ضميت حبك وصنته داخل رواقي في خيمة بالغلا والحب مبنية

البارت 7

رجع عبدالله وجلس جنب ريماس ولا امداه يتمعن النظر فيها الا وحسنه داخله وفي يدها الاندومي.
حسنه: ريماس ريماس بتي السفره الصحن احرقني.
فزوا عبدالله وريماس سوا بس عبدالله لمن وقف حط يده على كتف ريماس وجلسها وقام بدالها واخذ السفره وبتها.
حسنه: بسم الله وش جابك؟
عبدالله: شفت نور وانا طالع من المشب وجيت اتأكد اذا نسيت النور مفتوح ولقيت ريماس وعزمتني على الاكل.
حسنه: ما شاء الله عليك عند الاكل ما يطوفك طايف.
عبدالله: طبعًا حبيبتي! ماني اقصر عند بطني.
ضحكوا كلهم وجلسوا الثلاثه على الصحن وكلوا وسولفوا بعدها كل واحد راح لفراشه ونام.

..

وفي اليوم الثاني كالعاده جو بنات ابو عبدالله وراحوا يسوون الفطور مع ريماس وحسنه ودخل عبدالله بعدهم ودار في البيت ما لقى اجداده.
عبدالله: بنات جداني فينهم؟
ريماس: برا في المشب.
حسنه: مافيه صباح الخير؟ مافيه كيف حالكم؟
ابتسم عبدالله: صباح الخير يا وجه الخير.
حسنه بضحك: انا!!
عبدالله: لا!! اقصد ريماس طبعًا، وش الي بيخليني اتغزل فيش؟
شالت حسنه ملعقة الطبخ من طاوة الشكشوكه وراحت تلحقه والبنات تركوا شغلهم وراحوا يتفرجون عليهم وهم يتطاردون وهم فطسانين ضحك.
طلع عبدالله وراح للمشب عند جدانه وسلم عليهم وعلى روسهم وجلس معهم وشوي الا يدخل ابو عبدالله.
ابو عبدالله: السلام عليكم كيفكم ووش أخباركم؟
الجد دهمان: بخير جعلك سالم.
فز عبدالله وجا بيسلم على ابوه بس هو صد منه وتركه وراح يجلس.
الجد دهمان بحده: شلون تسفه ولدك وهو قايم لك معزه واحترام!؟
ابو عبدالله: ابه الله يجعلني فداك لا تتدخل بيني وبين ولدي.
الجد دهمان: تخسي انت وامثالك تهينون ايًا كان في مجلسي! عبدالله وانا بوك تعال وسلم على راس ابوك ويده.
جاء عبدالله وسلم على ابوه زي ما قال جده بس الصدود كان واضح على مشاري الي ماقد رضى على عبدالله من سالفة العزبة.
دخلوا البنات وفي يدينهم السفره والفطور وبتوها في النص بين العايله وجو كلهم يسلمون على مشاري الي كان جالس وعلامات البغض واضحه على وجهه، مع ذلك سلموا عليه ويوم جاء دور ريماس صد منها مثل صدوده لعبدالله، سكتت ريماس وراحت جلست في زاويه المجلس وهي خاطرها مكسور من عمها مشاري الي كان ما تدخل ريماس مجلس وهو فيه الا يهلي بها ويرحب بها ويجلسها جنبه.
لاحظ الجد دهمان ذا الشي بس تغاضا عنه وسكت الين خلص من الفطور وشالوا البنات السفره وصاروا كلهم متجمعين على القهوة.
بدا الجد دهمان يتكلم: اسمعوني كلكم.
الكل: اسلم.
الجد دهمان: دامك هنا يا مشاري وانا موجود ابغا اعلم لك الني اليوم في الفجر عزمت الجماعه لزواج عبدالله وريماس الي بسويه لهم الخميس الجاي.
ابو عبدالله بغضب: انا معاد صار لي راي عندك يابه! تبغا تزوج ولدي في الوقت الي انت تبغاه فوق ما انه اساسًا مو عاجبني زواجه ذا!
الجد دهمان: انتم كلكم من نسلي وكلمتي تمشي عليكم من اكبركم انت الين اصغركم جنان، واذا عندك راي ثاني لا تجي للعرس.
قام ابو عبدالله من المشب وطلع وركب سيارته وراح وترك البيت وراه قايم وقاعد بسبب التجهيزات ليوم عرس ريماس وعبدالله.