ود بلدي💔

3

رديت بعد الجرس التالت وانا خايفه هو عايز يقول شنو..
السلام عليكم بت مبارك.
اهلين سلطان
كيف الجامعه والداخليه والمصروف.
الحمدلله ياسلطان بس فرقت معاي البلد شديد.
حنرجع يانورس ان شاءالله. .
سكتنا قريب خمسه دقايق..
وسوا اتكلمنا نورس..سلطان..
قال لي اتفضلي اتكلمي..
انا:انت متصل من زين لسوداني بسحب رصيد كتير معليش ياسلطان..
هو:ولايهمك انا راجل وبدبر نفسي
اناشغال في سوق ام درمان مع زوج خالتي باقي اليوم لحد الساعة اتناشر باليل.
انا:الله يعينك ياسلطان..
هو:لو احتجتي لا اي شي انا موجود وربنا كريم
انا :تسلم ربنا يزيدك
هو:انا يانورس يتيم الام وابوي ماف شغال في بلد تانيه عندي اخت وحدة واخوين اكبر مني واصغر مني.ابوي اتزوج قريبتنا وقاعدة تربي اخواني..انا دخلت الجامعه بعد معاناه من فراق امي.كنت مجند في منطقه خلويه بعيدة ماف تلفون ماف تواصل .لما اتوفت امي تلاته يوم انا ماعارف ..كنت حاسس باني مكتوم ومشتااق لامي.اخر مرة وانا جاي الخلا خبزت لي خبيز وادتني غطا وودعتني لحد المحطة.جاني القائد سلطان تعال برة.مشيت قال لي عندك كم اخو رديت كدة كدة..سالني كم سوال رجعت فلت لزوم بيانات او شي.تاني ناداني مشيت سالني كم سوال ورجعت.المرة الاخيرة لما ناداني قلت ليهو في حاجه سيادتك لو في شي انا مؤمن بقضاءالله وانا قوي.قال لي اجهز بتجيك مروحيه تنقلك للخرطوم ابوك منتظرك ترجعو البلد البقاءلله امك اتوفت..
حسيت اني مدفون في ضباب تقيييل ودايخ ماحسيت الا وانا في مروحيه.ايوة مصحصح بس عقلي المعاي الكلام دة ماحقيقه او حلم او واو واو...وصلت البلد لقيت امي متوفيه ليها تلاته يوم..كل الفريق بكا من جديد..
فقدت امي وفقدت حنانا.قفلت باقي تياب امي في شنطة عشان ريحتا ماتروح.وادعي ليها ليل نهار.
انا لقيت دموعي بتنزل بكيت علي ام سلطان وعلي موقف البت معاي وعلي شوقي لامي.سمعت بحة في صوت سلطان وهو ببكي.رديت ياسلطان امك حباها الله وهي في مكان احسن من هنا وكلنا حنموت وراجين يومنا..
هو:يانورس حافظي علي صلاتك علي دراستك علي زاتك ..انا عارفك انتي بتقدري تتعدي سنين الجامعه وانتي ناجحه بس ماتتاثري بظروف الغربه دي وابقي قويه..
بكيت بكيت بصمت وانا بقول نصيحه غاليه في زمن رخيص..شكرا ليك ياسلطان ..
قفل الخط .وانا حزينه علي انو سلطان بكي واسترجع احزانو.وفرحانه علي اني لقيت سند قوي وطاهر واصيل..
قمت غسلت ملابسي ورتبت سريري.
جاتني رساله من سلطان(شكرا ياالله لان العوض ياتي منك جميلا..نورس ابقي امي واختي ورفيقتي امد الحياه)..
قريتا وانا ببكي من جديد.رديت(ياسلطان ربنا يجعل كل الخير)..
مشيت علي الحوش اشوف شاحني وين ..لقيت البت الاتشاكلت معاها جايا علي قربت علي.وقفت وعاينت في الارض وانا مربعه ايدي .قالت لي نورس .رديت نعم..انا اسفه يانورس..قلت ليها ولايهمك عادي يا...ردت اسمي روعه..ولايهمك ياروعه.حضنتني وبكت قالت انتي بالجد انسانه طيبه.ماكلمتي المشرفه اني معاي زول برة وصلني.انا اتاثرت بيكي يارونق وحبيت اتغير.بالجد انا ماحصل صليت ولايوم بس لقيت الفرق بين اخلاقي واخلاقك.قالت لي تعالي اعزمك علي قهوة من البوفيه اعتزرت اني مابشربا ومشيت..حسيت اليوم ده كلو بقي انتصار لي..بعد بكيت بقيت سعيدة..
بقيت امشي الجامعه وانا وسلطان نتقابل في المكتبه نزاكر ..حتي الفي الرابطه ماحسو بعلاقتنا لاننا بتجنب التعامل باسلوب واضح وصريح .تعاملنا بالوصيه لبعض.نتنافس في القرايه.نقعد في المكتبه نزاكر.يطلع يجيب فطور ويقعد في استراحة المكتبه يفطر وافطر انا بعدو..يرسل رساله في زمن الصلاة تزكير..واستمرت ايام ونحن بنتعلق ببعض اكتر..
يتبع