ود بلدي💔

11

قلت لابوي..معليش يابا بسببي عمتي شاكلتك.قال لي ولايهمك يابتي الاهم انك هديه ورضيه..
مرة شهر وانا مبسوطة مع سلطان وامي كل يوم تسمعني كلام ..وتراقبني لو بتكلم مع سلطان وبقت مبارياني محل مااقعد عشان اتكلم.وتهددني بالعاقب السنفور😂😂..

سلطان:يابت بطلي الحوامه الكتيرة كفاك اديني من زمنك.ولا لقيتي صحباتك ونسيتني..
انا:انا معقول انساك..كانت مناسبه في الفريق مشيت حتي ولا غسلت معاهم عدة الوجبة عشان نقتك دي .وكمان عشان مشتاقه ليك😊
سلطان:انتي لسه في بيت العرس😠
انا:اي لكن بس العروس تجي ونبارك ونمشي انا ونسيبه..
سلطان:اها طيب ..بكرة النتايج شعورك شنو.
انا:أحييي ياسلطان ماتزكرني وجعت لي بطني ..انا خايفه من مادة استاذ مجذوب جاب مصطلحات صعبه شديد مع اني قريت
سلطان:عندك هديه سمحة لو نجحتي.
انا:عليك الله تقول ياسلطان هي شنو
سلطان :بوريك ليها بعد تنجحي..

وانا بتونس مع سلطان ماشه وجايه علي ماسورة الصيوان  ومبسوطة فجأة عيني تقع علي بت عمتي اسمها راويه..ياااألهي. ..عين كلها شر وحقد..خفت شديد وقلبي اتقبض..
رجعت للخلف لحد مادخلت في زقاق وكملت كلامي مع سلطان وقفلت..
كنت لابسه عباية سلطان الجابا لي وجزمة حلوة لونا نحاسي.وطرحه سودا..انا ملامحي ناعمة ولوني اسمر فاتح.حواجبي غزيرة شديد ..ماحصل شلت وشي بموس او حواجبي..طولي متوسط يعني اقصر من سلطان قصر ملحوظ..شعري ناعم وطويل الحمدلله..ووزني72..
رجعت لنسيبه وقلت ليها ارح انا خايفه..قالت لي اجي ..!!في شنو بخوف بجاي..اشرت ليها براسي لتجاه راويه عاينت قالت لي ليك الحق..اصبري خلاص نخمج حبة دلوكة ونمش.قلت ليها لا سلطان مابخليني حسي حيرجع لي ويلقاني لسه في الجوطة..
رجعنا ونحن في الشارع ..سلطان اتصل..وانا بتكلم وبحكي ليهو الموقف..جا من وين العاقب مارق بعجلتو الله اعلم.بس جا وقف لي قدامي في لحظة..رمي العجلة وجري قبضني من ايدي..
جيبي التلفون دة وكمان في الشارع.اليلا بكتلك يانورس..
انا:العاقب اصبر نحن في الشارع نخش البيت ونتفاهم..
نسيبه:ها جن ها روق مالك قايم كدي.اليشوفك مابقول عشان تلفون بقول شي. تاني وانت عارف الفريق دة مابصدقو التور يقع ويكترو سكاكينو.صر قدومك وخش للحوش واتكلم.
دخلت البيت ونفسي قايم..جريت لامي والعاقب وراي ونسيبه تمسك فيهو..
نطيت في السرير ورا امي وببكي..يمة شوفي العاقب بعمل فيني شنو..
امي:العاقب راجل مابكتل حيلو
نسيبه:شالت التلفون من العاقب بالقوة وسرعه طلعت من بيتنا..
مشا العاقب جاب صوت صغير وبدا يضرب فيني ..وامي مسكتو بعد لقت الضرب شدا..

