ကိုကို့ကို

24

နွေဦးတွင် လေရူးက တစ်ချက်တစ်ချက် သော့နေခဲ့သည်။ အညာနွေဖြစ်သော်လည်း ပင်ကြီးရိပ်မြိုင်ထဲတွင်မို့ အရိပ်ကအတော်ရကာ အေးဆေးလှသည်။ ခေါင်းထက် ဟိုဟိုသည်သည် ပျံဝဲကာမြည်တမ်းနေကြသည့် ကျေးငှက်သာရကာတို့၏ တီတီတာတာအသံတို့သည်လည်း ငြိမ်းအေးမှုကို ထပ်မံအားဖြည့်ထားနေ၏။

"အခုပဲမင်းတို့ကြည့်လေ၊ သစ်ပင်ရဲ့ Direct - တိုက်ရိုက်တန်ဖိုးတွေဖြစ်တဲ့ အသီးအရွက်၊ သစ်ဉသစ်ဖုတွေပြီးရင် အခုဒို့ရနေတဲ့ အရိပ်အာဝါသတို့၊ သစ်ပင်ရဲ့အကိုင်းအခက်တွေကနေလုပ်တဲ့ အိမ်ထောင်ပရိဘောဂတို့ဆိုတာတွေက Indirect - သွယ်ဝိုက်တန်ဖိုးတွေပေါ့"

နောက်ဆုံးနှစ်၏ နောက်ဆုံးသောတက္ကသိုလ်နေ့ရက်များတွင်မှ ကျ‎ရောက်လာခဲ့ပါသော အံ့ဩတို့ရုက္ခဗေဒနောက်ဆုံးနှစ်၏ ကွင်းဆင်းလေ့လာရေးသည် ကာလံဒေသံအရ ဆရာဦးသက်ညိုအတွက် Setting ခင်းပေးထားသလို ဖြစ်နေခဲ့သည်။

"အမှန်ဆို ဒီသစ်ပင်ရဲ့တန်ဖိုးသုံးသွယ်အကြောင်းက မင်းတို့ပထမနှစ်လောက်ကတည်းက အခြေခံစသင်ခဲ့ကြရပြီးနေမှာပါ။ ဒီနေ့ဆရာက အဓိကက မင်းတို့ကို စာချည်းသက်သက် အလွတ်ကျက်မှတ်မိသွားတာမျိုးထက်၊ မင်းတို့အသွေးထဲအသားထဲကနေပါ ဒီတန်ဖိုးတရားတွေကို ခံစားနားလည်စေချင်တာ"

အံ့ဩ ဆရာ့စကားကိုနားထောင်ရင်း ဆရာညွှန်ပြရာ အနီးပတ်ဝန်းကျင်ရှိ သစ်ပင်ကြီးငယ်တို့၏ ဝိသေသလက္ခဏာအချို့ကို လိုက်လံကြည့်ရှုမှတ်သားနေခိုက်

"ဆရာကသာ သဘာဝအရိုင်းတောဆိုပြီးပြောနေတာ၊ ဒါကြီးက သိပ်မကြာခင် ငါတို့မြို့တင်မက မြန်မာမှာပါ ထိပ်တန်းစာရင်းဝင်မယ့် Resort ကြီး ဖြစ်လာတော့မယ့်ဟာ"

အနားကိုကပ်ကာ ခပ်တိုးတိုးပြောလာသော သူငယ်ချင်းဖြစ်သူ ဟိန်းထူး၏စကားကြောင့် အံ့ဩ မျက်ခုံးတို့ကိုပင့်လိုက်ကာ သူ့ကိုပြန်ကြည့်လိုက်မိသည်။ အံ့ဩ၏ အံ့ဩသွားသည့်ပုံကိုမြင်တော့

"အေးလေ၊ ငါတို့ခုနဖြတ်လာတော့ ဒီအဝင်ကိုက်(၅၀) လောက်မှာ Rising Sun ရဲ့ ဆိုင်းဘုတ်ကြီး မတွေ့ခဲ့ဘူးလား"

"ဒါဆို..."

"အဟုတ်ပဲ။ ဒီအရိုင်းတောကို နိုင်ငံတကာအဆင့်မီ အပန်းဖြေစခန်းလုပ်ဖို့ဆိုတဲ့ခေါင်းစဉ်နဲ့ Rising Sun Group ကို သက်ဆိုင်ရာက နှစ်ရှည်စာချုပ်နဲ့ အငှားချထားလိုက်ပြီတဲ့။ အငှားသာပြောတာကွာ၊ သိတဲ့အတိုင်း"