Make You Mine [Complete]

Part - 38 [U&Z]

အပိုင်း (၃၈)
Make You Mine
အရာအားလုံးကိုကျော်လွန်၍

"ဒီပွဲမှာ ကိုအောင်မြင်ထည်ဝါ နဲ့ပတ်သတ်တဲ့သတင်းတစ်ခုကြေညာစရာရှိတယ်လို့လည်း သိရပါတယ်...၊ဒါကရောဘာပါလဲ"

"အဲ့ဒီကိစ္စက အောင်မြင်ထည်ဝါကဒီနှစ်ကုန်ပိုင်းမှာ Entertainment က စီစဥ်ပေးတဲ့ ပရော့ဂျက်တစ်ခုနဲ့အတူ အမေရိကကို ၂နှစ်သွားရမှာဖြစ်ပါတယ်!"

ကိုဦးစကားကြောင့် စွဲမက် တစ်ဖက်မှာရှိနေတဲ့ ကိုကို့မျက်နှာကို ဖျတ်ခနဲလှမ်းကြည့်မိသွားသည်။အစက တစ်နှစ်လို့ပြောခဲ့သည်မဟုတ်လား။

"Oh..."

"ဒါဆိုသူတို့နှစ်ယောက်ကတွဲနေတာမဟုတ်ဘူးပဲ"

"အေးလေ တကယ်တမ်းတွဲနေရင်း ဒီလိုနှစ်အကြာကြီး ပြည်ပကိုခွဲထွက်ပါ့မလား"

"တကယ်ဟုတ်နေတော့ရော ဘာလုပ်မှာလဲ...၊ဒီလောက်တောင်အောင်မြင်မှု့တွေရထားပြီးမှ အကုန်လုံးကို စွန့်ပစ်ပြီး အချစ်နောက်ကိုဘယ်သူက ရူးရူးမိုက်မိုက်လိုက်မှာလဲ"

"အေးလေနော်...၊ရွှေရောင်အနာဂတ်ကြီးကိုပစ်ပြီးတော့ ဘယ်သူက ရေထဲခုန်ဆင်းမှာလဲ...ငါသာဆိုလည်းလုပ်မှာမဟုတ်!"

"အဲ့တာပဲလေ ...၊လူတွေရဲ့လောဘ နဲ့ အောင်မြင်ချင်မှု့တွေ ကိုအချစ်ဆိုတဲ့အရာကဘယ်တော့မှမယှဥ်နိုင်ဘူး စစ်မှန်တဲ့ချစ်ခြင်းမေတ္တာဆိုတာ ဇာတ်လမ်းတွေထဲမှာပဲရှိတာ.."

"အမှန်ပဲ...အမှန်ပဲ..."

လူထုဆီက တစ်ယောက်တစ်ပေါက်မှတ်ချက်ပေးသံတွေကြောင့်ဆူညံနေ‌သော်လည်း စွဲမက်နားတွေက ဘာကိုမှမကြားတော့သလို စွဲမက် အမြင်အာရုံတို့သည်လည်း အလုပ်ကောင်းကောင်းမလုပ်တော့ပါချေ။အမေရိက ကို၂နှစ်သွားမယ်ဆိုတဲ့ စကားသံက စွဲမက်ကို ပိတ်ပိတ်မှောင်နေတဲ့ ချောက်နက်ကြီးထဲဆွဲချသွားသလို သူမရဲ့နားတွေမျက်လုံးတွေကိုပါ ကန်းစေကွယ်စေခဲ့တာလား။

ကိုကိုသိနေတာလား။
ဘာကြောင့်များလုပ်ရက်ရတာလဲ။
သူ့မရဲ့ခံစားချက်တွေကိုထုတ်ပြောခဲ့ပါရဲ့‌ ဝေးကွာဖို့သာ ကိုကိုကအတောင်ပံဖြန့်ခဲ့သည်။တကယ်ပဲဒီလိုဝေးသွားမှဖြစ်မှာလား။