Song: Muhtemel Aşk
........................................................................................................................................................♡•°
راكبة فطاكسي كتشوف فالطريق لي كتجري قدام عينيها بسهو... قدرات تقنع سامية باش تهدر مع جاسر يخليها تعطل شوية بسباب مشكل خاص...و دبا هي غادة عند ختها خاصها تاخذها من تما و توصلها الدار عاد ترجع الشركة... ما فخبارهاش ديك الكلمة ديال مشكل خاص تقدر تخلي جاسر يلوح كاع داكشي لي فيديه و يتبعها باش يعرف شنو هاد المشكل الخااااص...
وقف الطاكسي قدام الريسطو لي فيها مروة.. هبطات صفاء بزربة من بعد ما خلصات السيد... كتجري حيت عارفة راسها معطلة كثر من القياس...وصلات أخيراً
و دخلات الريسطو لي كلو طابع اسيوي.. ما احتاجتش بزاف ديال الوقت باش تبان ليها ختها.. لي كانت باركة مع واحد جوج...راجل و مرة شهبة... الراجل هو الدوكتور آسر و لكن المرة شكون؟؟؟...
مشات جيهتهم بخطوات سراع حتى وقفات عليهم بحال شي عسكري و بكل أدب قالت:
"السلام... أنا صفاء خت مروة"
وقف آسر بكل احترام و مد ايدو يسلم عليها و من بعد سلمات عليها رفيف لي حسات بيها مألوفة و ما غريباش عليها... مدات ايديها و هي كتقول:
"السلام صفاء...أنا رفيف..."
الإسم حتى هو ما غريبش عليها...كيفكرها فواحد الفعة مسمومة كثر منها بعينين زرقين و شعر شهب...مايمكنش...و لا يمكن غير تشابه... بقات صفاء كتشوف فيها قبل ما ترد بسهو:
"مشرفين رفيف..."
آسر لي كان كيوزع نظراتو بين صفاء.. شاف في صفاء و قال:
"تفضلي...بركي معنا شوية..."
شافت فيه صفاء و قالت باندفاع:
"لا غير سمحولي محتاجة نمشي انا و ختي و شكراً بزاف حيت بقيتي معها كان عندي شي شغل ماقدرتش نجي..."
آسر مال براسو و ابتسامتو الزوينة لي كتحمق مروة بانت مرة اخرى و هو كيقول بكل أدب و شهامة:
"لا شكر على واجب أ صفاء.. مروة ولات بحال ختي الصغيرة ماشي غير مريضة عندي..."
صفاء بتاسمت بصدق ليه...أحسن طبيب شافت فحياتها هو هاد آسر و كتمنى أن رفيف لي قدامها ماتكونش هي رفيف لي كتعرف حيت غيكون اكبر مزرف ديكساع...
"يله... حنا خاص نمشيو دبا.. آه كنت هنسا الحساب
ش..."
قبل ما تكمل قاطعها آسر بحزم:
"الغدا كان على حسابي أ صفاء أنا لي عرضت على مروة"
شاف في مروة لي كان وجها حمر و عينيها منديين بحال غتبكي فأي لحظة.. بغات تنطق صفاء مرة أخرى و لكن آسر حبسها بحركة بايديه كينهيها انها تجادل كثر فحاجة لي بالنسبة ليه محسوم امرها..
أنت تقرأ
شوق محرم|| Forbidden Longing
Romanceقرر يسلم سوارت قلبو كاملين ليها... يحطهم فايديها بابتسامة واسعة او بال هاني... قرر يتجاهل الكره لي كيحس بيه من جيهتها... من جيهة باها و الواقع المر لي داير بيهم... داير بيه هو بوحدو... هي عندها باها و مها لي فظهرها... هو عندو غير فوزية لي مريضة بالس...
