ود بلدي💔

25

سلطان ترك الجامعه والسوق وبقي ملازم نورس ومرضا ومابين المستشفي من دربات ومهدئات ومابين المركز رقيه وعلاج..

اتصلت ام نورس علي نسيبه وقالت انها جايه  هي  وابو نورس الخرطوم بكرة..
نسيبه كلمت عبود يجيبم من البص وادتم رقم عبود لما يصلو عشان يتصلو عليهو يجيهم..

سلطان راقد في بيت خالتو وبفكر في نورس ويتصل كل شويه علي عبود ونسيبه ويطمن ع نورس..
وكل مايتزكر انو ام نورس هي الأذت نورس يتخنق ويأنب ضميرو انو هو السبب..يعاتب نفسو ويلوما علي الحال..يتكلم مع نفسو وكانو بكلم شخص جمبو..:انا الدنيا تعبتني حطمتني..الحمدلله علي اي حال.فقدت امي وفقدت نورس وفقدت جامعتي..وفقدت نفسي..بقيت مافاهم وماواثق في اي شي..انا لازم اعالج الامور وارجع طبيعي وحياتي طبيعيه..لازم ارجع سلطان المتيمه بيهو نورس..:

يادنيا الخراب مالك مقبله فيني...
شلتي حناني شلتي حبيبتي
وعايزة تخمي باقي سنيني...
ولساك جاريه تضرمي نارك المسجورة
تضخي المرة جواي زي ضواقة الكيني...
كفاك يادنيا شوفيلك سبيلا تاني...
كفاكي مروتي هديتيها بهدلتيني...
ولو ماقارية حجم الوجعه جوة عيوني..
أكتبا ليك مكبرة بخطوط الشيني...
ولا مصرة تمشي علي نعش جسماني..
لما أكون معطر في قماش تكفيني..
ولما تودعك يادنيا روحي تفوتك
ولساك ماشه لبرزخي تزفيني...

سلطان قال بكرة الصباح امشي اودع نورس واسافر لاي جهة امكن نورس تتعالج مني وترتاح..عقد سلطان نية السفر بس لوين هو ماعارف..

سلطان مشي بيت نسيبه ودخل علي نورس بس نورس راقدة علي جنبها الايمن وايدها تحت خدها ونايمة في هدوء..لما شافا سلطان ارتاح نفسيا وحسا انو نورس مرتاحه وقف من بعيد وهو مبتسم ابتسامه باهته فيها شيئ من الخوف والشوق...

اسأل ربي يشفيك من عذابك ووجعك...
وربي يسامح الاادك عصير حطم دواخلك ومنعك...
خلاك كارهة شوفتي وصوتي
وودر حبي جواك ومني شالك ونجعك..
وحاتك لسه جواي باقيه دقة قلبي..
مهما تضيقي من شوفتي بحس بي هجعك...
بشيلك جوة في عيني حنينة روحي..
وبجيبك تاني لو شالك زمانك وجدعك...
وبوصل قلبي بشريانك...
بموت بوراكي لو سكين القدر قطعك...
اقسمي من عذابك ليا..
واديني الوجع من جرعك...
مشتاق لهظارك وروحك
ولي نبرة مقالبك وخدعك
ابقي قويه انتي قويه
انتي مثال تقاكي وورعكّ..

نسيبه جات وماقدرت تقول لسلطان انو ام نورس وابوها جاين لانها اتحسست كونو سلطان موجود في بيتا وممكن يفهما شي تاني...

سلطان طلع ومشي يشتري حاجات لنورس هديه يفرحا بيها وقال يفاتحا بموضوع السفر...
جا عبود ومعاهو ام نورس وابوها.واتفاجئو بحالة نورس وبكو معاها بكا شوق وخوف وحذن واستياء..
قعدت ام نورس :نورس بتي فيك شنو..
نسيبه:ياخالتي نورس دي تعبانه روحيآ ماجسديآ..
ابو نورس:يعني شنو?
نسيبه:نورس فيها سحر والمداوي قال سحر ماكول او مشروب(نسيبه قصدت توصل المعلومه لام نورس)
وبرضو ام نورس مافهمت لانها مامتوقعه المحايات تطلع سحر...
عبود:نورس بتتعالج بالقران وعندها جلسات عشان السحر يطلع منها..
ام نورس:قامت علي حيلا..انا بتي مامجنونه بتي نصيحه وجميله..عايزين الفريق والاهل يتكلمو فيها انها مجنونه وبتتعالج ..ارح يامبارك نمشي بيها المستشفي..
نسيبه:ياخالتي ماحتستفيدي شي نورس ماعندها اي مرض في جسمها ..غير الحاجه الاكلتا اوشربتا دي (نسيبه اتكلمت بطريقه جادة وصارمة وبرضو قاصدة توصل المعلومة لام نورس)
ام نورس:قومي يانورس نمش ارح يامبارك علي اهلنا

