ود بلدي💔

16

اهل عبود اتحركو علي ولاية النيل الابيض..وكانو(والد عبود..واخته الكبيرة متزوجه..وام عبود)..
سلطان وعبود اتحركو علي منطة نسيبة ونورس ومعاهم اهل عبود..
وصلو بيت نسيبه وكانت نورس مع نسيبة في المطبخ بجهزو الضيافه(ام نورس وابوها ماعندهم علم بتفاصيل عريس نسيبه انو صاحب سلطان)..

سلطان:نورس  عذابي وينك
نورس:انا في المطبخ.
سلطان:ماف طريقه اشوفك بيها
نورس:امممم مابعرف لو في بس حسي مافاضين اقفل يلا وخليك مع الضيوف..

سلطان قفل وبقي قاعد في جمر وبقي عينو علي باب الديوان الفاتح قصااااد المطبخ بس في خط حصير مضاري جهة المطبخ..

اتفق عبود مع ابو نسيبه علي الزواج السريع بعد خمستاشر يوم..وانو حيجي يسد المال بعد باكر ويعقد..
الزغاريد ملت الفريق..وطلعو الرجال في الحوش يتسالمو مبتهجين.ويعرفوهم بكل المنطقه.الجهه دي اسمها كدي والجهه دي اسمها كدي..وبجاي مدرسة فلان وبجاي المستشفي..وونسه وتعارف ..

عبود حسا بشحتفة روح سلطان ومتاوقتو في جهات الحوش كل شويه..
عبود:ممكن تنادو ام العروس وخالات والمعاها يسلمو علينا
ابو نسيبه:دخل ناداهم

سلطان:بلع ريقو وعاين لعبود وغمز ليهو(شكرا)

جات نسيبه وامها ونورس وخالة نسيبه..
سلمو ووقفو وكان معاهم ام عبود واختها وبدت اخت عبود تعرف ابوها واخوها عليهم ...وشرح ليهم عبود الاتفاقيه والعقد وووو..

وسط الحاصل دة كلو سلطان ونورس خارج نطاااق التغطيه..

يانورس آآآست العزار..
العيون فيك شغاله رادار. ...
والقلب كنتك علي شارع مكانك نار...
والشوق نفض دواخلو من العذابات والغبار..
وقعت عينيكي سرجي وحالتي جمبك احتضار..
عقبالنا نرسم يوم كتابنا..
يوم يجيبوك بزفافك داسه وشك بالخمار..

نورس سلمت علي سلطان ووقفت جمبو بجهة الحريم بينا وبين سلطان خطوتين بمسافة متر..وكل الناس تتونس وتحكي عن بلدا...
سلطان ونورس بتكلمو بالعيون ..

سلطان مربع ايديهو علي صدرو وبعاين لنورس ..أشر ليها بحركة خفيه..(بحبك)

سلطان:
اسعد لحظة واجمل فرحة..
بيني وبينا الحب خطوات
زرعتها حنة وازهار دوحة..
قربي قربي لسه تعالي..
ادي الروح من عطرك نفحة..
ياااااالله الابدع نطفك!!
تسعه وتسعين جريت السبحه..
وختمتها حمدا انك ليا.
نعمة وجوهر وحشمة طرحه..
ياااااخي كفاك تعذيب يالسمحة...

نورس:(هزت براسا تأشر بعيونا)

ها سلطان زح زح لغادي..
يكفي ملامحك رفقة روحي
في كل مكان حارساني قصادي..
كل الناس فرحانه تهني
وانا وقلبي عايشين في وادي..
انت سببنا وانت بوادر في اسعادي..
وعقبال ليك بالحنه في ايدك
لما تجرتق ليا مرادي..
معاك بعيش في ضروة وضلة
لو برقيفه قروض وزبادي...