دخلتت علي الغرفه وانا مبهدله طرحتي واقعه في الحوش وعبايتي مجرجرة وشعري مفكوك..قعدت ابكي براحة .ليه العاقب الصغير يسوي كدي وامي تأيدو..
فتحت الدولاب طلعت محفظتي فيها صورة سلطان صورة فتوغرفيه حقة بطاقة.عاينت ليها شديد وارتحت وسكت..
ناديت اخوي الصغير اسمو النقيب..
النقيب حبيبي تعال(عمرو سبعه سنه)
تعال امشي لنسيبه قول ليها نورس قالت ليكي جيبي العباية وتعالي..
ابيت مابمشي.اديني جنيه حتي امش ليك
اديتو الجنيه مشي

جاتني نسيبه شايله طرحه ملفوفه في ايدا.ودخلت وراي المطبخ.قالت لي هاكي التلفون جوة الطرحة..فهمتك يانورس..
انا:تاني افهميها الطرحه ياهو الشاحن والعبايه ياهو التلفون..لما ارسل ليك تفهمي طوالي..ضحكنا وعملنا قهوة ودخلنا الاوضة
العاقب بقي ماشي وجاي قصاد الغرفه..
اصلا مامرقت التلفون لحد ما طلع يلحق باقي العرس..
اتكلمت مع سلطان ووريتو الحصل يضحك ويقول عفيت منو..

جا تاني يوم ...سلطان مشي علي الجامعه يشوف النتيجه...وانا متوترة وخايفه اشيل مادة مجذوب وابقي لبانه للناس اني اتلخمت من قرايتي..
بعد معاناة من انتظار خروج النتيجة للبورد..اتصل سلطان
وقال نووووووررررس مبروووك جبتي جيد جدا..انا جريت علي امي يمه يمه نجحت ورجعت الغرفه..وانت ياسلطان اها بشرني..لحظة خليك معاي يانورس انا ماشي علي كليتي واشوف البورد قالو لي طلع قبل شويه...
مشي سلطان وكان جايب جيد#الحمدلله واتبسطت شديد وفرحت..
قال لي اها اوريك هديتك الوعدتك بيها...
انا بديت اعمل غرفة نوم بالاقصاد
انا فرحت شديد وحسيت انو حلمنا بدا يتحقق ..وانو سلطان بدا يجهز ..
يانورس انا مشيت لنجار شاطر واتفقت اديهو كل شهر قروش لحد ماتكمل الغرفه واشيلا بعد القروش تتم..وقلت ليهو شغلك يكون نضيف ماشغل معرض وقشرة..يكون متين ويبقي للابد زكري ...
وانا في السوق يانورس عجبني طقم عشا .صاحب المحل زميلي اتعرفت عليهو زمان في السوق اداهو لي علي قصدين.وراجل خالتي قال بزيد لي المرتب وبديني في كل نهايه اسبوع حافز...
فرحت شديد انو سلطان عايز يبسطني ويبدا معاي حياتو..
..قفلت منو جاني رصيد بميه وخمسين .لسه بعاين في رسالة الرصيد اتصل سلطان..امشي اشتري حلاوة فرحي الشفع..قلت ليهو وكيس مخصوص للنقيب عشان المرسال...

سقت نسيبه ومشيت البوتيك الفي الفريق واستريت ليها كريم ترطيب هديه لانها صحبتي حبيبيتي ونعم الانسانه..واشتريت لي قميص بيت ورجعت..
سلطان قال لي خشي الفيس بتلقي صورة في الخاص افتحيها..لقيتو متصور فاتح طقم العشا ومصور لي الطقم كلو واضح..كتب لي ..ده نعزم بيهو ابوك وامك لما نخش بيتنا..ضحكت شديد واتخيلنا كيف حيكون متبخنا ووضعنا..
سلطان والله مستعدة اعيش معاك في ابسط شي.ماتتعب نفسك كدة ياسلطان ..تلاقيك مابتشتري ملابس ليك..
قال لي تصدقي ملابسي بغسلم وبرجعهم في نفسه خط المكوة الكويتيها عشان ماتروح...وفي قميص ماعايز افكو والبسو عشان ريحة المسك الفيهو..وتوبك..مابنوم لو مااتغطيت بيهو..
مرة يانورس لقيت خالتي لابساهو وطالعه الحي..وانا كنت خليتو في السرير وطلعت مع. زوجها السوق ..جيت لقيتا لافحاهو وماشه الحي ..جريتا..وحنستها تجيبو وخالتي تضحك.ادتو ليك نورس صح..ظاهر ماشفتو قبل كدي في بيتكم..
يتبع...