شوق محرم|| Forbidden Longing

part•°22: حضنُ الأمير لا يتسع سوى للأميرة

.song: born to die
..........................................................................................................................................................☆•°~

من بعد جوج دقايق بالتحديد كيف قال ليها.. كان واقف بموطورو طايماكس كحلة بحال الليل او لابس جاكيت كحلة او سروال كحل او كاسك كحل..

خرجات صفاء لابسة غير سورفيت رمادية او فوق منها جاكيت كحلة حيت عارفة بلي لما لبستهاش غتاكلها فعضامها.. سدات وراها الباب بشوية او مشات لعندو... وقفات قدامو مبتاسمة ليه.. ملامحها باهتين و عينيها مضللهم حزن عميق و لكن كتحاول تغطيعم بابتسامة مزيفة.. و لكن ما فخبارهاش بلي هو حافظ مزيان تعابيرها و يقدر غير من عينيها يعرف واش مقلقة و لا لا..

"كنتي موجد راسك من قبل باينة..."

جرها من جاكيت ديالها و سد السلسلة ديالها.. ما كتشوفش وجهو غير عينيه الزرقين و لي صافيين بحال السما.. ضحك و قال بنبرة صوتو الزوين و بمرح ولفاتو منو:

"كنت مسركل و تفكرت الأميرة ديالي و قلت خاص نضرب بيها شي دويرة او نوكلها بايدياتي حتى تشبع مزيان.."

ضرباتو فصدرو كضحك عليه.. بعدات وجها عليه و قالت بسخرية:

"مابقيتش درية صغيرة باش توكلني و انا أصلاً ما كنحملش يوكلني شي حد.. كنعيف..."

لبسها الكاسك و قال بجدية مصطنعة

"واخا الاميرة ديالي كولي راسك.. غير يله نمشيو قبل ما تسخفي ليا هنايا بجوع.. راني عارف صحتك على قد الحال .."

ضرباتو مرة اخرى فاديه و غوبشات بلطافة

" صحتي مزيانة بحال العودة ندك او ندردك..."

ضحك عليها حيت هو عارفها مريضة بفقر الدم..

"انا لي عيان غير ركبي دغيا و لا معولة نباتو هنا؟.."

ركبات وراه او شدات مزيان فالخصر ديالو حتى كمشات ليه جاكيت.. هو ما كيحملهاش فاش كتخلي مساحة بيناتهم بحالا كتحشم منو.. جاسر ما كنتش كتحشم منو بحال كيف كدير معاه هو.. كانت قريبة منو بزاف.. هادشي كيعصبو و لكن كيحاول ما يفرغش داك العصاب عليها بالأخص انه عارف شنو كتعيش و ماناقصهاش يزيذها حتى هو...

ديمارا الموطور و هي زاذت زيرات ايديها على الجاكيت ديالو.. كيعجبها فاش كيركبها معاه.. شعور زوين بزاف كيخليها تنسى كاع المشاكل و الهموم لي هازة فوق كتافها.. شعرها الكحل الناعم كيطير مع الريح وراها او الشوارع كيجريو قدام عينيها بسرعة خيالية.. فالواقع هوما لي كيجريو اما الشوارع فبلاصتهم ما كيتحركوش..

من بعد مدة و هو كيسافر بيها... وصلو لريسطو لي ديما كيمشي ليها أمين و كيديها معاه حتى هي بعد المرات... ريسطو إيطالية خارجة على لمدينة ديال واحد دري صاحبو لي حتى هو بايكر بوي...