သြသြ ဆေးသောက်ပြီးအိပ်နေခဲ့ရာ ဖုန်းသံကြား၍ နိုးလာခဲ့သည်။ ဖုန်းကိုင်မည်လုပ်ပြီးမှ ခေါ်ဆိုသူကိုကြည့်ပြီး အိပ်နေရာကဆတ်ခနဲထထိုင်မိသည်။ သတ်မှတ်ချိန်အတွင်း မကိုင်လိုက်မိ၍ Missed Call ဖြစ်သွားရာမှ ထပ်မံပေါ်ထွက်လာပြန်သော ဖုန်းသံကြောင့် သြသြနှုတ်ခမ်းကို လက်နှင့်ကိုင်ကာ ဆောက်တည်ရာမရဖြစ်နေမိသည်။ နောက်ဆုံးမထူးတော့သည်မို့
"ဟဲလို တည်စေ"
"-----"
"ဆောရီး...၊ ငါနည်းနည်းနေမကောင်းလို့ ဆေးသောက်ပြီးအိပ်နေ... ဟင်... ရတယ်၊ ဘာမှမဖြစ်ဘူး။ ဒီတိုင်းဖျားတာ၊ ရတယ် မလာနဲ့။ ဟဲလို တည်စေ"
တတူတူဖြစ်သွားသောဖုန်းကြောင့် သြသြဆံပင်တို့ကို ဆုပ်ကိုင်ဆွဲဖွပစ်လိုက်သည်။
*တမင်မတွေ့ချင်သေးလို့ အချိန်ဆွဲတဲ့ဟာကို...*
.
.
"မလာလည်းရပါတယ်ဆို"
လူကသူ့အိမ်ရောက်ရုံမကလို့၊ သူကိုယ်တိုင်က အိမ်ရှေ့တွင် ခဏတဖြုတ် လေကောင်းလေသန့် ရှူချင်ပါသည်ဆို၍ သူ့အိပ်ခန်းထဲကနေတောင် တွဲခေါ်လာခဲ့ပြီးမှ လောကွတ်ကချော်နေသေးသည်။ မနက်ကကျူရှင်ရောက်မလာ၍ ဖုန်းဆက်ကြည့်တော့ တော်တော်နှင့်မကိုင်။ သုံးကြိမ်မြောက်မှကိုင်တော့ ဝမ်းသာရုံရှိသေး၊ နေမကောင်းဘူးဆိုသည်နှင့် အိမ်ကဂိုက်အချိန်ကိုဖျက်ကာ တည်စေထွက်လာခဲ့ခြင်းဖြစ်သည်။
"ဘာလို့ မုန့်တွေအများကြီး ဝယ်လာတာလဲ။ အားနာစရာကြီး"
အဖျားက တော်တော်ကြီးပုံရသည်။ အိမ့်အံ့သြက အားနာနေသည်၊ ပြီးတော့ အဲ့ဒါကလည်း မုန့်တွေဝယ်လာတာကိုတဲ့လေ။
"မင်းနေကောင်းမှ ပြန်ဝယ်ကျွေးပေါ့။ ဟ၊ ဟုတ်သားပဲ! FM (Fanmeeting) နေ့ကျမှ အပြန် အကင်ဆိုင်ဝင်ကြမယ်။ FM လုပ်မယ့်နေရာနဲ့ မင်းကြိုက်တဲ့အကင်ဆိုင်နဲ့က တစ်ကြောတည်းပဲ"
ပြောလိုက်တော့ တည်စေ့ကို အကြည့်လွှဲသွားသည်။ စိတ်ထဲထင့်သွားပေမဲ့ အကြည့်၏လားရာတည့်တည့်တွင်က သူအကြိုက်ဆုံးမုန့်ထုပ်ဖြစ်နေမှ တည်စေ့မှာ ဟင်းချနိုင်သည်။ မုန့်ထုပ်ကိုဖောက်ပြီး သူ့ဆီကမ်းပေးတော့ ခေါင်းခါပြသည်။ မျက်လုံးချင်းဆုံမလာသူကို စိုက်ကြည့်နေလိုက်ရင်း အံ့သြတို့ ဘာအကွက်ဆန်းများ ထွင်ပြန်ဦးမလဲဆိုသည့်အတွေးနှင့် တည်စေ မုန့်ကိုကိုယ့်ဘာသာ နှိုက်စားပစ်လိုက်သည်။
أنت تقرأ
ကိုကို့ကို
عاطفية"Love Triangle" Pen Missing the Ink, Ink Kissing the Paper. Saket_ Quotesman
