දවස් ගෙවිලා ගිහින් සති අන්තයත් ආවා. අද ඉරිදා දවසක්. වෙනදා නම් ඉතින් 10 වෙනකන් නිදාගත්තට අදනම් මට කලින් ඇහැරුනා මොකද අද අපේ ගෙදර පොඩි විශේෂ දෙයක් සිද්ධ වෙනවා. අද අපේ ලොකූව බලන්න මනමාලයෙක් එනවා. මමත් ඉතින් උදේම නැගිටලා දත් මැදලා වොශ් එකකුත් දාගෙන පහලට ගියා. කෝ අනේ මේ ගෙදර මිනිස්සු කවුරුවත් පේන්න නෑනේ...
"අම්මේ...අම්මේහ්...තාත්තේහ් කෝ අනේ ඔයාලා..."
"මොකද ළමයෝ කෑගහන්නෙ උදේම... මං කුස්සියේ ඉන්නෙ"
මං කුස්සියට යද්දී අම්මා කේක් එකක්ද කොහෙද හදනවා. සුමනා නැන්දා නම් උදේ කෑම හදනවද කොහෙද. සුමනා නැන්දා කියන්නෙ දැන් ගොඩක් කල් ඉදන් අපේ ගෙදර වැඩට ඉන්න කෙනා. එයාගෙ ළමයි එයාට සලකන්නෙ නෑ කියලා තමා රස්සාවක් හොයන් ඇවිත් තියෙන්නෙ. ඉතින් අපේ අම්මටත් දුක හිතිලා නැන්දව අපේ ගෙදර වැඩට අරගෙන, සුමනා නැන්දා පොඩි කාලෙ ඉදන්ම අක්කටයි මටයි හරිම ආදරෙයි... මං ඉතින් සුමනා නැන්දටත් හිනාවක් දාගෙනම පිටිපස්සෙන් ගිහින් අම්මව බදාගත්තා..
"චූටි... එහාට වෙන්න ළමයෝ පොඩි එකෙක් වගේ හුරතල් වෙන්නෙ නැතුව"
"ම්හුක්... මං පොඩි තමා අප්පා නේද සුමනා නැන්දේ"
"ඒකනෙ ලොකු නෝනා... චූටි මහත්තයා තාම පොඩීනෙ ඉතින්"
"ඒකනේ සුමනා නැන්දා විතරයි මට ආදරේ..."
"හරි හරි වාඩිවෙලා ඉන්නකෝ...මං චූටි මහත්තයට තේකක් හදලා දෙන්නම්"
මාත් කෑම මේසෙ පුටුවකින් වාඩිවෙලා අම්මයි සුමනා නැන්දයි උයන දිහා බලන් හිටියා. ටිකකින් සුමනා නැන්දා මගේ තේ එකයි කුකීස් වගේකුයි ගෙනත් මේසෙ උඩින් තිබ්බා මං ඉතින් අම්මයි සුමනා නැන්දයි එක්ක කතා කර කර ඉන්නකොට අපේ අක්කා මොංගලිත් ආවා මොකද්දෝ මගුලක් මූණෙ උලාගෙන හොල්මන වගේ. තව පොඩ්ඩෙන් තේ එකත් හිර වෙනවා මට...
"යකෝ අක්කෙ !! ඔහොම එකපාරටම එන්න එපා ඕයි බයවෙනවනේ"
"චූටි පුතා මොකක්ද ඔය කතාකරන විදිහ, ඔහොමද අක්කට කතාකරන්නෙ"
"අයියෝහ්, හරි හරි අප්පා... මේ ඒක නෙවෙයි හලෝ ඇත්තටම මොනාද ඔය උලාගෙන ඉන්නෙ"
