ပိုက်ဆံရှင်းပြီးသည်နှင့် တည်စေက အံ့သြ၏အိတ်ကိုလွယ်ကာ ဆိုင်ထဲကထွက်လိုက်သည်မို့ အံ့သြလည်း အနောက်ကလိုက်ထွက်လာခဲ့လိုက်သည်။ အံ့သြစီးသည့် ဖိနပ်ဆိုဒ်ကိုသိသော်လည်း အင်္ကျီဆိုဒ်ကျ မမှန်းတတ်၍ပဲလားမသိ။ သည်တစ်ခါဝတ်ရသည့် အင်္ကျီက အံ့သြထက် သိသိသာသာပွကာ အင်္ကျီလက်ဆို နည်းနည်းပင်ရှည်ထွက်နေသည်။ ဆိုင်ကယ်ခေါင်းကို လမ်းဘက်လှည့်ရန် ပြင်နေသူကိုကြည့်ရင်း
"တည်စေ"
"အင်း"
"အင်း" သာလာပြီး ခေါင်းကျမလှည့်လာ။
"ဒီမှာ ကြည့်စမ်း"
ဆိုင်ကယ်ပေါ်နေရာယူပြီးသည်ထိ အံ့သြကအနောက်ခုံတွင် ဝင်မထိုင်သေးသည်မို့ တည်စေကလှည့်အကြည့် အင်္ကျီလက်ဝကို ဟစိဟစိလုပ်ကာ သူ့မျက်နှာနား ကွက်တိကပ်ပစ်လိုက်သည်။ ရုတ်တရက်မို့ မျက်ခုံးကျုံ့ကာ ခေါင်းကိုအနောက်ရုပ်သွားသူကို ကြည့်ပြီး
"ငါးနဲ့မတူဘူးလား"
အံ့သြ ကိုယ့်လက်ကိုယ်ပြန်ကြည့်ကာ ရယ်ရင်းမေးတော့ တည်စေက ခေါင်းခါရင်းကရယ်သည်။
"အတည်ပြောတာ ကြည့်ကြည့်"
သူ့ဆီက သူ့လက်စွဲ "အင်း" ဟူ၍ ကြားရလျှင်ကြားရ၊ မဟုတ်လျှင်လည်း အနည်းဆုံးတော့ ခေါင်းညိတ်ထောက်ခံမှုတော့ဖြင့် ရကိုရရမည်မို့ အံ့သြ လက်ကိုနည်းနည်းထပ်မြှောက်ကာ စိတ်ပါလက်ပါဖြင့် ထပ်လုပ်ပြမိပြန်သည်။
"ဒီမှာကြည့် ဒီနားလေးဆို ငါးပါးစပ်လေး ဟစိဟစိလုပ်နေတာနဲ့ မတူဘူးလား"
နောက်လက်တစ်ဖက်နှင့်ပါ ဘေးကနေ လေဘယ်လ်ထိုးသလိုပြောတော့ တည်စေ့အရယ်အပြုံးတို့က ပို၍အသက်ဝင်လာသည်။ အံ့သြကောင်းမှုနှင့် သူအရင်ကပေါင်းသည့်သူငယ်ချင်းတွေနှင့် အခေါ်အပြောမရှိတော့သော တည်စေသည် အံ့သြပေါင်းသည့်သူများနှင့်တော့ အလိုက်အထိုက်နေပေးရှာသည်။ သွားအတူလာအတူဆိုသော်လည်း အံ့သြနှင့် နှစ်ယောက်တည်းအတူရှိချိန်တွင် ပြုမူတတ်သည့် တည်စေ့ပုံစံအများစုကို တခြားသူတစ်ဦးဦးရှိချိန်တွင် သိပ်မတွေ့ရတတ်။ ဥပမာ၊ ယခုလို သူ့မျက်ဝန်းက လခြမ်းပုံပေါ်သည်အထိ ရယ်တတ်ခြင်းမျိုးပင်။
STAI LEGGENDO
ကိုကို့ကို
Storie d'amore"Love Triangle" Pen Missing the Ink, Ink Kissing the Paper. Saket_ Quotesman
