ود بلدي💔

البدايه

انا نورس مبارك من النيل الابيض امتحنت ثالثه ثانوي بنسبه 82,5ادبي..كانت الدنيا بخيرا .كانت القرايه هدفنا لا نت لا واتساب كنا بنقيل في المدرسه وبالنا رايق..بالنا رايق من القروب الفلاني .ومن الزول الفلاني.من صفحات الخلطات والوهم والاشاعات وصور منافسات البنات في الجمال..كنا بنقرا باطمئنان انك حتنجح باذن الله.لااستاذ خصوصي ولا مزكرات خاصه.نقرا المنهج بنحكو حك بقلم الرصاص ..لبسنا محتشم لافيهو تقليد ولا قص ولا زيادة..
قدمت لجامعه في الخرطوم واتقبلت في كلية الاداب ..
انا كبيرة البيت،امي ربة منزل وابوي مزارع بسيط،لمي لي حبة قريشات وطمني اني مااشيل هم لبكرة،ودعتهم وسافرت علي الخرطوم.
وصلت الخرطوم واستقبلني ود عمتي كان شغال هناك في سوق ام درمان .سجل لي في داخلية(....)قريبه للجامعه.
لاقيت البنات واتعرفت عليهم من مختلف الاقاليم ،ومن اول يوم في الداخليه اتعلمت الكسل،حوشنا الكبييير الكنت بقشو صباح ومسا ماف..ولا عواسه ولاحمام الشفع..ولاواجب المناسبات..ولاغسيل هدوم اخواني البهد الحيل وبهد صابون الدكان..
نمت وانا مقبله علي يوم جديد..
ومشيت الجامعه الصباح وانا لابسه عبايه سودا وطرحه سودا وشبط جابو هديه لامي من الحج بس طلع من نصيبي..وامي اشترت لي تلفون سوداني الكان طالع بميه جنيه داك لونو فضي ..اول مادخلت حوش الجامعه عملتو صامت عشان مايصادرو مني🙈.دخلت الكليه علي معرفه اني جيت وسجلت اجرائتي قبل كم يوم..ومشيت البورت وشلت الجدول لقيت اعلان انو نسجل في الرابطة بتاعت المنطقه .قلت خلاص احسن اتلمي مع ناسي البفهموني وافهمم.حضرت محاضراتي،ومشيت علي مقر الرابطه بعد جهد جهيد وطشاش اخش بباب واطلع بنفس الباب ع اعتقاد انو مدخل تاني..لقيت شباب وشابات سجلت عندهم ..ولفت انتباهي شاب محترم منعزل بقرا في كتاب اظن محاضرات..قالو لي في اجتماع يوم التلات بمقر الرابطه نشوف الطلاب الجدد واحتياجاتم ونوريهم الجامعه ..مشيت الداخليه .صليت العصر وبس رقدت.لقيت اتنين بتشاكلو بالضرب .وانا سريري فوق (دبل بد)خفت شديد من الوضع والضرب وبقيت ابكي اتزكرت ابوي وهو راجع عايز الغدا وفتران وامي واخواني وبيتنا.وصراخ البنات يعلي وانا ابكي بصمت..يارب تعدي سنيني علي خير ..ونمت وانا دموعي علي خدي ساااخنه ولامعه..صحتني بت للمغرب واتعرفت عليها انها من الجزيرة ومشينا البوفيه واخدنا اكل طعمو طعم الهم الراكز كيف انا انجح وارجع ليك يايمه انا زاتي..لااتغيرت ولافتشت دروب بتغير من ماساتي..يمة ويابا انتو القدوه وانتو دعاي في كل اوقاتي.. .ما زي اكل امي الطاعم المسبك.اكلت وحمدت الله .وكانو معانا بنات هاي كلاس غرف خاصه وشامبوهات وعطور وتلفونات هاااي.حتي الكلام كيف كيف..تجي فايت جم الغرفه برودة المكيف تصقع..وانا بيني وبين العنكبوت شبر..
