ضميت حبك وصنته داخل رواقي في خيمة بالغلا والحب مبنية

البارت 6

لفت الجده نوره على عبدالله باستغراب: ريماس وش فيها؟
عبدالله بضحك: ما فيها الا العافيه بس حارشتها شوي.
حسنه: امانه قول لي ليش سوت كذا؟
رفع عبدالله حواجبه وابتسم: شي بيني وبينها.
غلا: مافيه بيني وبينها فيه بينا كلنا.
سكت عبدالله وتلاشت ابتسامته: ليش تصرون خلاص ما ابغا اقول.
جنان وهي تدق غلا من وراها: اقطعي السالفه بيشخصن، تعرفين انه اذا ما يبغا يقول شي ما يحب احد يلح عليه.
غلا: بسس..
قاطعتها حسنه علشان تسكتها: عبود جنان وريماس يبون السوق.
عبدالله: ليه؟ دوبي موديش يا جنان اول امس؟
جنان: المدرسه الاسبوع الجاي وانا وريماس ماقد شرينا ولا شي.
عبدالله: يووووه، ايش ذليوم؟
حسنه: اليووووم اصبر افتح جوالي، اليوم ثلاثاء.
عبدالله: الجو اليوم مغيم وبارد ودكم نصلي الظهر ونمشي منها نقضي اغراضهم ومنها مره وحده نتمشى، تخاوينا يا جده.
الجده نوره: بس بو سالم ما يدري! ابغا اعلم له اني بروح معكم.
حسنه: واااي يا حياتي، اجل خلاص بكيفش انتي ارقبي اذن زوجش اما حن ما عندنا ازواج يتحكمون فينا.
الجده نوره بضحك: اعقبي تبين تروحين بدون امش؟
حسنه: امي ما تروح الا بشور زوجها ايش تبينا نسوي.
غلا بصوت عالي: رمّوس تعالي هنا نبغاش.
ريماس وهي تصيح من الغرفه: قولي لي وانا هنا.
جنان: تعالي ما بناكلش.
حسنه بضحك: هيا حتى ونطبق حركة ابوي ونخلي عبدالله يغمض.
ريماس: بجيكم بعدين.
جنان: هيا استأذني من زوجش تخرجين سوي زي جدتي.
ريماس بصراخ: ماهو زوجي!
ضحكوا كلهم والين اوجعتهم بطونهم بعدها رجعوا يكملون سوالفهم.
غلا: والله كنّا يا عبود بننتظر جدي يروح العزبه علشان ناخذ سيارته ونروح السوق بس انت جيت.
عبدالله: على العموم لا اصلي الظهر واعود الا وانتو عند السياره.
الكل: تم
طلع عبدالله وراح المسجد وراح لدورة المياة يتوضى علشان يتسنن ويقرا قران ما بين ما يأذن.
غيث من وراه: يا هلا والله بعبيد! غريبه انك هنا قالوا انك نزلت جازان!
عبدالله: ايه نزلت بس يوم صرت هناك احتاجوني الاهل فكلمت واحد من اخوياي ورجعت.
غيث بلكاعه: ايت اهل؟
عبدالله بحده: اتوقع ماهي حلوه انك توصل لذا المستوى من اللكاعه، ارفع علومك.
مشى عبدالله من عنده وجا بيدخل المسجد.
بس لحقه غيث وكمل: ما حلت لك بنت عمك الا يوم خطبتها؟
ناظر فيه عبدالله بطرف عين وباغته على غفلة وبكسه على وجهه بقوة، وغيث بدوره طاح على ظهره بعده قام ولحق عبدالله وسحبه ورد له البكس قام جاء عبدالله ودفه بقوه على ورا ويوم طيحه جاء فوقه وكمل يبكسه بقوه وورا بعض الين جوه الرجال وتجمعوه عليهم وبعدوهم من بعض.
غيث بصراخ: والله ما اخليك يا عبيد، وربي فيك، والي رفع سبع وطبق سبع ان ارده لك بحساب عسير.
عبدالله: افلح وراك والله لالتفت لك انك ما تشوف طيب، تراني ماهبيت جهدي كله، اقسم بالله لا اهب جهدي كله انك ما تسمع الا ثلاث اسئله.
