شوق محرم|| Forbidden Longing

part15:لقد توجته أميراً

Song: on another love.............................................................................................☆°•~

رجعات صفاء هازة فايديها اروى و شادة فالايد الخرى ياسين.. لقات أمين متكي على الحيط هاز كارو ديالو او تعابيرو ما كيبشروش بالخير.. الموطور نشف شوية.. يعني مدة باش حبس الغسيل.. باينة تبعها.. ما يمكنش يكون عرفو... لا جاسر تبدل بزاف صعييييب يعرفو... قربات منو حتى وقفات كتشوف فيه عاقدة حجبانها و قلبها كيقوليها بلي شافو او عرفوووو...

هز عينيه كيشوف فيها و طول فيها الشوفة عاد قال:

"خدمتي عند جاسر القاضي؟........ دوييي... جاسر هو الشيف لي بغا يهدر معاك؟؟ ياك؟......"

و لكن كيفاش عرف؟؟.... الأفكار ديالها خرجو من فمها بلاما تحس:

"باش عرفتيها...."

جمع وقفتو و قرب منها حتى وقف قدامها.. و غوت حتى تخلعات اروى و بدات كتبكي:

"سولتك جاوبينيييي... واش خدمتي عند جاسر القاضي.. عند داك الز............"

سكت و خدا نفس عميق كيشوف فنقطة بعيدة على كتفها و اروى كتبكي.. بدات صفاء كتحرك فيها و تعابيرها باقين مصدومين.. ما يمكنش كاينة إنا فالموضوع.. ما يمكنش يكون عرفو من اول شوفة.. هي لي كانت غير لاصقة فيه فصغرهم و ما عرفاتوش من لول.. عرفاتو و لكن ما تيقناتش حتى اكدات ايها سامية...

هزات راسها كتشوف فيه كيتنفس بهمجية و عينيه حمرين بالعصاب و ايديه حاطهم على الخصر ديالو كيحاول يتحكم فراسو.. قالت بصوت منخفض:

"خدمت عندو... و لكن ما كنتش عارفاه بلي هو جاسر لي كان كاري عندنا.... و لكن نتا كيفاش عرفتيه هو؟ "

شاف فيها و قال بين سنانو:

"ما كيهمش كيفاش عرفت أ صفاء.. و لكن صافي بعدي منو داك سطاج خليه عليك... انا غنقلب ليك على خدمة حسن من..."

قاطعاتو صفاء قبل ما يكمل:

"الخدامي لي كدبر ليا فيهم لا علاقة بقرايتي اولا.. تانيا هادا غير سطاج ماشي غادي نخدم معاه ديما غير تهنا... جاسر هرب علينا بزاف أ أمين ما غديش يشوف فوحدة بحالي..."

أمين شاف فيها بصدمة و نطق من بعد مدة و هو كيتأمل عينيها لي ضللهم الحزن و هي كتقول بلي ما غيشوفش فوحدة بحالها و غوت عليها بلاما يشعر:

" ما غيشوفش فوحدة فحالك لزواج... و لكن شي حاجة اخرى غادي تعجبيه.. نتي قلتي براسك هرب علينا... ولات عندو سلطة و نفوذ لمجرد ان عائلة القاضي اعتارفو بيه هو و مو و خوتاتو.. ايلا مشا حتى أذاك ما كين لي غياخذ ليك حقك منو.. غير باش تعرفي..."

دموعها هبطو و شدات ايد ياسين كتعصرها بين صباعها.. اروى كتبكي حتى هي بحالا حسات بيها.. قالت بحزن:

"عارفة.. انا عارفة هادشي لي قلتي كامل و لكن غير كون هاني انا حاضية راسي.. ماشي غير من جاسر.. من بزاف.. حتى هادوك لي كنخدم عندهم الميناج كل سبت و حد و لا حتى فاش كنت كنخدم فريسطورات و كنقرا فنفس الوقت.. انا من ديما كنت قوية و ما محتاجاش لي ياخذ لي حقي.. حيت ما كنخليش الغلط يوقع من لول.."