ကိုကို့ကို

27

🎵မြူးကြွတဲ့တေးသံ ပျံ့လွင့်လို့ နေ
ကူးပြောင်းစတန်ခူးလေမှာ
တစ်ယောက်တစ်လက်မို့ လှမ်းကာ ဖျန်းပက်ကြစဉ်🎵

Dining Room ထဲ ဝင်လိုက်သည်နှင့် ဇွန်းသံခက်ရင်းသံ တိုးသဲ့သဲ့တို့ကြား သင်္ကြန်သီချင်းသံချိုမြမြက ငြိမ့်ငြိမ့်ကလေးစီးဆင်းနေခဲ့သည်။

🎵ပိတောက်ဖူးလေးတွေ
ပန်ဆင်ထားသူရေ
ခေါင်းလေးမော့လို့ ပိတောက် ဖူးလေးတွေ
ပန်ဆင်ထားသူရေ🎵

ခေါင်မေလတ် အိပ်ရာထနောက်ကျသည်မို့ ခပ်ဝေးဝေးဆီက တောင်စွယ်များအကြားမှ တလိမ့်လိမ့်တက်လှမ်းလာမည့် ဖန်နေဝန်းကို အရသာခံကြည့်ရှုနိုင်မည့် View ကောင်းသည့်နေရာဘက်ခြမ်းမှ စားပွဲဝိုင်းအားလုံးတွင် လူများပြည့်နေပြီဖြစ်သဖြင့် ထောင့်မကျတကျနေရာရှိ စားပွဲလွတ်တစ်လုံးတွင်သာ နေရာရလိုက်သည်။ မေလတ် စားပွဲပေါ်တွင် ဖုန်းကိုတင်လိုက်ပြီး ဧည့်သည်တော်များ၏အမှာအတိုင်း ကြက်ဉကြော်များ လက်မလည်အောင် ကြော်ပေးနေကြသည့် ဝန်ထမ်းကောင်လေးနှစ်ယောက်နားသို့သွားကာ Sunny-Side Egg တစ်လုံး ကြော်ခိုင်းလိုက်သည်။ ထို့နောက် Coffee Counter သို့သွားကာ ကော်ဖီတစ်ခွက်ဖျော်ခိုင်းလိုက်သည်။

🎵ပျော်ပျော်ရွှင်ရွှင်တီးမှုတ်ကြတဲ့ပွဲမှာ
ငိုနေရှာတဲ့ပန်းပိတောက် ဖူးတွေလည်း
ရာသီအချိန်မီလန်းပွင့်ခဲ့တဲ့ ပိတောက်ကို
ပန်ဆင်ပါရင်လှသထက် တင့်မှာမို့🎵

အစားအသောက်တို့ကို ဘူဖေးစတိုင်ခင်းကျင်းထားရာ Stands များဆီသို့သွားကာ ကိုယ့်စိတ်ကြိုက်ရွေးယူနေခိုက် ထွက်ပေါ်လာသည့် ပန်းကန်နှင့်ဇွန်းထိခတ်ပြီး ကြမ်းပြင်သို့ဇွန်းပြုတ်ကျသွားသံခပ်ကျယ်ကျယ်။ Dining Room ထဲရှိလူများအားလုံး၏အာရုံက အစားအသောက် Stand နှင့်မလှမ်းမကမ်းရှိ စားပွဲတစ်လုံးမှ အနောက်တိုင်းသားအမျိုးသားတစ်ဦးနှင့် ၎င်း၏သမီးဖြစ်ဟန်တူသူ အသက်ငါးနှစ်ခြောက်နှစ်အရွယ် မိန်းကလေးတစ်ဦးထံသို့ ရောက်သွားကြသည်။ အမျိုးသားက ပတ်ဝန်းကျင်ကို ဂရုမပြုဟန်ဖြင့် သူ့သမီးဖြစ်သူကိုသာတစ်ချက်ကြည့်ကာ Service ပေးနေသောဝန်ထမ်းထံ လှမ်းကြည့်လိုက်သည်။ ဤတွင် Trained ပေးခံထားရသော ဝန်ထမ်းဟုပြောရလွတ်ပင် ဇွန်းခက်ရင်းတစ်စုံ အသင့်ယူလာပေးနေသည့် ဟိုတယ်ဝန်ထမ်းတစ်ယောက်ကို တွေ့လိုက်ရသည်။