طلع غيث معصب من المسجد وركب سيارته وراح اما عبدالله فدخل للمسجد وجلس فيه الين صلى بعدها خرج وراح للسياره ينتظر البنات.
جت ريماس طلعت اول وحده مسرعه ويوم نزلت في الحوش تلفتت لبنات عمها مشاري تدورهم ما لقتهم جت بتنسحب وترجع جوا الين يجون بس عبدالله شافها.
عبدالله: ريماااس وين رايحه؟ اذا عودتي البيت معادني بشوفش الا بكره هيا اركبي الين يجون.
ريماس بوهقه: لا بس نقابي وصخ ابي اغيره.
عبدالله: هيا محد بيشوفش يا محور الكون.
جت ريماس استسلمت وراحت ركبت ورا وبعد ما عدلت جلستها ناظرت في المرايه الاماميه الي تعكس طرف وجه عبدالله.
ريماس باستغراب: انت كل ما نغمض عيننا شوي ترجع علينا موجع وجهك؟ وش صار؟ وش الي موجعه كذا؟
عبدالله وهو يحاول يلف وجهه علشان يخفي الكدمه: وشو وجع؟ مافيه شي؟
ريماس: تكذب عيوني؟!
عبدالله: قلت لش مافيه شي!
فزت ريماس وتكت في النص على المركى الي بين السايق والراكب ومسكت وجهه بسرعه ولفته جهتها.
ريماس: العب على غيري.
جلس عبدالله يناظر فيها بصدمه الين استوعبت هي بعدها شالت يدها ورجعت ورا بسرعه وفتحت جوالها وسوت نفسها تفرفر فيه والصمت سيد المكان.
حسنه وهي فاتحه الباب: عساني ما تأخرت عليكم.
عبدالله بارتباك: لا لا باقي حتى خواتي ما جو.
حسنه: شفيكم اجوائكم ماش؟ (شهقت) لايكون تضاربتوا؟
الاثنين مع بعض: لااا وين!
جو غلا وجنان ودخلو السياره وهم مستغربين من الجو الي مو طبيعي في السياره بس ما قالوا شي علشان جدتهم الي ركبت بعدهم على طول.
عبدالله: هاه وين الوجهه؟ نقضي بعدها نتمشى ولا نعكسها؟
حسنه: خلنا نقضي لرموس وجنو اول بعدها نتمشى على راحتنا وبرضو سوت ريماس كيكه زعتر يحبها قلبك ناخذها ونجلس في مكان في ذي الاجواء الزينه.
الجده نوره: عبدالله انت ما علمت جدك انك جيت؟
عبدالله: لا والله نسيت.
الجده نوره: ايه لاني يوم قلت له اني بروح مع عبدالله استغرب وقال يبيك تدق عليه.
عبدالله: خليني ادق عليه الحين حدني بعيد من ساهر.
دق عبدالله على جد وحطه سبيكر ورماه في حضنه وهو مستغرب وش يبي فيه جده!
عبدالله: لبيه يا جد.
الجد دهمان: لبّاك واحياك.
عبدالله: سألت عني نفداك؟
الجد دهمان: ايه قالوا لي انك في الديره.
عبدالله: الله الله.
الجد دهمان: ووش رجعك؟
عبدالله: والله صادفت واحد من اخوياي قد استلمت عنه ووعدني يردها ويوم قلت له اني ملكت وكذا حلف ان يستلم عني وان ارجع للديره.
الجد دهمان: دامك هنا ومعك اسبوعين شكلنا بنجهز عرسك نزوجك قبل تعود عليهم.
شال عبدالله الجوال بسرعه وحطه في اذنه وقام يتلفت بتوتر ويناظر لريماس مع المرايه: لا يابو سالم وش له الاستعجال، وبعدين دوبنا مملكين ما قد عرفنا بعض.
الجد دهمان: كنّا نروشكم في صطل واحد وربيتوا مع بعض وتقول ماقد عرفتوا بعض؟
عبدالله: حتى ولو يابو سالم..
قاطعه الجد دهمان: العلم وصلك وتعداك، عرسك الاسبوع الجاي بنسويه في حوشنا.
عبدالله: يا جدي تعوذ من ابليس!
