مساء الخير
#شارع_حيفا
للكاتبه المبدعة رفل الكناني
البارت الثاني
،،،،،،،،،،،،،،،
طـشيتهن
و تلملمـن ..
ولمــيتهن و اطشرن
يوم الردتـهن ما لـفن
يوم العفـتهن چـودرن ،،
يمي و عليه .. تراشـدن !
شنهو السبب ؟؟
بس ما حچن
آجروحي حيل آســتهترن ،،،
رگصن رگص .. مثل الغجـر
هزن خصر ما يسـتحن
هاي دنيه تريد واهس وأنه ميتلي خلك
المكان اضلم هندس
صغير ومحصور حيل
لا صوت ولا نفس
اصيح والحيطان ترد اذا احد رد عليه
تعبت واعصابي تلفت
وين اني ماعرف
كل الي اعرفه البارحه بليل ندكت باب الشقه حيل واني بعز نومي والله عبالي حلمان حتى مكمت لأن اختفى الصوت وفتحت عيني لكيت ملثمين فوك راسي وامي تعيط
عوفو ابني شتردون منه
دفعتهم تقاويت وياهم
سحلوني سحل
بلا كلام حتى اصواتهم مسمعتا
امي تعيط لمت العالم
لك طيف يمه
منو ذولي
وين يردون بيك
يا ناس يا عالم ابني راح يروح مني
سكان العماره تباوع كلمن فاتح باب الشقه قليل بس محد يدخل كله تخاف واني انكز
هدوووووني منو انتو اني ممسوي شي كلولي انتو منين انتو منو
مسمعت الهم حس
غصب صعدوني بسياره اسلحتهم واحد يم خاصرتي والثاني يم راسي
جتفوني وخلو وصله بارده على خشمي
ثواني وغبت عن الوعي مكعدت غير اني بهذا المكان الاكشر
شكد مر وقت
كم يوم
مادري
روحي طلعت
حتى ويه نفسي كمت اسولف
ذوله حكومه
لو عصابه
زين اني شمسوي
لكم كواووووووو......... تعالو طلعوني
احجو وياي
اني شمسويلكم ليش جايبيني هنا
احد يحجي
احد يرد
ولكم تعبت
صوتي نبح
سفله الله لا يوفقكم
ماكو رد
جسمي نمل
اطراف رجلي سرت بيه مثل الكهرباء لأن خدرت
بطني توجعني من الجوع
واعصر بيه
إلى أن اتعب وخلي راسي بزاويه الحايط اغفى
شكد بقيت هيج مادري بس فجاه وسمعت صوت اعرفه قريب مني
طيف طيف
ابني طيف
فزيت
عمي نافع كبالي
يضحك ويتلمس بوجهي
طيوفي انت عايش
وين جنت امك حال الضيم حاله
واحنا مخلينه مكان يعتب علينا مدورناك بي
طيف احجي ليش ساكت
باوعت يمين يسار
هذا شارعنا
هاي العماير
وهذا عمي نافع ابو الاسواق
اني مدد كدام محله
وهو مثني كبالي
الشارع فارغ
يمكن فجريه
غمضت عيوني ومديت ايدي للكاع اتوجه
واحد من اكتافي طكطك
عدلت روحي وكعدت
باوعت لعمي نافع مركز بي مداصدك اني بعدني عايش
سألته
عمي اني شجابني هنا
منو ذابني بابك
جاوبني بلهفه
والله يا عمي مادري جيت افتح المحل على باب الله تدري اني افتح من وكت ولكيتك كبالي
تخبلت حسبالي ميت بس من خليت اذني يم كلبك سمعته يدك رتاحيت
حتى دكيت على سلوان
طيف متدري شصار بااامك وسلوان واهل المنطقه من ختفيت والله موتتنا قهر عليك
عمي نافع يحجي واني مصدوم
شديصيرلي
منو ذوله الاخذوني وشون رجعوني واني مادري
كومني العم ودخلني للمحل
جر كرسي وكعدني
وراح للعارضه فتحه واخذ بطل ماي فك القبق وقربه كبالي وجهي
اني بس صافن
بعدين اخذته شربت واعصر بلبطل اعصابي مشدوده تحاول تفسر الي ديصيرلي
فززني صوت سلوان
من جاني بلهفه حضني ويشم بيه
طيف انت عايش
انت رجعت
مبيك شي
طيف وين جنت والله كلوبنا فرفحت عليك
