ضميت حبك وصنته داخل رواقي في خيمة بالغلا والحب مبنية

البارت 25

جاء الصباح وتحرك عبدالله بإنزعاج وثقل وجالس يحس كل عضله في جسمة تنبض، كان يبي يتحرك بس ماهو قادر من التعب بس يبغى يجلس مكانه.
عبدالله: لا حول ولا قوة إلا بالله اصبحنا واصبح الملك لله، ريماس؟ .. ريماس؟
لف عبدالله باستغراب جهة ريماس ولقى مكانها فاضي قام شال نفسه وطلع وبدى يدور في البيت يدورها ما حصلها لا هي ولا العيال جاء نزل تحت عند جدته واول ما نزل للدور الي تحت سمع اصوات لعب العيال وصوت ضحكات جدته معهم.
ابتسم عبدالله وراح جهة الصوت وجاء لقى جدته والعيال جالسين في العريش الي قدام الباب وحسنه جالسه معهم جاء عبدالله سلم على جدته وحب راسه وجاء سلم على حسنه وبعدها راح يلعب مع عياله ويحايلهم وشوي الا وجت ريماس من وراه شايله في يدينها الفطور وهي لابسه الجلابية الي تعودت تلبسها في بيت جدها وضافره شعرها جديلتين وحاطه الشيله على كتوفها.
ما طولوا كثير الا وبنات مشاري جايين يركضون من بيتهم علشان يلحقون الفطور.
عبدالله بضحك: شوي شوي لا تطيحون.
غلا: حبيبي شفيك! الشيف ريماس هي الي مسويه فطور، نخاف يفوتنا.
حسنه: الي يسمعكم يقول انكم عايشين في مجاعة.
جنان: والله يا عمه حسنه من يوم اعرستي وحنا عايشين في مجاعة صدق.
الجدة نورة: الا ايش قوم بوكم ما جاء يا بنات؟
غلا بتردد: ابوي عرف بالسالفه، يعني تعرفين عبدالله وريماس.
عبدالله: عساه ماحد رضي، السالفه الحين مو سالفتي انا وريماس وبس، الحين صار فيه ثلاثه ارواح بيننا.
الجده نوره: والله انك صادق يا ولدي ما عليه ما سويت الا الصح.
كمل عبدالله فطوره وقام بسرعه يتجهز علشان يروح لدوامه والبنات لموا السفره بعدهم وجلسوا يسولفون.
قامت ريماس بدون لا يحسون عليها ولحقته للغرفه وسوت كأنها داخله تدور لها شيء في الغرفه.
عبدالله: وش تدورين؟
ريماس: جوالي.
عبدالله: انفضي السرير يمكن انه في السرير.
ريماس: لا ما فيه شي!
لفت ريماس على عبدالله الي كان يلبس بدلته ومستعجل وضحكت بسخريه.
ريماس بابتسامه: لسى تسويها الى الان!
قربت ريماس من عبدالله وشالت اسمه وعدلته لانه كان مقلوب وركبت الرتبه الي على كتفه زين.
شال عبدالله عيونه عن ريماس وزفر: وش قاعدة تسوين؟
ريماس باستغراب: اعدلها لك!
عبدالله: ريماس تحسبين اني مو ملاحظ حركاتش الغبية هذي علشان ترجعين الامور زي اول؟!
ريماس: عفوًا!!
عبدالله: زي ما سمعتي يا حضرة الدكتورة.
ريماس: الظاهر عشرتك مع فجر اثرت عليك.
عبدالله بصراخ: احترمي ذكر الميت!!
ريماس: انت الي احترم نفسك بالاول بعدها تعال علمني الاحترام! معاد الا انت مدري على وش شايف نفسك يا محور الكون!
مسك عبدالله عضد ريماس وشد عليه بقوه وسحبها جهته.
عبدالله: فجر لا تجيبينها على لسانش، فجر ام بنتي نورة.
وقفت ريماس بشموخ وحطت عينها في عينه: وانا ام عيالك سمو وجسار وسالم.
عبدالله: وهذا السبب الوحيد الي مخليش باقي جالسه في ذا البيت.
ريماس: عبدالله انت جالس تتمادى ومو شوي ابدًا، هالبيت بيت جدي يا عبدالله بيت جدي، ولا لك علي كلمة دامني فيه، بعد يدك.
سحبت ريماس يدها وطلعت من عنده وسكرت الباب بقوه وراها ونزلت تحت لقتهم خلصوا من الاكل قامت شالت الاغراض وودتها للمطبخ وجلست تحاول تتمالك نفسها وتهديها وتتنفس بشكل كويس لكن فجأة وقفت لمن جتها رساله من رقم غريب.