أحفاد السياف (امواج قاتلة٣)

حلقة خاصة

#بسم الله الرحمن الرحيم

#حلقة خاصة من أحفاد السياف

نداء علي

💝💝💝💝💝💝💝💝💝💝💝💝💝💝

وماكان النسيان هيناً، وما كان الرجوع اختياراً، فما فارقتك راغبة ولا تخليت عنك طواعية.

................................

خير يا حنان، هنفضل قاعدين كده كتير.

حنان بتردد :

ابعدي عن هاشم، أنا سكت كتير بس الموضوع زاد عن حده.

رحاب

امممم، حاضر، أي أوامر ثانيه.

حنان بغضب : شكلك بتتريقي، اسمعي ياست انتِ، أنا مستحيل أسمح لواحدة تشاركني في جوزي، وطول ما انتِ قدام عينيه هيفضل يفكر فيكي.

رحاب بثقة :

وحتى لو بعيدة عنه، عمره ما هينساني، عارفه ليه؟!

حنان : علشان بيحبك

رحاب : لأ، لأنه ظلمني، هاشم ظلمني يا حنان وده سبب تصرفاته، وبعدين اطمني انا لا ناوية ارجعله ولا عندي استعداد ادخل في صراع وتعب قلب.

حنان : والمفروض اصدقك.

رحاب : حاجة ترجعلك، أنا أساساً ميهمنيش تصدقي أو لا، بس لو كان في عندي رغبة أو ناوية ارجع كنت رجعت من سنين وربيت بنتي مع أبوها، عمرك سمعتي عن حد هجر أرضه سنين ورجع يزرعها وقت الخريف.

حنان : ولا خريف ولا ربيع، انتِ فاكرة إني طيبة وهنخدع بالكلمتين دول.

تبدلت ملامح رحاب وعادت لقوتها، وقفت بالقرب من حنان تنظر إليها بتحذير وغضب:

بقولك ايه ياست انتِ أنا لحد النهاردة بتعامل معاكي غير الناس، انتِ متعرفنيش انا مجنونه رسمي، يمكن السبب اللي طفش جوزك مني زمان هو جناني ده فمتخلنيش اقلب عالوش التاني.

حاجة غريبة والله قولتلك لا بفكر ولا ناوية اتنيل وارجع للبيه جوزك، احلفلك على مصحف ولا امضيلك وصل امانة، وبعدين بدل ما تقوليلي روحي قوليله وحلي انت وهو عن سمايا.

حنان بخوف من تغير رحاب المفاجئ

في إيه، هو خدوهم بالصوت.

رحاب : يا ربنا،  يا حبيبتي، أنا شارية دماغي من زمان، هاشم خلاص مرحلة في حياتي وانتهت، اتفضلي بقى روحي بيتك واطمني وبعد إذنك ياريت تبعدوا عني وتنسوني، مفهوم.

غادرت حنان وقد هدأت ثورة غضبها وغيرتها وخوفها بعدما تأكدت من نوايا رحاب، وابتسمت رحاب بيأس فمهما سعت للبعد عنه تجذبها الأمواج إليه فقد كان دوما هاشم كمحيط لا آخر لأسراره تركته وهي عاشقة له ورفضت الرجوع إليه رغم عشقها له وإن اختلفت الطرق بهما وغاب عن ناظريها لا يغيب عن فؤادها، لكنها اكتفت بتلك الأيام التي جمعتهما وستبقى على تلك الذكريات فقط