الصباح كلنا بنجهز للمحاضرات وين شبطي وين طرحتي..الله يقصها فلانه غسلت العبايه وبقت ستها والشكله تدق والدعا زي الحنضل...وانا منبهرة من الوضع ولسسسه مااتبرمجت عليهم...مرة اضحك ومرة اسمع في اللهجات الذيذة والبنات الظراف.مشيت الجامعه وقبل اخش لقيت كشك صغير متلمين فيهو بنات ..ده شنو ياربي .اخدني الفضول وقبل امشي عليهو ..لقيت مكتوب بفوق..الخلطه الجديدة( ندي القلعه)..وخلطة( زي القمر)ويوجد فتمينات للشهيه..اهاا اتزكرت امي(مامعفياك يانورس كان مسحتي في وشك الناير ده فير بس)رجعت علي البوابه ولقيت الحرس خاتي في التربيزة علبة مناديل فاين..اي بت داخله متمكيجه يديها منديل وبنهرة امسحييي وشك جايه بيت عرس انتي💂ايوة الدنيا كان بخيرا...ههههه انا حسيت بثقه تااامة اني بمر لاني حتي الفير فيهو عفو امي..عاين لي واداني مرور.مشيت الكافتريا عشان افطر ولسه محاضرتي..عارفين سندوتش الطعميه بخمسميه قرش..والبيرقر بتلاته جنيه.انا مشيت طوالي علي الطعميه وشلت سندوتش وقلت يسمني بيرقر وابوي تعبان وعرقان بهناك واخواني ماضاقوهو .شن عرفني لحمو كيفن هناك فرموهو😂...اكلت وطلعت علي الكولر المويه سليقة شربت وقلت اخير الصهريج البجينا كل يومين.مويه الكولر نار الله فيهو القايدة..يقرك من بعيد يلمع بلا فايدة....مشيت الرابطه لقيت بنات من منطقتنا بس مابعرفهم وشكلهم في تانيه وتالته رحبو بي ووروني برنامج الرابطه ..حضرت المحاضرة وطلعت ركن نقاش بجاي وركن نقاش بجاي شعارات وهلوسات وجوطه وكوراك ياربي بدفعو ليهم كم يفتحو حلقومم كدي ويكوركو بحب الوطن احزاب وانشطارات باسامي مزيفه..اها قبلت كدي لقيت نقاش داير بين شله بنات وولاد ..بقول ليها بقيتي مابتصافحي عاينت للبت المقصودة بالكلام لقيتا لبس اختشيت منو انا ومكياج اللهم لا اعتراض .يعني حاجه مابتتوصف واللبانه تلعب باتجاهين بسرعة 180..وقالت ليهو اااي مابصافح..شكلها فاهمه الدين غلط.الزي ديل كان بفقعو لي مرارتي الواااحدة..
اتوجهت ع اجتماع الرابطه وقعدنا واتناقشو وجزبني نفس الشاب بكلامو المنمق وانو نحن البنات همهم وبخافو علينا وعينو في الارض.ولما عرف نفسو اسمو سلطان.كان حديثو ساخر وفيهو شي من القوة والثقه والاحترام..بالجد اتمنيت كل الشباب يكونو زيو.
وانا شدني انو مابحرك شعور اي شلليات فيها بنات ولا اصحاب.صاحبو الكتاب والشيت..كان فيهو غباش ماهبشو جل ولا كريم.قميصو جااادي..محور كلامو بدل علي انو صارم..
مع الايام والجامعه والرابطه اتعرفت عليهو اكتر..
مرة المسا وانا بنقل في المحاضرة المالحقت اكتب مع الاستاذ..انا يدي مابتتلم مع تركيزي في المحاضرة..جاني اتصال من رقم..رديت ..

الو..
انا:مرحبا
انتي نورس
انا:ايوة
معاك سلطان..
😨😨😨😨😨انا في جواي اتحرك انسان..
هو قال سلطان ...?
بالجد سلطان..?
امكن غلطان..
لا لاهو عارف نورس ودق عشانا..
فما غلطان..
مرحب سلطان..
مين سلطان..
وانا راااخيه وسامعه👂
انا ود بلدك معاك في الجامعه..
الو
الو
الو
الو المره الرابعه ..
طلعت الحوش ونعالي لبستها بالقلبه..
وقعدت مسهيه في العتبه..
الطرشه الهبله البت الشطبه..
واتزكرت الخط فاتح...
وانا فكري بعيييد سافر سارح..
سلطان الادب الفيه بتوزع في الخرطوم.
صوت زول مسؤل انسان ناجح..

ايوة معاك نورس اتفضل..
والخجل الفيني كمل حيلي ومافضل..

يتبع..