ට්‍රීං... ට්‍රීං... ට්‍රීං
'ම්හ්'
"චූටි... චූටි පුතා නැගිටින්නෙ නැද්ද ළමයෝ ඉස්කෝලේ යන්න... කොච්චර කිව්වත් වැඩක් නෑනේ මේ ළමයට...
ලොකූ... ගිහින් මල්ලිව ඇහැරවන්න"
"මල්ලී... නැගිටිනවා තමුසෙ ඉස්කෝලේ යන්නෙ නැද්ද අද"
'ම්හුක්'
"නැගිටිනවා හලෝ පලවෙනි දවසෙම පරක්කු වෙලා යන්නද ඕන ආ..."
'ම්හුක්'
"හුකුන් හුකුන් ගාන්නෙ නැතුව නැගිටිනවා"
"අයියෝ අක්කෙ යනවකො හලෝ තමුසෙත් එක වෙලාවකට මාර වදයක් අප්පා"
"චූටි පුතා මාව ඔතනට ගෙන්න ගන්නෙ නැතුව නැගිටලා ගිහින් ලෑස්ති වෙනවා ඉස්කෝලේ යන්න"
"යෝහ් හරි හරි අප්පාහ්"
අම්මගෙ කටහඬ ඇහුනත් හරි මං ඇඳෙන් නැගිට්ටා නෙවෙයි නැගිට්ටුනා. මොකද ඊලග පාර අම්මගෙ කටහඬ නෙවෙයි කොසුමිට තමා මාව හොයාගෙන එන්නෙ.
මං ඉතින් නැගිටලා බාතෲම් එකට ගිහින් වොශ් එකක් දාගෙන අම්මා ඊයේ රෑ අයන් කරලා තිබ්බ යුනිෆෝම් එකත් ඇදගෙන පහලට ගියා. යනකොටත් අම්මයි තාත්තයි අක්කයි කෑම කනවා.
"පුතා ඔයත් ඇවිත් ඉක්මනට කන්න. මං ඔයාව ඉස්කෝලේ ගාවින් දාගෙන යන්නම්"
"අනේ තාත්තෙ මං බස් එකේ යන්නම්කො අරුන් දෙන්නත් ඉන්නවනෙ"
"හ්ම් හ්ම් එහෙනම් පරිස්සමෙන් යන්නකො මං අක්කව කැම්පස් එක ලඟින් දාගෙන යන්නම්.... ලොකූ කාලා ඉවර නම් යමුද."
" හරි තාත්තා යමු... අම්මේ මං යනවා"
"හරි ලොකූ පරිස්සමෙන් ගිහින් එන්න"
කාලා බීලා ඉවර වෙලා තාත්තයි ලොකුයි ගියා. තාත්තා මාවත් ඉස්කෝලේ ලඟින් දාගෙන යන්න අහද්දි මං එපා කිව්වෙ අරුන් දෙන්නත් එක්ක බස් එකේ යන්න ඕන හින්දා.
"අම්මේ මං යනවා..."
"චූට් පුතා පරිස්සමෙන් යන්න එහෙනම්...බස්වල යද්දී බලාගෙන යන්න, පණ්ඩිතකමට ෆුට්බෝඩ් එකේ එහෙම යනවා නෙවෙයි හොඳ ද"
