ود بلدي💔

7

مشيت الجامعه بعبايتي وطرحتي السودة مقاسا متر..
نرجع لعوض فتاش المشاكل..خت سلطان في راسو وانو اتحداهو في بت خالو .عوض ماحصل استفسر عن احوالي وانا محتاجه ولا لا.بس هو انسان بحب يعمل هيبه لنفسو..
اتصل عوض علي امو الهي عمتي وحكا ليها كلام عني فيهو شمار وملح وشطه وتوم والعمه طبخت الحله بطريقتا..عمتي العصر اتوجهت علي امي ..عمتي بتعامل امي باستقلاليه لانو امي طيبه شديد (بتزكر لما كنت في البلد بت عمتي وضعت في المستشفي وامي مشت عليهم ووكلتني بشغل البيت وبعدها الحقا وابارك ليهم..مشيت بعد خلصت شغلي لقيت امي واقفه وعماتي قاعدين في فرشه بيتغدو وامي مخدمه فوقم جيبي دة وودي دة وكبي شاي وامي بطيايه تضحك وتتونس سلمت عليهم وسقت امي ورجعت الموقف حذ في خاطري شديد ليه هم بعملو كدة)
نرجع لعمتي دخلت لقت امي بتعوس في كسرة العشا..
عمتي:سلام
امي:مرحب حبابك اتفضلي..
عمتي:ماسر اضاني الكلام السمعتو عن نورس
امي:قامت وهي مهجومة والعجين في ايدا.شن جاها نورس ومشت علي تلفونا تتصل علي
عمتي:خليها خليها بتكون مشغوله مع ود الجعفري..
امي:قعدت وهي متحيرة في قول عمتي..كلام شنو البتقوليهو ياعمتم..نورس الولد اتقدم ليها عند ابوها وابوها اداهو ميعاد
عمتي:وشن عرفكم باصلو وفصلو مجرد تلفون وخلاص.هي رخيصه كدي .وشن طمنك انها ماتكون حايمه معاه بهناك.بنات اخر زمن لاخشا لا اختشا..
ابوي جا داخل وكان سمع الكلام من برة..
ابوي:اسمعي ياام عوض بتي وانا رابيها بضراعي وعارف مسعاها شنو وعرضها من عرضك قولي كلام نجيض ياتسكتي ولحد وليداتي اقيفي .
عمتي:ومنو الخربا غيرك يامبارك.تعليم شنو التسفرا لحد الخرتوم وتجيبلك شافع عريس بالتلفون ..وطلعت..
مشت عمتي وزعت الكلام في الفريق وبزيادات واضافات..
..
بعد عمتي طلعت اتصلت علي امي وهي مولعه اسمعي يانورس تاني مااسمعك تجيبي سيرة الولد دة واخر سنه ليك في الخرتوم..
ابوي اتكلم معاي بهداوة وقال لي ماتشيلي هم انجحي وربنا كريم..اجازتك بتين يانورس..قربت ياابوي ببدا يوم 2/5وانتهي يوم20/5وبجي بقعد تلاته شهور..
كلام ابوي ريحني..
اتصلت علي سلطان ووريتو انو عوض قالب الفريق بهناك.حتي وانا بعيدة منو قدر ينتقم..سلطان اتفق معاي ننساهو ونقضي الامتحانات...
امتحنا علي خير وانتهي قبلي سلطان وكان شغال في السوق وانا بقي لي امتحان مادتين..
جا عوض لسلطان في السوق ..ووقف جمب الدكان واتكلم بصوت عالي..لوفاكر نفسك يوميتك الفي السوق دي بتعرس ليك مسكين..وتعرس لشنو بتكون اخدت الدايرو ماانتو اصلا كدة ياطلبة الكنب والكفتريات.تقضو قعاد كنب ورصيد وحب.وتجي البت يغطي قدحا ود عمها...
رد سلطان:ماعيب عليك تتكلم عن عرضك في السوق ارجل وغطي قدحك انت بالحفاظ والخوف عليهم بس..وانت لو بتعرف الاصول مابتقضي صواتة حريم وقوالات..
عوض اتبكم وطلع فات..
