ود بلدي💔

9

سامعه نقاش امي وابوي بدل علي انها ماموافقه..
قمت بعد بكييييت علي الحيحصل..
امي انا ماشه لنسيبه.
العاقب.اتكسري اقعدي هنا ماف مروق بعد دة الواطة مغربت...
رجعت المطبخ ووقفت اجهز في عشا البيت.مشيت الغرفه جبت تلفوني ولقيت رسايل من سلطان..
اتلفته بجاي وجاي لقيت الجو تمام مسكلت ليهو..وعملت التلفون هزاز عشان اسمع حركتو..
العاقب جا ع المطبخ جدعت تلفوني جوة علبة فاضيه راقدة في الرف..
واثناء ما العاقب بصلح سير سفنجتو بنار البتجاز.تلفوني هزا وعشان في علبه عمل صوت شديد وواضح.ززززززززززز♒♒♒😨😨😨😨العاقب بقي يتلفت جاي وجاي.دة شنو الصوت دة يانورس.بري مان خابرة بكون بيت الجيران .والعلبه شويه شوية تتحرك ...وانا لعاين ليها وبسرعه بعاين للعاقب..العاقب بقي يعاين في حيطة الجيران لصق المطبخ..وبقي يتصنت.انا بقيت اكركب في الحلل عشان صوت الهزاز يروح مع الكركبه.العاقب قال.دة صوت متل صوت الحشرة الجوة الضرة والقصب..وطلع فات..
انا نزلت نفسي وطلعت التلفون ورسلت رساله سريعه اصبرررر لحظة..
اتعشو وغسلت العدة وكاالعادة لميت بواقي الاكل في باقات في التلاجه وجهزت المدارس.وطفيت الانوار وجري علي الغرفه..
سلطان.حكيت ليهو بقي يضحك.قال افتكرتك براك طوالي رجعت ليك..
كلمني انو هو واخوهو وعمو بجو باكر العصر.اتفقت ارسل ملابسو مع نسيبه في نهاية الشارع..ويرسل لي التلفون مع نسيبه..
قفلت باب الغرفه وفرشت في الارض بطانيه وملايه وجبت الوصله وقعدت كويت ملابس سلطان بمسك ابيض ورصيتم في الشنطة ولفيتم بتوب حقي عشان ما يجيهم شي...وكنت بتونس معاهو بسماعتي..
صحيت الصباح وانا مابين وبين..ياربي تستر اليوم دة ويعدي علي خير...
مشيت لنسيبه طمنتني شويه ووريتا حتعمل شنو
جيت نضفت البيت كلو والديوان فرشت ملايات تانيه .وقليت البن جهزتو وطلعت عدة من الحافله تمرتها جهزتها.وامي داخله ومارقه.ها بت ها روقي ..ومكشرة .وتقول بت فلانه عرست مغترب.وبت فلانه سافرت مع عريسا.وبت فلانه جابو ليها..
عشانك ياسلطان تهون القواسي...
وعشانك بحمل قلبي اي قاسي....
بريدك لانك مواطن الرجوله الاساسي..
لانك حنيني وعذابي وشقايا
لانك سكوتي وشجاعتي وحماسي...
وماهما انك  تضيع قطاري
او انو حلمك بعيد مامقاسي...
.دخلت صليت ركعتين..وقعدت قريت قران ويدي في قلبي..
ابوي جا الساعه 3/30وعاين لي وابتسم وناداني باسني في راسي..ماتخافي يانورس .ربنا يجعل الخير.انا لما اتزوجت امك.بديتا بالفاتحه..والله كريم..
ابوي انسان بتعامل معاي بوضوح..
سلطان رسل رساله انو في الطريق..
جات نسيبه وتغمز لي..اليلا رشيتي الحوش دة بحنانك كدي لامن بقيتي صب..
دخلنا المطبخ وبقيت ادق البن وامي قاعدة في بمبر وتعاين فينا انا ونسيبه..
ياخايبات يا المامنكن رجا
نسيبه:ياخالتي شن عرفكن بالحب .الزمن داك كان بريحة ودكن الملانه في راسكن كان طفشن منكن..انتو بس عرسو ليكم كدي من ورا الباب..خلونا نعيش وننقي العريس الوجيه
امي:وشن فايدة الوجاهه بلا قرش..
نسيبه:القلب ومايريد..😊😉😉😉

الباب دقا وانا قلبي دق دق دق..
وتاني الباب دقا وانا قمت وتاني ورجعت قعدت دقات القلب القالت طقققق...
عاينت هناك لابوي ماشي
وامي عيونا الشر بقبق...
ريحة الحبايب فاحت لي..
والريق من خوفي انا اتعشرق...
ونسيبه تعاين وتتشمشر..
جاتني تقرص.ها بت ها 😨
بالشفتو ملاك بس ليكي الحق...
والعاقب جاني يبحلق لي .😠
ماتمرقي الحوش حمر ونقنق...
وانا قلبي قطع قطع اتفلق

وانا لسع دق دق دق..
تاوقت عشان المح طرفو
لقيتو يفتش جاي لجاي
نظرات عينيه حن يتسرق...
وانا قلبي يفرفر بجواي..
دقيت ياقلب اثبت من خوفك لاتغرق...
ماشاءالله كان ياقلبي.
وما لم يشئ الله الحق...

سويت البن بنار الشوق..
ورميت حنيتي قرنفلتين..
وقرفة احلامي سحنتها ناعمه علي لقياك...
غنيت بشوفتك عصفورتين..
شلت القهوة الحارة بايدي..
وزعتها جواي صينيتين...

نورس نورس يابت نورس...
سرحاانه هناك خلف الشباك.اسود عيني ابدا من شوفتك مااتحرك..
ياريت مايخش لبيتنا ضيوف
شان ماتمسح من بهناااك اثرك...

جريت الاوضه..وشلت عبايتي والطرحه السودة..
عشان سلطان بريدم فيني ..وماعندو حوازم الفارغه الموضه..

ويارب تستر حلو الرد..
فاحت لي ريحة سلطان
ممزوجة بريحة الحب والند...
اتحشمت.عشان لو سنحت فرصة شوفتك واتمسحت بموية الورد...
وفجأة الدنيا بقت زي برد..
وضاقت فيني الحد من حد..
يارب سلطان مسكين ويتيم..
انا قلبي بدونو هزيل ومهرد...
.....

يتبع..