وفي اثناء النقاش الدائر..سلطان دق الباب ومشي فتح عبود..سلطان دخل وماقدر يفسر ش عبود افتكر انو نورس تعبت او جاتا النوبات تاني سلطان مشي بخطوات متسارعه وهو شايل في يدو الهديه..
دقا باب البرندة ووقف مسافه ..عبود قال ليهو ادخل تعال..
دخل سلطان وياريتو مادخل..اتفاجأ بوجود ام نورس وابوها..
سلطان ختا الفي ايدو في التربيزة القدامو ومسح ايديهو بجيوب بنطلونو..وقال:
السسسلاام عليكم ومشي علي ابو نورس ومدة يدو وهو متثاقل الخطي..
ابو نورس قام علي حيلو وبقي يعاين في عبود ..عبود طلع وهو متوتر..واتلفت عم مبارك وعاين لنسيبه..تسيبة ربطت اصابع يدينا مع بعض ودتقرت ماقدرت تتكلم..
ابو نورس:عندك شنو هنا والجابك شنو والحاصل شنو..
سلطان:رجع خطوتين لورا وهو محرج .وقال:كل الخير ياعمي حمدلله علي السلامه..
ابو نورس عقد حاجبيهو ووشو ونهر نورس وامها وأمرم يطلعو حسي معاهو..
طلعو ومشو ولايعلم سلطان في أي ارض نورس...
وصلت نورس البلد وهي كئيبه وحالا لايوصف..
وسلطان لايعلم اي تلفون لنورس ولا اي خبر عنها..اتردد سلطان واتصل بام نورس..ّ
الو:انا سلطان ياخالتي.ارجوك ماتقفلي الخط..ربنا اداكي نورس نعمة واما بنعمة ربك فحدث ..نورس أتأذت بأيدك انتي..انا لو مامقبول عندك ممكن باي طريقة صحيحة تمنعي نورس مني.
ام نورس:انت بتقول في شنو..كيفن أذيتا بآيدي في زول بيرضي الاذي لجناهو..
سلطان:ايوة ياخالتي انتي اديتيها سحر في بطنها والله اعلم نوعو شنو طاهر ولانجس ولا شنو ولاشنو...
ام نورس:ابعد عن حيات نورس ياسلطان
سلطان:ياخالتي ياريت لو كان قلتيها كدة بدل تشربيها وتاكليها العذاب..

ام نورس قفلت التلفون وطوااالي اتزكرت الشيخ المشو ليهو وشكوكا اتاكدت ليها انو هو ماشيخ..بس الجهل كان طاغي عليها...

جا ابو نورس وقال لنورس:اجهزي يانورس الاسبوع الجاي عرسك...نورس مااهتمت للامر لانها في عالم تاني مامتزكرة فيهو غير انها حيه وبتتنفس..لاسلطان ولا الجامعه ولانسيبه...
بعد اسبوع نورس عقد عليها ود عم ابوها ألجا من السعوديه ..
كان زواج نورس وجع لامها وحذن وتأنيب ضمير..نورس كانت تايهه وماعارفه هي بعدت عن سلطان او بالاصح مامتزكراهو ...
نورس زفوها لعريسا وهي ماعارفه عنو اي شي...
كانت سرحانه في جو من زغاريد ودلوكه وغنا.....لما العريس يمد يدو عشان يزفها بتقوم بتثاقل وتتلفت يمين وشمال وكانو شي رايح منها بس هو شنو ماعارفاهو ..ترجع علي الكوشه براها وتقعد وتلعب باصابعا وكانو بتفكر في شئ لا شئ..في وجع غير محسوس..وجع متنقل من القلب الي الجسد..فقدت نورس زاكرتا عن سلطان..عن الجامعه..وعريسا مقرر انو يسوقا معاهو ....

يتبع