Us Two [Completed]

25 [Final]

UNI

❝ မောင်.. မစီးချင်ဘူးလို့❞

ဟန်းနီးမွန်းခရီးစဉ်တွင် နောက်ဆုံးရောက်ရှိလာသော နေရာမှာ သူတို့နှစ်ဦး၏ အချစ်ဇာတ်လမ်းလေး စခဲ့ရာ ကမ်းခြေလေးဆီတွင်ဖြစ်၏။

ပထမတစ်ခေါက် လာတုန်းက စီးခဲ့သည့် Jet Skiကို အတူစီးရန် မင်းခန့်က လက်ဆွဲကာ ခေါ်သည်ကို စံလင်းက ငြင်းနေခြင်းဖြစ်သည်။

❝ ကျွန်တော် ပါနေတာကို အစ်ကိုရယ်။ ပြုတ်မကျစေရဘူး။ အတူစီးရအောင်ဗျာ ❞

❝ ဟင့်အင်း။ ရေ မကူးတတ်ဘူးလို့ဆိုနေ ❞

❝ ဟောဗျာ။ ကျွန်တော် သေချာ ထိန်းပေးမှာပေါ့ ❞

❝ ဟင့်အင်း ဟင့်အင်း ❞

ဘယ်လိုမှ ခေါ်မရစွာ သူ့ထက် လေးနှစ်ကြီးသည့် အစ်ကိုက ပေကပ်ကပ်လုပ်နေလေ၏။ ဒီကတော့ ရေပေါ်တွင် ချစ်ရသူအား ရင်ခွင်ထဲထည့်ရင်း ပါးလေးနမ်း၊ ဂုတ်ပိုးလေးနမ်းရင်း Romanticဆန်ချင်ပါသော်လည်း တစ်ယောက်သောသူက ကလေးဆိုးလေးလုပ်နေ၏။

❝ ကိုယ့်ကို မယုံဘူးလားကွာ။ ဟင်..❞

လက်ကိုဆုပ်ကိုင်ကာ ချက်ချင်း အကြီးတစ်ယောက်နှယ် ပြောလာသူကြောင့် စံလင်းမှာ ငြိမ်နေရပြန်သည်။ မောင် ထိုသို့ ပြုမူတိုင်း စံလင်းစိတ်ထဲက ရှိန်သွားတတ်ပါ၏။ ဩဇာလွှမ်းမိုးနေသည့်မောင့်ကို သူမလွန်ဆန်နိုင်သလိုပင်။

❝ .... ❞

❝ အတူစီးရအောင်လေနော်။ ကတိပေးတယ် လုံးဝ ပြုတ်မကျစေရဘူး။ သေချာ ထိန်းထားပေးမယ်။ မောင့်ကိုယုံ..❞

❝ ဟို.. မောင့်ကို မယုံတာမဟုတ်ပါဘူး..❞

❝ အင်း။ ဒါဆို ဘာလို့တုန်း..ပြောပါဦး ❞

❝ ငယ်ငယ်က.. ရေနစ်ဖူးတယ်။ အဲ့တာကြောင့်..❞

❝ .... ❞

❝ ဒါမယ့်.. ဒါမယ့် မောင့်ကိုယုံတာမို့...❞

❝ ရပြီ။ အစ်ကို မစီးရဲရင် မစီးလည်းရတယ်။ ကျွန်တော်က အစ်ကို့ကို ပျော်စေချင်ရုံပါ။ ဒီလို ကြုံခဲ့ရမှန်းမသိခဲ့လို့။ အစ်ကိုပိုကြောက်သွားမယ်ဆို မစီးလည်းဖြစ်တယ်နော် ❞