Make You Mine [Complete]

Part _ 30[U&Z]

အပိုင်း (၃၀)
Make You Mine
အရာအားလုံးကိုကျော်လွန်၍

စွဲမက်အိမ်ထဲရောက်လာတော့ ထည်ဝါမျက်ဝန်းတွေ မှေးကျဥ်းသွားလေသည်။ဒီလောက်အိမ်အကျယ်ကြီးထဲမှာ ဘာလို့ စွဲမက်မှလွှဲ၍ ဘယ်သူမှမရှိကြသနည်း။ဒါမှမဟုတ်အိမ်မှာမရှိကြသည်လား။ထည်ဝါ မတင်မကျဖြစ်နေသည့်စိတ်အစဥ်ကို အတည်ပြုချင်သည့်သဘောဖြင့် စွဲမက်ဖွယ်ကို တစ်ခုခုမေးဖို့ပြင်လိုက်သည်။

"အိမ်ကလူတွေရော စွဲမက်ဖွယ်"

"ဘယ်အိမ်ကလူတွေလဲ ကိုကို"

"မင်းအိမ်ကလူတွေကို မေးနေတာ"

ထည်ဝါက စိတ်မရှည်သလိုပြန်ဖြေလိုက်တော့ စွဲမက်က ခပ်ဖော့ဖော့ရယ်သည်။

"စွဲမက်အိမ်ပါဆိုမှတစ်ခြားဘယ်သူရှိဦးမှာလဲ ကိုကိုရယ်....၊စွဲမက်တစ်ယောက်ထဲပေါ့"

"ဒေါ်ခက်မမ ကရော"

ထည်ဝါထပ်မေးလိုက်တော့ စွဲမက်က ချစ်စဖွယ်ပြုံးသည်။ပြီးနောက်....၊

"မာမီက စွဲမက်ကို ဘယ်တုန်းကများ ဂရုစိုက်ဖူးလို့လဲကိုကိုကလည်း....၊အမြဲတမ်း သူ့အလုပ်တွေနဲ့သူရှုပ်နေတာသိရဲ့သားနဲ့....၊ပြီးတော့ မာမီကစွဲမက်နဲ့အတူမနေဘူးလေ"

စွဲမက် ခပ်ဖော့ဖော့ရယ်ရင်းပြောလာသည့် စကားတွေနားထောင်ရင်း ထည်ဝါ့နှလုံးသားတို့အေးစက်သွားရသည်။

"မင်း ဒီနှစ်တွေမှာ ဒီ‌လိုပဲနေလာတာလား"

ထည်ဝါဆိုလိုသည်မှာ ဒီလောက်နှစ်တွေအကြာကြီး သူမ ဒီလို အအိမ်အကျယ်ကြီး၊ဒီအိမ်နည်းတူ အခန်းကျယ်ကြီးတွင် အဖော်ပြုပေးတဲ့လူမရှိ၊နေမကောင်းသည့်အခါမျိုးတွင်တောင် သူမကိုဂရုစိုက်ပေးမည့်လူမရှိသည့် ဒီလို အေးစက်အထီးကျန်လွန်းသည့် အခြေအနေကြီးနှင့် ဘယ်လောက်ခက်ခဲစွာနေထိုင်လာခဲ့ရသည်ကိုပင်။

"ဒီလိုမဟုတ်ရင်တာင် စွဲမက်မှာရွေးချယ်ခွင့်ရှိခဲ့လို့လားကိုကို....၊မာမီကအစကတည်းက စွဲမက်ဘဝထဲကနေ အဝေးကိုထွက်သွားခဲ့တာ....၊အမေဆိုတဲ့တည်ရှိမှု့နဲ့ လူအများအမြင်မှာသာ စွဲမက်နဲ့ယှဥ်ရပ်နေခဲ့ပေမယ့် မာမီက စွဲမက်ကို စွန့်ပစ်ခဲ့တာကြာပါပြီကိုကို"