أحفاد السياف (امواج قاتلة٣)

🌟الفصل السادس عشر💥

بسم الله الرحمن الرحيم
لا اله الا انت سبحانك اني كنت من الظالمين
💥القنبلة الاولي💥
البارت السادس عشر
موجة قاتلة.. نداء علي

🔸🔸🔸🔸
كان يتابع لقائها التليفزيوني باهتمام ينظر الي ملامحها باعجاب يود أن يسألها لما تغيرت فجأة لما ابتعدت دون اسباب واضحة منذ أخر لقاء بينهما تتجنبه.. يحاول الاتصال بها ولا تجيب وان أجابته يستشعر أنها تخفي عنه شيئا ما

انتبه كلياً عندما استمع الي المذيعة تذكر اسمه قائلة:

السوشيال ميديا كلها بتتكلم عن علاقتك برجل الاعمال نوح السياف.. ايه تعليقك علي الكلام ده؟

ميادة : مهندس نوح السياف شخصية محترمة وبعتبره اخويا لأني مليش اخوات
المذيعة : يعني مفيش قصة حب ومشروع ارتباط..

ابتسمت ميادة قائلة : حاليا انا مش مرتبطة بس لما يحصل هعلن بنفسي انا مبعملش حاجة غلط علشان اخبيها

كان ينظر اليها بغضب وكأنه يود قتلها..
هل قالت انها تعتبره شقيقاً لها.. هل ابتعادها عنه سببه تلك الاشاعات أم انها لا ترغب بقربه

عاتب نفسه قائلاً :
خبر ايه يانوح هتتچنن عليها اياك..؟ زيها زي غيرها..

اغمض عينيه محاولاً التركيز ليجد نفسه بعد دقائق يهاتفها ولم ينتظر منها اجابة بل أخبرها بلهجة آمرة

جابليني بعد نص ساعة هتلاجيني جدام البيت ..
ميادة بهدوء : في حاجة مهمة يا نوح؟
نوح بعصبية : لما نتجابل هجولك

ابتسمت بمكر قائلة : اوك بس بليز مش عاوزة اتأخر لاني مرهقة طول اليوم

اقتربت منه بخطوات متمهلة فلم يستطع الانتظار اقترب هو قابضاً علي يدها جاذباً اياها خلفه الي أن استقرا سويا داخل سيارته ليسألها بغضب..:

ممكن افهم متغيرة معايا ليه؟؟
ميادة : متغيرة ازاي مش فاهمة؟

اقترب منها فتراجعت للخلف ناظرة اليه بتحذير لم يجعله يتراجع بل استكمل قائلاً:
انتي بتتعمدي تبعدي عني.. والنهاردة في التلفزيون بتجولي اني زي اخوكي

ميادة بسعادة أخفتها وراء نظراتها المتعجبة

ايوة قولت انك زي اخويا.. عاوزني اقول ايه my boy friend

نظر اليها بغضب صارخاً : وانتي كان ليكي بوي فريند جبل اكده اياك؟؟

نظرت اليه بتعجب أشد قائلة :
باشمهندس نوح مش ملاحظ انك بتعلي صوتك وبتتكلم باسلوب غريب جدا.. انا مش فاهمة في ايه؟؟

نوح بتوتر : ميادة انا مقصدش ازعلك
ميادة بغضب مصطنع : انا اسمي جودي مش ميادة.. اوك..