ود بلدي💔

23

اصبح الصباح وسلطان ماغمض ليهو جفن..ورجع اتصل بعبود..ياعبود نورس مارجعت ليكم..
عبود:تعال ياسلطان نمش الداخليه ومعانا نسيبه تخش ليها وتجيبا ونشوف الحاصل..

وصل سلطان لعبود وركبو العربيه ومشو جابو نسيبه واتجهو علي الداخليه...
دخلت نسيبه ولقت نورس تعبانه شديد لدرجة انها ماقادرة تفتح عيونا..نسيبه تهز في نورس وتناديها..نورس نورس انا نسيبه اصحي يانورس ..افتحي عيونك انا جيتك..مالك يانورس ومسكتا من ايدا وبقت تمسح كفها لنورس...
اتلفتت سألت البنات :نورس مالا
ردت وحدة انو نورس عيانه وابت تمش معاهم المستشفي وماردت علينا عشان تدينا رقم نتصل لاي زول يجيها..
نسيبه:نورس انتي محمومه ووشك شاحب قومي نمش المستشفي
نورس فتحت عيونا وسالت دموعا بجانب عينا اليمين ورجعت غمضت وأشرت لنسيبه بيدها(لا)
نسيبه بقت تبكي وطلعت كلمت سلطان وعبود بحالة نورس وانو لازم يمشو بيها المستشفي..
رجعت نسيبه ومعاها المشرفه والبنات وسندو نورس ولبسوها العبايه وسندوها لحد الرسبشن عشان تمش المستشفي..
استلموها سلطان وعبود من البنات ووصلوها العربيه
سلطان اتهجم بمنظر نورس والحمة ونظرات نورس المتعبه وتحركا اليائس..سلطان قال:
انا الجبتو بأيدي الوجع لنورس..
لما صفعت خدها بالفراق اتجرس...
لما سمعت  ابعد مني ماتبراني
ولما افكاري بكرهك علي اتلوث
اريت شريان يدي وقفت قبل صفعانك
واريت كفي اليمين اتغوس...
لو العافيه تتشال لجسد اخر
بديك روحي وبشوفة شفاك اتنفس..

سلطان ندم انو ضرب نورس واعتقادو انو هو السبب في مرض نورس..
بس السبب جهل امها الفاكرة انها بتشفيها بس أمرضت جسد نورس بالسحر والشعوذة...

اتجهو علي مستشفي الخرطوم وعملو جميع الفحوصات اللازمة ونورس مرقدة في الحوادث بجرعة دربات للهبوط والاغماء..
طلعت النتيجه انها سليمة وعندها انخفاض في الدم ..دمها كان ضعيف..
نسيبه كانت موازراها مافارقتا ..وسلطان وعبود مابين المعمل والصيدليه والدكتور والعنبر ذهاب وآياب..
طلعت نورس مع نسيبه في بيتم ..واتصلت ع امها وطمنتا انها كويسه..وفهمت ابوها انو تلفونا ضاع وحتتصل عليهم من اي تلفون ..

سلطان بقي يطمن علي نورس من بعيد لبعيد في تلفون نسيبه..وخايف يتكلم مع نورس تصدو معتقد انها زعلانه من ضربو ليها وفي نفس الوقت خجلان من تصرفو

لكن نورس كانت غير كدة..نورس سرحانه في عالم تاني..حتي سلطان مامفتكراهو ولا علي بالا.....

نورس بعد كم يوم اصرت انها ترجع الداخليه لانها بقت كويسه شويه..
نسيبه اتصلت علي سلطان وكلمتو انو يجي يودي نورس الداخليه لانها امكن تخجل انو تكلف زوجها عبود يوصلا..ودة كان تصرف من نسيبه من ورا نورس..

نورس بدت تجهز عشان تمشي الداخليه
جاتا نسيبه تشغلا شويه لحد ماسلطان يوصل..
قعدت نسيبه تشغلا بالكلام وشويه تفرجا في البوم ويتناقشو وشويه تفرجا علي ملابس وشويه تضحكا وتحكي ليها ايام البلد لحد ما الباب دقا..

فتحت نسيبه واتكلمت بهمس مع سلطان انو يتعامل بسياسه مع نورس
ومشت نسيبه تجهز اكل في حافظات لنورس عشان تشيلا معاها الداخليه...

دخل سلطان ولكن كان واقف مخفي جمب الباب ومتردد يخش لنورس..

وقف سلطان مسافه وهو بعاين لنورس بتتفرج في البوم صور..

سلطان:
أشرقي من جديد كل الورود الزبلت..
وافتحي رؤيتك المن سماي اتقفلت..
ماأنتي الحياه الجوة النبض ياغاليه
من دونك دماي جوة الوريد ماوصلت...

نورس حست بحركة اتلفت لقت سلطان طوالي ربطت وشها وحست بضيق شديد سلطان بقي ليها زي شيئ مخيف او شيئ كريه او شئ لايطاق بالمرة..
نورس قامت ومتجهه للباب بانفعال تعلو به شهقات وزفير بصعوبه..

سلطان :
ياروحي انا جدا بتاسف
لاني عليك مديت الايد
ماعرفت ببعدك اتصرف..
ندمان ومقطع بالوجعه..
ويوماتي عليك انا بتحسف..
انا تهت بقولة ابعد فوت..
القلب بفرقاك اتخلف...
يانورس شيلي كفوف راحتك
واديني بايدك مليون كف..

نورس لزت سلطان بقوتا كلها عن الباب وقالت ليهو...:
ارجوك لاتنطق ولاكلمه..انا بكره فيك ليوم الدين...بكره صوتك بكره رؤياك بكره مسعاك وانا كرهي عليك ديمة في تحسين..
انا بكره يومي الشفتك فيه واذيد الكره كمان تلحين...انا بكره ياخ حروف اسمك وانا بكره فيك باكر والحين...انا بحرق حبك بكرهي وبالكره اذيد النار بنزين...وانا بقلع زاتك من جواي زي قلع الشوك من جوه الطين..تفتح فجوات جرحك جواي واصبح جواي حبك تغبين...انا شلت الكره وزدتو اسف والكره اليلك اكبر  تهجين...
لاكفي بزيل ألمي المنك لا السن بالسن لا العين بالعين..
وقعت الكلمات علي مسمع سلطان نيران من سجيل انخرت قواه التي باتت ضعيفه..
طلعت نورس متجهه علي باب الشارع. بس لحقتا نسيبه ومسكتا من كتوفا...
نسيبه:نورس انتي نصيحة نورس فوقي فوقي اصحي وين وعيك ورواقتك وهداوتك
نورس:وعيونا ملانا شرار خليني في حالي يانسيبه فكيني وبدت تصرخ وتقاوم نسيبه
نسيبه:نورس قولي بسم الله نورس وحدي الله واقيفي اضبطي اعصابك
نورس:انا انا انا ....ووقعت نورس تقاوم في تنفسا بصعوبه وجسمها ينفض ومحموم
صرخت نسيبه ومسكت نورس قبل تحصل الارض بمسافه قصيرة...
جا سلطان وسند نورس مع نسيبه وقعدوها في كرسي..

سلطان طالع متجه ع الشارع شان يتصرف بعربيه
نادتو نسيبه:لالا تعال ياسلطان نورس مرضا مامرض مستشفي. نورس لازم نوديها لمركز تتعالج بالقران..نورس عيونا فيها شي بدل علي كدة..
سلطان:كيف يعني مامرض مستشفي شوفيها محمومه كيف وتنهد متضايقه...
نسيبه:اصبر خليها تروق وانا بتصل بعبود يجي يودينا باقرب فرصه....

يتبع