جات ام نورس تزغرد من خشم الباب وسلمت علي كل الناس وماانتبهت لسلطان..
نورس رجعت رجعت رجعت واختفت بورا نسيبه واشرت لسلطان بيدها بالضبح في رقبتا..
سلطان سلم ع ام نورس وكانو بسلم نفسو للشرطة..
ام العريس ..انا ام عبود اسمي كوثر ودي بتي هنادي..ودة عبود ولدي ابوهو سماهو علي الرئيس عبود ..ودة سلطان صاحب عبود من منطقة.....ماقصر نزلنا عندو ضيوف ..بس كاننا اسياد البيت ماحسينا باي فرق..وواقف مع عبود وقفة رجال..عقبال ليهو بالزينه الهديه الرضيه..
نسيبه ونورس انصهرو بالخلعه..
ام نورس ربطت الاحداث ببعض وفهمت الحاصل ..قطعت الضحكه الفي وشها وبدلتا كشرة بمية ربطه في وشها ..وقالت اهلين اهلين حبابكم..واتلفتت عاينت لنورس نظرة وعيد شديد..
سلطان:ارح ياجماعه عشان عندنا سفرة للخرطوم نجهز الوضع ونجيكم للعقد..
ودعوهم وطلعو وطلع معاهم ابو نسيبه..

ام نورس مشت علي نورس ..وقالت ليها وكمان جايبه صاحبو لرفيقتك نسيبه..انتي يانسيبه جنيتي عايزة تبقي طرشه زي نورسه الظالمة روحا..
نسيبه:عليك الله ياخالتي ماتبقي زي عمة نورس تخشي توووش وتخربيها...تعالي تعالي اشربي العصير دة واتونسي ووريني نديك شنو  تعمليهو باكر..?تخبزي بسكويت ولا عروضه..
ام نورس:يخبزوكن في بركان قولو امين...اطلعي قدامي يانورس الظاهر عليكي حتجننيني وتشليني معاك..اطلعي قدامي سريع وأالا أمش احرش عليك العاقب..

نسيبة:ياخالتو عليك الله بس ساعه وحدة  خليها...عايزين نلم المطبخ وعدة الدولاب..امي مع الضيوف برة في الشارع .

طلعت ام نورس وهي ماشه علي البيت بغضب لدرجة سفنجتا بالزعل تطقطق في رجوله بسرعة المشي..ام نسيبه تنادي فيها ماردت دخلت البيت لقت زوجها مبارك بحضر في التلفذيون..

مبارك:اها العريس من وين وقالو شنو ..
ام نورس:العريس من درب مابتحبو يامبارك..ماك عارف الحاصل اخبرك شنو ولاشنو..
مبارك:انتي بطنطني تقولي في شنو ..
ام نورس :فكرها مشي علي عواطف سكتت وقالت:
قالو العقد بعد باكر والعرس  خمستاشر اليلا..
مبارك:والعريس من وين?
ام نورس:برييييي😏😏مااااني خابرة بتعرفو يوم العقد..وقامت خشت المطبخ

خشت المطبخ وهي ماعرفه بتعمل في شنو تشيل كبايه وتخت حله وتشيل غطا وتخت معلقه..وتتكلم براها..البنات ديل يجيرنا الله منهن يتفقن براهن ويجيبن العريس براهن..ونحن نقعد زي الزير نستقبل ونبارك..بري زمان نحن مابنعرف وش عريسنا مشلخ ولا سادة..انت وحظك اليجيك احوص تسكت تقعد والليجيك سنونو برة زي عرش الزنك الزايد برة السقف تسكت تقعد..واليجيك قصير زي قزازة المحلبية تسكت تعرس..الزمن دة يفتشن ويجيبنو نضييييف وكمان حرامي وامكن صاحبو حرامي..بري وحات الله أدبك يانورس..ماعندي شغلة بنسيبه تعرس التعرسو هي حرة..باكر دغش بمش لعواطف تحلني من همك يانورس..😚

يتبع