ود بلدي💔

19

بعد العقد خلص .ومشو الضيوف..نورس رجعت البيت لقت ابوها قاعد وبعاين فيها شديد..نورس فهمت وبقت تتونس مع ابوها عشان تشغلو..ابوها مارد عليها وساكت..
نورس:يابا مالك في شنو..
ابوها:عارفه يانورس انا داير ليك المصلحة..وباكر اول عريس يجيني بديهو ليك
نورس:يابا انا عايزة اقرا واريح تعبك فينا..
ابوها:لو عايزة تريحيني يانورس تبعدي من البزعلني..
نورس: قامت باست ابوها في راسو وقالت حاضر يابا انا تحت امرك..بس فك الكشرة دي واضحك يابا..انت نوارة بيتنا وبهجتا ومابنتحمل لحظات زعلك...قوم يابا تعال نعمل كبايتين قهوة بحب قعادك جمبي في البمبر جوة المطبخ..
نورس بقت مهمومه من وضع ابوها وعدم رضاهو ..ومبسوطة بانو اتكلم معاها بسياسه وهداوة..
ام نورس:جات داخله المطبخ وقالت:يامبارك باكر ماشين علي فريق اهل عواطف عندهم زول عيان وانا مرافقاها عواطف مابتقصر في واجباتنا..ولازم امش وعايزاك تديني حبة قريشات لزوم المواصلات..
نورس:ياامي تخلينا لمنو لكن
امها:ها بت مالك عندك رضعه ولا مفطومة..ماتقنبي وتمسكي اخوانك لحد ماارجع..بقيتي اطول مني ودايرة تتجرسي بمروقي..
ابو نورس:براحة علي البت شويه..وامشي بس ماتتاخري باكر بديك القروش لما تبقي علي المروق..

بجانب بيت عمة نورس..
رويدة كلمت امها بالشافتو وزادت فيهو شويه..وامها ماصدقت لقت موضوع تفتحو من جديد..بس المرة دي مابتمش علي بيت اخوها وتشاكلو لانها حتستفيد اكتر بحقدها لما تكلم كل الفريق باالكلام..

اها الصباح ام نورس لفحت توبا وشالت محفظتا ذات اللون الاسود الباهت المائل الي الرمادي..واتجهت علي بيت عواطف بخطوتين استعجال..
ام نورس:ياعواطف امرقي امرقي ماك عارفانا ماشين ....الخرابه الخرابه الله يستر قلبي دة يسوي تشششش ياعواطف..
عواطف:قلبك دة برتاح بعد تفكي عارض نورس..ارح نمش نتصل علي ود الخليفه يجينا بعربيتو يودينا بحقو..

واتجهت ام نورس وعواطف لقرية الشيخ ودخلو للشيخ ....بعد حكو ليهو الحاصل بالتفصيل...قال ليهم انتظرو شويه وقعد يعمل في حاجات بطلعا من جوة قلة ملانا حاجات غريبه ...
ام نورس بتاكل في طرف توبا وتتلفت تعاين لعواطف وتمد راسا تحاول تعاين الجوة القله وتعاين للشيخ..ويدها ترجف مع اسنانا..قالت وهي تهمس لعواطف:انتي دة شيخ ولا شيتآ تاني ماشايفه لي مصحف ولا سبحة ولانطق بآيه لحد الان ..
عواطف: اسكتي اسكتي الشيخ دة مبروك ماف شيتا كدة ما سواهو لي ومانجح..
ام نورس:كان كدي خلاص..

والامر كالاتي...طلع الشيخ..دجال مالك للجن..اداهم  اوراق  وقال ليهاتحليها في عصير او شاي وتديها تشربا  وبمرور فترة حتتخلي عن الولد..
طلعت ام نورس علي اعتقاد انو الفي يدها محايات..واتفقت مع عواطف انها تحلهم في عصير لنورس..