راجل خالت سلطان..عفيت منك ياسلطان..عوض دة قالب السوق دة بمشاكلووبتمرجل ساي..وانا بقيف معاك قلبا وقالبا والبتدورو بسوي ليك.ابشر ياسلطان.انت راجل والله.انت خايف علي البت اكتر منو..
سلطان اتصل علي وحكا لي وقال لي ماتفكري كتير واجهزي قربنا للسفر..
خلصت امتحانات علي خير..وبديت اجهز للسفر ..سلطان اداني قروش اشتري حاجات بسيطة لاخواني الصغار.رفضت قلت امي وابوي مابرضو.قال لي قولي لميت من مصاريفي وفرت عشانكم..
مشيت السوق العربي مع صحباتي كلنا مسافرين علي اهلنا..الماشا الابيض.الماشا الشماليه..الماشا الجزيرة.مشينا واشتريت لكل واحد من اخواني بجامة وشوكلاته.واشتريت لي كريم جلسوليد وبجامه..رجعت الداخليه وانا بتكلم مع سلطان..قال لي انا حجزت تزكرتين لي وليكي..والسفر بكرة ان شاءالله.انابمشي اسلم علي اهلي اسبوع واتم موضوعي مع ابوك وارجع اشتغل في اجازتي اكسب زمن بدل عطالة الاجازة..
صحيت الصباح بتلفون سلطان.قومي يانوامه عشان اجهزي جهزت وانتظرت سلطان جاني بامجاد واتصل ودعت البنات وطلعت..ونحن ماشين علي الطريق قال لي .انا خايف ابوكي مايقبل بي وانا طالب لسه.ماعرفت ارد اكتفيت باني اعاين لشنطتي الفي يدي واسكت..وصلنا المينا البري وركبنا البص كان اول كرسين بعد السواق ..قعدنا .وكل واحد خجلان من التاني ومرتاح للتاني..قال لي نورس.اتلفت عاينت ليهو.لقيت عيونو مدمعه.في شنو ياسلطان.قال لي بحبك والله..بحبك يانورس لاني لقيت اهتمام امي تاني..لاني رجعت اتنفس واعيش من جديد..انا حسيت الدم اتحرك في عروقي باااارد.دنقرت راسي وانا بفرك في ايدي ببعض.اتلفت سلطان علي الشباك.عاينت تجاهو بعد مسافه اتلفت علي ودموعو سايله اتوترت وقلت سلطان .رد.لي ببحه في صوتو.ايوة يانورس.سلطان انا معاك ومابخليك واوعدك ياسلطان مااتخلي عنك.سلطان بكي زيادة بحنيه وقال وانا اوعدك اعمل المستحيل واسعدك وانفذ مطالب ابوكي..
وصلنا وكان لازم سلطان يركب مواصلات تانيه لمنطقتو ..كان شايل ملابسو وسخانه في شنطة هاندباغ صغيرة قلت ليهو جيبا ياسلطان انا بغسل ليك بطريقتي ولما تجي بيتنا بديها ليك بطريقتي بعد تحنيس شلتها شال من الشنطه غيارين ليهو .ركبت ركشه وصلت البيت وخليت سلطان متجه علي بيتم..
وصلت بيتنا وامي حضنتني وبكت واخواني لقيتم راجني تحت الشجر في الشارع..
ابوي جا وشايل حاجات للغدا يستقبلني بيها.حضنتو وسلمت عليهم..مشيت غيرت ملابسي ودسيت شنطة سلطان في دولابي وقفلتها بمفتاح..واديت كل اخواني الهدايا فرحو بيها شديد..وكان عندي اخوي عمرو16سنة صعب شويه .وكنت فاهمة طبعو ووريت سلطان اني لما القي الجو تمام بتصل عليهو.قال لي افتحي الجيب الجوة الشنطة جيبيبي باالقروش الفيها صابون..مشيت علي الشنطة لقيتا 250ج😨
دة شنو ياسلطان وانا مدخله راسي جوة الدولاب وبصوت براحة..دي مصروف ليك بسيط يمشيك .قفلت لما سمعت صوت من برة جاي علي الغرفه ..
رجعت سريري ارتب شيتاتي القديمة واحتفظ بيها في كرتونة.
جات امي داخله...
يتبع....