"චූටි පුතා නැගිටින්න... පරක්කු වෙලා තියෙන්නෙ ඉස්කෝලේ යන්න..."
"අනේ... තව විනාඩි පහකින් එන්- ආව්හ්හ් !! අප්පා ගහන්නෙ..."
"නැගිටින්න පුතා... මං දැන් කීයෙ ඉදන් ද ඇහරවන්නේ.."
"හරි හරි අනේ ඕකට ගහන්න ඕනද ඉතින්...ම්හ්ක් !! "
උදේ පාන්දර ඉස්කෝලේ යන්න නැගිටිනවා කියන එක තරම් එපා වෙන දෙයක් මට නම් තවත් නෑ අප්පා.
"ගිහින් මූණ හෝදන් පහලට එන්න පුතා... මං තේ හදලා තියන්නම්..."
"ඇයි තාත්තේ කෝ අම්මා නැද්ද..."
"අම්මට අද ටිකක් සනීප නෑ වගේ..."
"ආහ් ! ඇයි ඒ අම්මට මොකද..."
"අම්මට ටිකක් ඔළුව රිදෙනවා කිව්වා... ඒ නිසා මං උදේම නැගිටින්න දුන්නෙ නෑ... හරි හරි ඔයා ගිහින් වොශ් එකක් දාගෙන පහලට එන්නකෝ..."
"අනේ තාත්තේ, අද මට ඉස්කෝලේ යන්න බෑ වගේනෙ... ම්හුක්.."
"ආ... ඒ මොකද ඒ...අදත් බොරු ලෙඩක් ද.."
"එහෙම එකක් නෑ අප්පා..."
"හරි හරි එහෙනම්... ලෑස්ති වෙලා එන්නකො"
මං ඉතින් තාත්තා ගියාට පස්සේ හෙන කම්මැලි කමෙන් ගිහින් ඇඟපතත් හෝදගෙන පහලට ආවා. මං එනකොටත් තාත්තා ඉන්නවා කුස්සියට වෙලා තේ හද හද.
"තාත්තේ ! අද හොස්පිට්ල් එකට යන්නෙ නැද්ද..."
"නෑ පුතා, අද මං නිවාඩුවක් දැම්මා..අම්මටත් ටිකක් සනීප මදි වගේනෙ... අද අක්කත් නෑනෙ ගෙදර..."
"හ්ම්ම්ම්..."
"මොකො මේ තාම ලෑස්ති වෙලාවත් නෑනේ... අද ඉස්කෝලේ යන්න කල්පනාවක් නැද්ද.."
"එහෙම එකක් නෑ තාත්තේ..."
"ගිහින් ඉක්මනට ලෑස්ති වෙන්නකෝ... මං ටවුන් එකට යනවා යන ගමන් ඔයාවත් ඉස්කෝලේ ලඟින් දාගෙන යන්නම්..."
"හා..."
මං ආපහු කාමරයට ඇවිත් යුනිෆෝම් එකත් ඇදගෙන කොන්ඩෙත් හදාගෙන බෑග් එකත් අරන් කෙලින්ම ගියේ අම්මගෙ කාමරයට. මං යනකොටත් අම්මා හොඳටම නිදි. අම්මට ඇහැරෙන්නෙ නැතිවෙන්න අම්මගෙ නලලට කිස් එකකුත් දීලා මං පහලට එනකොට තාත්තා ඉන්නවා දොරකඩට වෙලා හිටගෙන.