الجد دهمان: يا ولدي انا احس انه ما بقى لي في ذا الدنيا شي، واحساس المودع ما يخيب.
عبدالله: بسم الله عليك، ما تشوف شر، طويل عمر ان شاء الله، وبعدين نتكلم في ذا الشي مو الحين.
سكر عبدالله الخط وهو مرتبك وما يدري وش يقول.
الجده نوره: جدك يا عبدالله ماهو عاجبني.
حسنه: ماهو عاجبنا كلنا، تصرفاته ذي الايام توترني.
غلا علشان تلطف الجو: اجل دامنا طالعين نتقضى ليش ما نتقضى لعرسكم.
ريماس: ورا ما تسدين حلقش.
قام عبدالله بسرعه وشغل المسجل ورفع الصوت ونزل القزايز.
عبدالله: ما ينفع مع ذا الجو الا عبادي.
فزت ريماس: الللااااه احبها ذي الاغنيه! بالله قدم شوي الين يقول «تحسبني ساليٍ مثلك وانا في هواك الله حسيبك مبتلى».
عبدالله: ابشري.
قدمها عبدالله الين البارت الي تبيه ريماس وجلس يغني معه باندماج وهو يناظر في ريماس المستمتعه مع المرايه.
وفي ذا الوقت لاحظته حسنه الي كانت تناظر بالصدفه في المرايه ونزلت راسها سوت نفسها ما شافته والابتسامه شاقه وجهها.
كملوا طريقهم اشتروا اغراض المدرسه والمراييل وراحوا يدورن لهم مكان يجلسون فيه علشان يتقهوون وياكلون حلا.
حسنه: عبود شف هناك هذيك المظله فاضيه ودك نجلس فيها؟
شهقت غلا: ايوه ايوه بالله شوف وراها مطل وفيه ضباب.
ريماس: اقسم بالله صيده مدري شلون فاضيه!
الجده نوره: وقف وقف يا عبدالله هنا لا تدخل الين عندها بيجي الطلوع عليك صعب.
ابتسم عبدالله: ابشري.
وقف عبدالله ونزلوا البنات يتسابقون للمطل علشان يصورون الضباب وجلست ريماس مع جدتها تمسكها وجاء عبدالله من الجهه الثانيه وساعدها الين وصلوها للجلسه.
عبدالله: ريماس فين رايحه؟
ريماس: بجيب الاغراض.
عبدالله: خليها انا اجيبها انتي اجلسي مع جدتي سولفي لها.
ريماس: تمام.
راح عبدالله ونزل الاغراض كلها وبت الفرشه وزين المكان.
حسنه: يوه عبود قد سويت المكان! يا حظ الي بتتزوجك، اوه نسيت زوجتك هنا.
قاموا البنات كلهم يضحكون ولحقتهم الجده نوره وريماس تناظرهم بنظرات حقد، وعبدالله من بعيد يطالع لريماس المعصبه ويبتسم.
الجده نوره: انتي متى تستوعبين انه خطيبش وبيعرس بش، البنات لما انهم انخطبوا صاروا يستحون صاروا يتغنجون على بعولتهم ( مفردها بعل= زوج ) .
ريماس: يوه يا جده والله لو تقعدون تقولون ذا الكلام لا اروح اجلس هناك لحالي.
حسنه: وشو ترانا صادقين، مسكين متزوج يدور للرومانسيه ما حصل الا حذاف بالحيود ( رمي بالحجاره ).
ريماس: خلاص!
غلا: حليله اخوي صدق منش.
قامت ريماس من عندهم وراحت جلست على حجره لحالها.
ماتوا البنات من الضحك وطلعوا جوالاتهم وجلسوا يصورونها ويطقطقون عليها.
عبدالله: تحرقون كبدها بعدها تصورونها تتريقون عليها؟
الجده نوره بضحك: قدك تحامي عنها من الحين!
جنان: انتي شفتي يا جده! هذا وهم ماقد اعرسوا.
ريماس وهي تصيح من بعيد: ايه ايه صوروا واضحكوا! والله ما اسامحكم.