و السحر المشروب عبارة عن أن يَكتب الساحر على ورقة إسم الشخص المراد عمل السحر له ، واسم والدته ، بأن يكتبه بحروف وأرقام مفرقـــة واسم الجــن ، وماذا يصنع ذلك الجنى ، وبالطبع سيكون مع الساحر ملك من ملوك الجـــــــن ، فيعطيه تلك الورقة ، فَيُحضر ذلك الملك هذا الجنى ويُكلفــه بالعمل على ما هو مكتوب على تلك الورقة ، ثم بعد ذلك يأخذها الشخص المؤذى الذى ذهب لعمل هذا السـحر فيضعها فى شىء مَشْروب ، فينزل ذلك الشراب فيفتح َمسَام الجسم ، فيدخل الجنى الجسم ، ويُنَفِّــــذ ما طلب منه ، وقد تُوضع تلك الورقة فى قليـــــــل من الماء وتُرش على الطعام فيأكلها الشخص ، هذا هو الشكل الوحيد للســـــــحر المشروب 

مشت ام نورس البيت ودخلت دست الاوراق في المخزن في قرار مكين..

تاني يوم ابو نورس متجه للزراعه لقي عواطف في الشارع سلم عليها وقال ليها كفارة لمريضكم ان شاءالله لقيتوهو تمام..
عواطف:العيان منو وووووب علي ..😨فجاأة اتزكرت انها طلبت من ام نورس تتصرف ....هاها ايوة دي بت خالتي ياحليلا هاها بعافيه شويه ..هيهي..ام نورس ماقصرت ومشت معاي😏....
ابو نورس بطبيعتو انسان طيب وماببالي لاي شي كفر ليها ومشي..

عواطف:عاد الله مرقنا اليلا .. مرتك الدلاهه دي مانبهتني لشنو..ياحليلا بالا كلو في نورس..

نورس بدت تجهز للسفر امها خبزت ليها وجهزت ليها نواشف وبهارات وووو.
امها بدت تقلق انو تديها العصير كيف قبل تسافر وفضلت ايام قليله..

نورس:ياامي عليك الله ماتقصري مع نسيبه في عرسها انا بلاقيها هناك لما تجي
امها:يابتي ان شاء الله ماف عوجه..انا ماشه اسوي لي عصير تشربي معاي..?
نورس:الله ياامي انا عطشااانه وفترانه بالشغل الكتير بس خليني اخش اسويهو انا مدام نفسك فيهو يمه...
امها:لالالالالالالالا😨انا اصلي ماشه اسويهو ..اقعدي انتي واصلي مسلسلتك دي وانا بجيب ليك معاي...
نورس:تسلمي يمة ...
طلعت امها مشت علي المطبخ وفكت طرف توبا وطلعت الورقه وعملتا في العصير بنفس طريقة شرح الدجال😠😠..
شالت الكبايه وجات لنورس..مدتا ليها وهي في نفسها تقول اريتني لو بقدر امرقك بالشطه ياسلطان كان مرقتك.بس البطن بطن بتي مابهريها ليها..
نورس:الله يايمه بفقدك في الداخليه كتير.لما البنات يتغاتتن فيني ...يمة كويت ليك تيابك كلهن عليك الله البسيهن مرتبات ورجعيهين في نفس الطبقه..لكن يمة ليه كل طرف تيابك مصرصرة ومربطه....
امها:ها بت ...انا كل يوم في واجب في الحله بمش وبتاخر لما اقرب علي البيت ..بربط طرف توبي وبقول كدي  (تتبكم يامبارك تتبكم..صمآ عميآ طرشآ)..وأخش علي البيت كان ماكدي ابوك كان فلقني بمركوبو الكلو شوك داك...
نورس قعدت تضحك وهي بتشرب في العصير وقالت :دي شنو خرافات عواطف دي..
امها:😨😨😨عععواطف...مالا ععواطف..ها بت خرافات شنو ..وحات الله ابوك مابقول لي غير جيبي باقي القروش ..
نورس:يمة لما تجي داخلة قولي كدي بس(وجعلنا من بين ايديهم سدا ومن خلفهم سدا،،،،،،،،الخ)وخشي مابتجيك عوجه..
امها:ابوك اصلو من اهل قريش....اصلو هو عقاب عمتك الشغالة نشرة التاسعه في الحله....انجربا فيهو بس حفظيها لي كدي..

يتبع....