فكرت نور في ترتيب أدواتها قبل حضور المدرس انهمكت كثيراً في التحضير وبينما هي علي هذا الوضع وجدت من يضع يده علي عينها فهل هي رؤي ام المعلم أم والد رؤي من يا تري ؟
لم تفكر نور كثيراً بل جلبت احدي ادواتها وصفعت هذا الشخص في عينه فسمعت صرخة عالية من رؤي.
رؤي :- انتي علي طول همجية كده ومعرفش اهزر معاكي
نور: - معلش مكانش قصدي انا قلت اهزر زيك مش انتي قولتيلي خليكي كول
رؤي:- كنتي هتشوهيني وبتقوليلي كول ، يلا المستر جه في الجنينة برا
انتهي المعلم من شرح الدرس ومدح نور كثيراً بسبب ذكائها العالي وبعد ان رحل سألت نور رؤي سؤالاً وظلت فترة حتي جاوبت علي هذا السؤال (بخصوص منزلهم )
رحلت نور هي الأخري في الموعد الذي ينتظرها فيه أنس ليخبرها عن أحوال والدتها ،واخيراً وصل أنس
نور: - ازيك يا انس ، ماما عاملة ايه
انس: - كويسة وبتسلم عليكي وبتقولك خدي بالك علي نفسك وباعتالك دول
نور:- ايه دول ؟
انس: - مش عارف (هو عارف لان عمته تعبانة من الكيماوي هي سألت علي نور كتير وطلبت منه انه يطمنها عليها وباباه هو اللي باعت الظرف دا )
نور:- طب هي ماما بتروح الشغل اعدي عليها في اي وقت
انس:- لا هي قالت الشغل مالوش لازمة وقدمت استقالتها وطلبت معاش مبكر
نور: - طيب المرة الجاية طمني عليها اكتر انا قلقانة عليها اووي
انس: - ممكن طلب أخير بقي علشان عندي مذاكرة وهأمشي ؟
نور:- اه اتفضل
انس: - متخرجيش تاني من غير حجاب.. عن اذنك
لأول مرة تشعر نور بقيمة الأخ الأكبر الذي يأمر وينهي ويحذر ويحن ويقف مع اخوته ،ازداد شعورها بالسعادة عندما فتحت الظرف ووجدت بداخله كلمات خالها التي ادخلت السرور إلي قلبها
(نور حبيبة بابا خلي بالك من نفسك ،ذاكري كويس انا عارف انك محتاجة لنا جداً ،بس هاسيبك فترة مع باباكي يمكن يتغير شوية بفضلك ،وانا عارف انك قدها وقدود ،انا هاجي اخدك بس في معاد معين مينفعش خالص دلوقتي ،حاولي تتعايشي مع الحياة دي مؤقتاً ... وحشتيني وهتفضلي توحشيني طول ما انتي بعيد ،عايز اشوفك أقوي... سلام )
**علي الجانب الأخر
كانت زهرة تعاني جداً ليس فقط من المرض بل من العلاج فالكيماوي مميت ولكنها آثرت علي نفسها حتي تري ابنتها
#في العيادة
عمر: - ها يا دكتور في تحسن في التحاليل دي ولا ايه
الدكتور: - في،بس بسيط
عمر:- مش حضرتك كنت بتقول نسبة بسيطة امال ايه اللي حصل
الدكتور: - المرض دا عامل زي اسنان المشط لما واحد بيقع بيجيب الباقي كله يعني لما بيدخل في جزء من أجزاء الجسم بيجيب الباقي كله بس العلاج هو اللي بيفرق وربنا معاها ،واحنا بنعمل اللي علينا
عمر: - مش فاهم يعني المرض اتنقل لجزء تاني ولا الوضع ايه دلوقت يا دكتور ؟؟