قفت ريماس وقابلتهم بظهرها وجلست تناظر حولها وهي تاكل السمبوسه الي شروها من على الطريق وفجأة حست احد واقف وراها يتنفس بس الغريب ان صوت تنفسه قوي جت لفت بشويش على ورا واول ما تلاقت عينها بعينه نطت باقوى ما عندها وقامت ركضت جهة الجلسه.
ريماس بصراخ: لاااا لا تلحقنييي.
حسنه وهي منسدحه على ظهرها من الضحك: على اساس بيفهم.
ريماس: عبدالله تكفى القرد يلحقنييي ساعدنيي.
عبدالله: تعالي عندي، هيا جهتي.
ركضت ريماس بقوه وراحت جهة عبدالله الي كان ماد يدينه لها وجت مسكت يده اليمين بقوه وانخشت وراه.
عبدالله: هاتي الي في يدش.
ريماس: وش؟
عبدالله: السمبوسه.
عطته ريماس وجاء خذاها ورماها بعيد والقرد لحقها.
ريماس وهي تبكي: انا بغيت اموت وانتو تضحكون.
غلا: معليش يعني وحده لابسه عبايه ونقاب وتركض وفوقها يطاردها قرد! اقسم بالله اني بغيت اشخ في سروالي من الضحك.
جنان: اساسًا شوفي الناس الي حولنا كلهم ماتوا من الضحك.
لف عليها عبدالله وهو باقي ماسك يدها ونزل الين مستواها وهو يضحك ومد يده ومسح دموعها.
عبدالله بابتسامة: تبكين يا دمعه افاااا!
ريماس وهي مستمره تبكي: كلكم تضحكون علي.
الجده نوره وهي تضحك: اييييه يا دلوعتي!تبكين علشان البلاحطه ذوليه؟
حسنه وهي شرقانه ضحك: تهبينا بلحطيين علشان ريماس.
غلا: ايه ايه علشانها ريماس ولا لو اني الي لحقني القرد كان انفقعتي من الضحك يا جده.
عبدالله بضحك: تقارنون نفسكم بريماس! لونكم قارنتوا نفسكم فيني كان ممكن تمشي بس ريماس ما تمشي.
جنان: الله يرزقنا شوفوا كيف جدتي تتحضنها.
ريماس: خلاص يا جده ابغا اروح للبيت معاد ابغا اقعد هنا.
عبدالله: اساسًا معادني مخلنكم هنا بعد ما شفت كيف لحقش القرد، اكيد انهم يعطونها الاكل هنا علشان كذا كثيره.
حسنه: يله يله يا بنات قوموا ساعدوا امي تروح للسياره وانا وعبدالله وريماس بنشيل الفرشه.
قاموا البنات وساعدوا جدتهم وقامت شالت حسنه الاغراض الي على الفرشه ومعاد بقي الا الفرشه يلمونها.
عبدالله: انتي امسكيها من هناك وانا من هنا وخلينا ننفضها.
ريماس: عبدالله انفضها بشويش.
عبدالله: ابشري.
قام عبدالله رفعها فوق بقوه ونزلها علشان ينفضها وريماس تعثرت وجت تبي تطيح جاء عبدالله مسكها بسرعه.
عبدالله: بسم الله عليش جاش شي؟
ريماس: قد قلت لك لا تنفضها بقوه!
عبدالله: خلاص خليها روحي للسياره انا برتبها.
راحت ريماس للسياره وركبت ورتب عبدالله الفرشه ولحقها وحرك السياره ورجعوا للبيت.
وهناك استقبلهم جدهم الي نادى عبدالله وراح هو وياه لحالهم بالمشب.
غلا: شكل جدي صامل.
تنهدت ريماس بضيق ومشت من عندهم ودخلت للبيت، اما عند عبدالله الي مسكه جده من كتفه وشد عليه.
الجد دهمان: يا ولدي انا ابغا ائمنها قبل اموت مع رجال كفو.
عبدالله: بس يا جد انت عارف انها ماهيب راضيه بذا الزواج وتحتاج وقت علشان تتقبل.
الجد دهمان: بس يا ولدي انا ابغا اعلم بزواجكم لاقاربنا والي حولنا لان ملكتكم كانت خاصه ولا علمنا احد واخاف اذا مت انا عوالي يستقوون عليكم ويفكونكم.
