Enemies to lovers playlist>>>>
..................................................................................................................................................................................°•☆~
في اليوم التالت من غياب صفاء في الشركة...
فاقت كالعادة بوجه كلو كدمات و لكن الانتفاخ خف بزاف على قبل... دبا بقات غير شوية ديال العلامات لي مني غتخفاف كتر غادي تقدر تمشي الخدمة عادي... واخا يبقا شوية ديال السيكاطريس غادي دير كونسيلر و فوندوتان و درقهم او مريضنا ما عندو باس ...
طيبات فطورها ليها هي و مروى... او فطرو.. سعيد ما فطرش معاهم اليوم و ما باتش فالدار.. الشي لي خلا صفاء تفيق فرحانة.. و حتى فطورها عقلات عليه.. موالف ماكيخليهمش يفطرو و لا ياكلو أي لقمة على خاطرهم ديما محرر عيشتهم.. لدرجة ولا غير الوجود ديالو معها فنفس الدار كيخنقها اما فنفس البيت و لا الصالة كيقتلها من الداخل ..
من بعد ما هدر معاها جاسر لبارح ما بقاش صونا ليها مرة اخرى... لي سمع الحماس لي كان فصوتو و الأصرار ديالو فأنه يشوفها يقول هنا نبات... ها هو نساها تماماً... مروى مسكينة غير كيتهيء ليها... البراءة ديالها و ايمانها بالحدس ديالها ديما لي مجرد وهم كتضحك بيه على راسها.. ها هو ما جاش اليوم و ما صوناش... كون نسا هدرتها الي قالت فداك النهار ما كانش غيتجاهلها و هي مريضة... يمكن هو فرحان دبا حيت كتعاني.. يمكن لشاف الحالة لي فوجها كان غيتشفى فيها.. كانت كتقوليه 'قرا مزيان الحمار ديالي باش تكبر و تخدم عندي'.. ضحكات بسخرية أليمة على راسها...
ها هي ولات هي الحمارة لي خدامة عندو... و هو الأمير لي ما غاديش يديها فيها... و لنفرض انجاذب ليها غادي تكون غير نزوة... هي ماشي من مستوى ديالو.. داكشي ديال المسلسلات واحد لاباس عليه من عائلة ثرية أباً عن جد كيتزعط فالبنت الفقيرة... قصص مبتذلة لي قدامت و حتى فالانتاجات السنمائية تهملات..
حيت الواقع مختلف.. العائلات الثرية كتكاتر مع بعضياتها و رجال ديما عينيهم فالسور العالي.. ماغاديش يخلي النجوم و يشوف فالحجر عند رجليه...
ناضت جمعات الطبلة من بعد ما سالات مروة من الماكلة.. مروى وكالة... و كتاكل بشوية واخا هكاك... ديما كتبقا هي لخرة فالطابلة أما صفاء فكتاكل بالزربة بحال كتسابق مع شي حد..
غسلات الماعن ديال الفطور و شقات.. كون غير كانت ساكنة غير هي و مروى بلا داك الشارف... كانت غتكون حياتهم زوينة و هادئة بحال هاد الحضة..
سونا ليها تيليفون و جبداتو من الطابلية الزرقة ديال الشقة.. ماعرفاتش النمرة... و من جهة اخرى حسات بالاحباط.. توقعات يكون جاسر.. جاوبت باحباط:
"أااالووو... شكون معايا..."
جاوبها الصوت الانثوي لي عرفاتو واخا دازت مدة ماسمعاتوش.. و اصلا سمعاتو غير مرة حتى قربات تنساه..
أنت تقرأ
شوق محرم|| Forbidden Longing
Roman d'amourقرر يسلم سوارت قلبو كاملين ليها... يحطهم فايديها بابتسامة واسعة او بال هاني... قرر يتجاهل الكره لي كيحس بيه من جيهتها... من جيهة باها و الواقع المر لي داير بيهم... داير بيه هو بوحدو... هي عندها باها و مها لي فظهرها... هو عندو غير فوزية لي مريضة بالس...
