مساء الخير
#شارع_حيفا
#البارت الرابع عشر
،،،،،،،،،،،،،،،،،،،،،،،،،،
فلاش باك
تك تك تك
صميت اذني بهذا البيت لأن ابسط شي موجود حولي يزعجني صوت الساعه عقاربها تدك براسي
اكو وجع بجسمي
خمول تعب
نغزات تمثل كرصات البرغوث
نمدت ايد على ضهري
فزيت
لوي كبالي يبتسم
قدملي كلاص عصير
لزمت اكتافي افرك بيهن بيدي ااشرت اهز براسي ماريد
شربي راح ترتاحين
وراها التردي يجرالج
باوعت الكلاص شكله يشهي
مليان مكعبات ثلج واني حلكي يابس
ايدي ترتعش اخذته منه خليته على حلكي وشربته فد جره
غصيت
دك على ضهري
اسم الله
اسم الله
استريحي استريحي
كعد كدامي بيني وبينا الطاوله
فتر بكرسيه المتحرك نطاني ضهره ورفع ايديه
كال بهدوء
لاتحجين ارتاحي تماما بعدها نحجي اني هنا مطاير مطاير لاتعبين روحج
امعائي صار بيه وجع
عصرتها بيدي عيوني فك منها التعب بروده كامت تمشي بجسمي
شويه شويه عضامي كلها سترخت
فر الكرسي لوي بعدها داس برجله ومشى روحه بي كم خطوه ليم القاصه مال المكتب فتحها وطلع منها كم شده جابهم وحطهم كدامي
اخذي ضي
اخذي ولا تتردين
لا دوخين روحج بمشاكل امج
ولا تفكرين انتي وحيده
هاي فلوس ابوج
هذا بيتج واذا تردين تجين تعيشين بي ماعندي لا اني ولا امي وخوانج اي مانع
شنو مشكلتج بهاي الحياه
امج؟
عوفيها خوما تعقدين حياتج وتعيشن طول عمرج بمشاكل ومغثه من وراها
عوفي الاول والتالي وعيشي لنفسج
كلش كلش متكدرين تسيطرين على نفسج واعصابج هاي حبوب راح تساعدج وكلما تخلصين تعالي انطيج شتردين اكثر من هيج
هاي كلشي وفرتلج
وحتى سياره راح اجيبلج تخليها جوه ايدج شتردين بعد ؟
أريد انام
هههههههههه بس
اي أريد انام هسه احس عيوني ثكلت
تعالي معاي
مشى واني وراه حاضنه الفلوس على صدري
طلعنا من المكتب الي بداخل بيت ابويه لاكتني امه خزرها وكال اله
خيرج يمااااا
رتبكت
سلامتك ابني بس جيت اكلك الغده صاير وانت طلعت
تمام
هسه اخذي ضي لغرفه واحد من ولدج خلي تنام بين منسويله غرفه وتستقر بيها بعدها تعالي للمطبخ نتغده ونسولف عندي حجي وياج
مانطقت
اخذتني لغرفه دخلنا اول مسدت الباب هجمت عليه
انتي ليش اطردج وترجعين
ليش متسمعين الكلام
كمت اضحك بهستريه ماعرف شنو السبب مع العلم هيه مكالت شي يضحك
لوي صاح يمه وينج
طلعت تخز بيه وتردد راح تندمين واذكرج