عبدالله: يا جد انا عندها، حتى لو وقف ضد زواجنا ابوي براسه والله ما اعطيها ظهري.
الجد دهمان: اعرف انك كفو وما بتبور عندها لكن حتى ولو الحيطه واجبه، ورمّوس انا بكلمها.
تنهد عبدالله وابتسم وحب راس جده: شورك وهداية الله.
الجد دهمان: الا اقول عندي لك علم مدري شلون ابا ابدا فيه.
عبدالله باستغراب: اسلم!
الجد دهمان: بالنسبه للشقه الي فوق انت تعرف انها وسيعه وفيها اكثر من غرف صح؟
عبدالله: ايه؟
الجد دهمان: ودي لو ينام كل واحد منكم في غرفه الين تتخرج ريماس من الثانوي، اعرف انه حقك وانه مالي دخل بينكم لكن تعرف يمكن تحمل وما بتقدر تدرس ومعها ورع تبزاه.
عبدالله: معليك يا جد وانا مقدر ذا الشي مره وقد قلت لها اني ما بلمسها الين تتخرج.
الجد دهمان: الله يوفقك ويسعدك يا ولدي.
عبدالله: اللهم امين.
قام عبدالله وجاء بيطلع من المشب وشاف جده تلحف وانسدح.
عبدالله: بتنام هنا يا جد؟
الجد دهمان: ايه الجو هنا براد، احسن من البيت.
ابتسم عبدالله: تمسي على خير.
الجد دهمان: وانت من اهله.
طلع عبدالله وجاء بيروح لبيتهم بس لفت انتباهه انه الدور حقه هو وريماس فيه نور خافت جاء دخل مع الباب الي وراء والي يدخل للدور الثاني بشكل منفصل وفتح الباب ودخل وبدأ يمشي بهدوء ويقرب من الغرفه الي نورها شغال، جاء قرب وفتح الباب بخفيف ولقى ريماس لابسه سماعتها وجالسه على كرسي عند الشباك ويوم دخل عبدالله التفتت عليه.
ريماس: شفتك وانت جاي من تحت.
عبدالله: وش تسوين هنا؟
ريماس: احاول اتعود على المكان.
جاء عبدالله طلع للصاله واخذ الكرسي من على طاولة الطعام وجلس جنبها.
عبدالله: عجبتش ذي الغرفه؟
هزت ريماس راسها بمعني الايجاب.
عبدالله: اجل انا باخذ الغرفه الي جنبش.
ريماس: طيب وش بنقول لهم اذا دروا اننا ننام في غرف متفرقه؟
عبدالله: قلت لهم اني ما بقرب منش الا بعد ما تتخرجين واذا تخرجتي بننقل من هنا.
ريماس: انا يا عبدالله ابغا اشد حيلي في اخر سنه علشان اجيب نسبه حلوه تدخلني جامعه زينه توظفني ووقتها بتتطلق وانت تروح في حالك وانا اروح في حالي.
انصدم عبدالله وجلس يناظرها بارتباك: تبين تتطلقين؟
ابتسمت ريماس وناظرت له: علشان انت تعيش حياتك بعد ما تطلقني وتتزوج البنت الي تحبها وبعدين الطلاق معاده زي اول عار الحين صاروا المطلقات اكثر من البنات.
ابتسم عبدالله ابتسامه مزيفه وتنهد: تصدقين ببدأ احسب ليوم طلاقنا من الحين.
ريماس: ليه؟ بتحزن علي؟
عبدالله: لا بسوي عزيمه كبيييره بمناسبة طلاقنا وبذبح خمسة طليان وحاشي.
ريماس: وانا اذا تطلقنا بتصدق على مية مسكين علشان اشكر ربي لانه ازاح عني البلاء.
ضحك عبدالله بسخريه وقام من عندها بيخرج.
ريماس: بتروح؟
عبدالله: ايه.
ريماس: انتظر شوي عمتي نزلت تحت تجيب الاندومي تبغا تاكل معنا؟
مسك عبدالله بطنه وضحك: اي والله اني جوعان.
ضحكت ريماس وحطت يدها على الكرسي الي جنبها بمعنى ارجع اجلس هنا.

انتهى
اشوفك البارت الجاي💗💗

.