အံ့ဩ အိပ်ခန်းထဲရောက်သည်အထိ စိတ်နှင့်လူနှင့်မကပ်နိုင်။ ကန်ပေါင်မှသည် အိမ်ရှေ့အထိ ကိုကိုပြန်လိုက်ပို့ပေး၍ အိမ်ပင်ပြန်ရောက်ခဲ့ပြီဖြစ်သော်လည်း အံ့ဩ၏စိတ်ရထားငယ်သည် ညနေက ကိုကိုပြောခဲ့သည့်စကားများ၊ ပေးခဲ့သည့်ကတိများနှင့် ပြုခဲ့သည့်အပြုအမူတို့ထံတွင်သာ တဝဲလည်လည် ခုတ်မောင်းနေဆဲ။
အံ့ဩ ယနေ့အပါအဝင် သည်ကာလကြားထဲ ကိုကို့အပေါ် ကိန်းအောင်းနေခဲ့သည့် တအုံ့နွေးနွေး ခံစားချက်များကို ကိုကို့ကိုထုရိုက်ရင်း စိတ်ရှိလက်ရှိ ဖွင့်ဟငိုကြွေးမိခဲ့သည်။ အံ့ဩစိတ်ထဲရှိသမျှ ပေါက်ကွဲတိုင်တည်သည်ကို ကိုကိုက အသာပွေ့ဖက်ကာ တဖွဖွနှစ်သိမ့်ပေးနေခဲ့သည်။ အချိန်တစ်ခုကြာ၍ အံ့ဩအငိုဆဲလာချိန်၌ အံ့ဩ၏ပခုံးထက်သို့ သက်ဆင်းရပ်နားလာခဲ့သည့် ကိုကို့နှုတ်ခမ်းလွှာတစ်စုံ။ မှင်တက်အံ့ဩသွားရမှုကြောင့် တသိမ့်သိမ့်ရှိုက်ငိုနေခဲ့သော အံ့ဩသည် မီးပွိုင့်မိသွားသည့် ယာဉ်ငယ်တစ်စီးအလား ချက်ချင်းဆိုသလို အရှိန်သတ်သွားခဲ့ရသည်။
ဤတွင် ကိုကိုက အံ့ဩ၏မျက်နှာကို မေးမှတစ်ဆင့် ခပ်ဖွဖွမော့ယူလာခဲ့သည်။ ထို့နောက် ကိုကိုက အံ့ဩ၏ပါးနှစ်ဖက်ပေါ်ရှိ မျက်ရည်နှစ်သွယ်ကို အံ့ဩမြတ်နိုးရပါသည့် သူ့လက်ရှည်သွယ်သွယ်တို့ဖြင့် တယုတယဖယ်ရှားပေးလာသည်။ အံ့ဩမျက်နှာနှင့် အနီးကပ်ဆုံးတွင် ရှိနေခဲ့သော ကိုကို့မျက်နှာချောချောကို မော်ကြည့်လိုက်မိတော့ အံ့ဩကို ငဲ့ကြည့်လာသည့် ကိုကို့၏ရီဝေဝေအကြည့်များ။ စပါးကြီးမြွေ၏အညှို့ခံလိုက်ရသူနှယ် အံ့ဩတစ်ကိုယ်လုံး လှုပ်ရှားမှုကင်းမဲ့သွားခဲ့ရသည့် ထိုအခိုက်အတန့်တွင် ယုတ်စွအဆုံး အံ့ဩ၏သူငယ်အိမ်တစ်စုံသည်ပင် ကိုကို့ဆီမှ အကြည့်မလွှဲနိုင်ခဲ့။
ထိုအခိုက် အံ့ဩ၏မျက်ရည်စတို့ကို ဖယ်ရှားပေးနေရာမှ မသိမသာ သိမ်မွေ့စွာဖြင့် အံ့ဩ၏မျက်နှာကို လိုသလို အသာသဲ့ယူလှုပ်ရှားစေလိုက်သည့် ကိုကို့လက်တစ်စုံ။ တစ်ဆက်တည်းမှာပင် နွေးခနဲဖြစ်သွားသည့် အံ့ဩ၏နဖူးပြင်ငယ်။ အံ့ဩ၏စိတ်နှင့်အတူ အမြင်အာရုံသည်လည်း အတိုင်းအဆမရှိ လွင့်မျောပျံ့လွင့်သွားခဲ့ရာက မျက်တစ်ခတ်အကြာ၌ မနီးမဝေးက ကန်ရေပြင်ထက် အသော့ကလေး ဝပ်ဆင်းရပ်နားသည့် ပန်းသွေးရောင်လိပ်ပြာငယ်တစ်ကောင်ထံသို့ ကျရောက်သွားခဲ့သည်။ ထို့နောက် စက္ကန့်ပိုင်းအတွင်းမှာပင် ကန်ရေပြင်ထက် လှိုင်းကြက်ခွပ်ကလေးများကို ချန်ရစ်ရင်း ၎င်းခဏတာမျှ ဆော့ကစားခဲ့သည့် ရေပြင်ငယ်ကို နောက်ပါးချန်ရစ်ကာ အဝေးသို့ ပျံတက်ထွက်ခွာသွားခဲ့သည့် လိပ်ပြာငယ်နှင့်အတူ အံ့ဩ၏နဖူးထက် မိနစ်ဝက်မျှသက်ဆင်းငြိမ်သက်နေခဲ့သည့် နှုတ်ခမ်းလွှာတစ်စုံသည်လည်း တလွင့်လွင့် ဖယ်ခွာသွားခဲ့သည့်နောက် လှိုင်းကြက်ခွပ်သည်းထန်နေခဲ့ရသည်က အံ့ဩ၏နှလုံးသားရင်ခွင်ငယ်ငယ်။
YOU ARE READING
ကိုကို့ကို
Romance"Love Triangle" Pen Missing the Ink, Ink Kissing the Paper. Saket_ Quotesman
