Make You Mine [Complete]

Part _ 27 [U&Z]

Unicode

အပိုင်း(၂၇)

အနက်ရောင်မျက်မှန်အောက်ကမျက်ဝန်းတို့က တစ်စုံတစ်ခုကို‌မျှော်လင့်စောင့်စားနေပုံကြောင့် တောက်ပနေသည်။သို့သော် မည်သူကမှမမြင်နိုင်။စိတ်ကိုခပ်ပေါ့ပေါ့ပါးပါးပဲထားကာ ဝင်ပေါက်ကို အာရုံအလုံးစုံပို့ထားလိုက်သည်။မန္တလေးမြို့ရဲ့ ‌အကြီးဆုံးမြေကွက်လေလံတင်ပွဲမှာ စွဲမက်တစ်စုံတစ်ယောက်ကိုစောင့်နေတာဖြစ်သည်။စောင့်နေရုံတင်တော့မဟုတ် ထိုလူကိုပါ တိုက်ခိုက်ဖို့လက်နက်အပြည့်အစုံနဲ့စောင့်မျှော်နေတာဆိုပိုမှန်လိမ့်မည်။
‌
"မောင်ထည်ဝါ နောက်ကျသားပဲ"

"ကားတွေပိတ်နေတာနဲ့ အန်ကယ်"

စောင့်မျှော်နေသည့် အမျိုးသားရဲ့အသံဟာ အရင်နှစ်တွေကထပ်ပိုပြီး တည်ကြည်ကာသြဇာညောင်းလာသည်။ကြည်ရှသည့်အသံက နှလုံးသားရဲ့အောက်ခြေထိတိုင် အတားအဆီးမရှိ စီးဝင်သွားကာ နှလုံးသားကိုအသက်ဝင်လာစေသလို‌ပင်။

ဒုတိယအကြိမ်ပြန်လည်တွေ့ဆုံခြင်းပါ ကိုကို။ဒီတစ်ကြိမ်တော့ ကိုကို စွဲမက်ဆီကနေ လွတ်မြောက်ဖို့ မတွေးပါနဲ့တော့။အတွေးနဲ့အတူ  စွဲမက်ခပ်ဖွဖွပြုံးလိုက်မိသည်။

"ကြွရောက်လာကြတဲ့ ဧည့်သည်တော်များအားလုံးပဲ မဂႅလာပါရှင်...၊မကြာခင်အချိန်အတွင်းမှာပဲ လူကြီးမင်းတို့စောင့်ဆိုင်းအဖိုးတန် လေလံပစ္စည်းတွေကို ခင်းကျင်းပြသပေးသွားမှာပဲဖြစ်ပါတယ်ရှင်"

စင်ပေါ်ကအမျိုးသမီးရဲ့ ချိုကြည်ကြည်အသံက ပြတ်သားစွာထွက်ပေါ်လာလေသည်။တစ်ခုပြီးတစ်ခု ရှင်းလင်းပြသ၍ လေလံစတင်ဆွဲတာနဲ့ အားလုံးရဲ့အာရုံတို့က ထိုအပေါ်မှာပဲမြဲမြံနေတော့သည်။ထည်ဝါကတော့ သူလိုချင်အရာမလာသေးတာမို့ခပ်အေးအေးပင်။သူအခုတစ်ခေါက်ကိုယ်တိုင်လာရသည်က ဖိုးဖိုးရဲ့လုပ်ငန်းတွေကိုလေ့လာဖို့တစ်စိတ်တစ်ပိုင်းပါသလို တစ်ခြား အရေးကြီးသည့်ကိစ္စတစ်ခုလည်းပါနေသေးသည်။

ထည်ဝါ့ သူငယ်ချင်းထောက်ပံ့နေသည့် မန္တလေးမြို့က အနည်းငယ်ခေါင်သည့် ရွာမကျမြို့မကျ နေရာမှာဆောက်ထားသည့် ဘိုးဘွားဂေဟာတစ်ခုသည် ဖျက်သိမ်းစာကျလာသည့်အတွက် ဆက်လက်ရပ်တည်ဖို့မဖြစ်နိုင်တော့ချေ။ထို့ကြောင့် မြို့တွင်းအဆင်ပြေသည့်မြေကွက်ကို ထည်ဝါက ဝယ်ပြီး၊အဆောက်အဦးပါတစ်ခါထဲဆောက်လှုဖို့ပြင်ထားသည်။ပွဲမတိုင်ခင်ကလည်း ‌လေလံအဖွဲ့ကိုဦးဆောင်သည့် လူကြီးပိုင်းကနေတစ်ဆင့် ဒီနေ့လေလံတင်မဲ့မြေကွက်ထဲက ‌ထည်ဝါလိုချင်တဲ့မြေကွက်အကြောင်းကို ဆွေးနွေးညှိ့နှိုင်းပြီးသည်။