكن اول مرة تعيشها..

الامير ديالها كيطلب منها الزواج و كيقول عليها أميرة ديالو من الفوق... ما يمكنش يكون هادشي حقيقي.. غادي تكون غير كتحلم بحال ديما...

هادشي ما كيوقعش حتى فاحلام العصر...

جاسر مسح ليها دموعها لي نزلو قبل ما تقدر تحبسهم.. كتشوف فيه مصدومة و شفايفها مفرقين من شدة الصدمة.. غمضات عينيها و خدات نفس عميق.. جاسر كان كيراقبها و كيحاول يقراها و لكن ما قدرش.. ما قدرش يحدد واش هي فرحازة و لا العكس.. ما قدرش يعرف واش غترفضو و لا غادي تقبل.. التوتر ديالو زاذ و ايديه بجوج باقين محاصرين حناكها بحال خايفها تهرب من بين ايديه..

صفاء كانت محتاجة وقت باش تستوعب.. كانت محتاجة تعرف بلي هادشي حقيقة ماشي حلم بحال ديما.. جاسر هاد المرة صدمها و لسانها تقطع فديك اللحظة ما عرفاتش شنو تقول ..

جاسر بعد ايديه على وجها و خداها فالحضن ديالو كيديفيها بين ايديه.. كان خايف بزاف انها ترفضو.. كان خايف بزاف تهرب منو بلاما تعطيه شي جواب محدد.. داكشي علاش عنقها.. و كانت احسن حاجة يديرها فديك اللحظة بالضبط.. حيت صفاء كانت محتاجة ليه بزاف.. محتاجة الحضن ديالو باش يخليها تستوعب انها فالواقع ماشي فالاوهام.. ان جاسر لي قدامها حقيقية ماشي النسخة لي كتزورها فاحلامها و كتخربقها كل ليلة..

و لكن علاش هي؟؟.. علاش هي من دون كاع البنات؟؟.. ما كانتش اجمل بنت فالشركة ديالو.. كاين ما حسن منها و ما زين منها.. ما كنتش اجمل بنت فدربهم كينين بنات كيحمقو بالزين ما توصلش حتى لضفرهم صغير.. ما كنتش اجمل بنت فالمغرب و لا فالعالم.. عندها حقها فالزين و لكن ماشي الأجمل.. عيوبها كانو فايتين ميزاتها و هادشي هي عارفاه مزيان.. اه هي كتشوف راسها أميرة و لكن أميرة لي ما كاملاش و الكمال لله وحدو... و لكن جاسر ولا في منزلة عالية بزاف عليها.. منزلة لي تخليه يختار ليه الأفضل سوى بغاها الحلال سوى للحرام... فجميع الاحوال ماشي هي أفضل اختيار لراجل بحالو...

يمكن ما كنتش اجمل بنت فالعالم و البيئة ديالها و لا ديالو و لكن كانت أجمل بنت فعينيه هو.. فقلبو هي ملكة جمال لي حتى بنت اخرى ما تقدر تشعلو كيفما كتشعلو هي.. الانجذاب لي كيحس بيه من جيهتها ما يقدرش يحس بيه مع بنت اخرى من غيرها... الطريقة باش كتخلي قلبو يضرب و عقلو خدام غير معها و بعد المرات حتى فاوقات الخدمة كيفكر فيها و كتجي صورتها فبالو.. صوتها و تعابيرها و حركاتها و ريحتها و اي حاجة كتخصها... كلها تفاصيل مطبوعة بسميت صفاء.. التفاصيل لي كتحمقو..