ود بلدي💔

17

ام نورس شالت الليل نقه وكلام مع نفسها..لما صبحت الصباح اتوجهت لبيت عواطف..

ام نورس:الحقيني بشيخك دة سرعه انا تعبت مع نورس بتي خلااااص..نورس ماواعيه لاي شي غير الممحوق سلطان..تصحي الصباح وعيونه حمرااا ومورمه من سهر التلفون..وكمان جايبه صاحب سلطان عريس لنسيبه...الحقيني ياعواطف حلفتك بالله..

عواطف:كدي روقي واقعدي في البمبر دة واكلي معاي ملاح نعيميةحسي سويتو..

ام نورس:أكل شنو وانا خشمي حنضل حنضل خليني افضي من الموضوع دة..نورس ماياها بتي الكانت بتقعد وتتونس معاي بقت يامع نسيبه ياجوة الغرفه..ومن اخش عليها الغرفه القاها داخله جوة باب الدولاب وواقفه زي الكمساري..
عواطف:هههههه ضحكتيني والله.دة الحب وعمايلو..انتي فاكرة الشيخ دة بمشو ليهو كدة بالساهل ...لازم مواصلات ولازم بياض...

ام نورس:عندي قروش صندوق كنت رافعاهن لسفر نورس ..ارح نمش بيهن وبعدين الله كريم..

عواطف:خلاص نمش بعد عقد نسيبه ..عشان مايفقدونا في خدمة الخبيز ونضافة الخدار.
المشوار دة عايز يوم كامل لازم تتصرفي بعزر لمبارك من حسي..
ام نورس:مبارك هين ..ألا سلطان دة مااااهين ياعواطف..الولد أكل راس البت زي السوس..

اتفقت ام نورس مع عواطف وطلعت..

بجانب سلطان وعبود..سافرو الخرطوم وجابو قروش سد المال وباقي اهل عبود في بص سياحي ..ولوازم للعقد..

بكرة صابح عقد نسيبه...ابو نسيبه ضبح عجل كبير وبهيمتين وجبة فطور تكون لاهل العريس والفريق...
باليل والحريم شغالين نضافة خضار عشان يدوها الطباخ..وقاعدين في صيوان العرس جوة الحوش في مفارش الارض..
عمة نورس قاعدة وتعاين لام نورس من بعيد وتجرحا بكلمة وكلمتين...وفي ده كلو ام نورس خايفه من العمة تسمع بخبر العريس صاحب سلطان..خايفه من ام العريس باكر تشرح للناس..
ام نورس:تتكلم جوة نفسها(الله يستر من ام العريس النضامة باكر تقع علي الحروم تعارف وحماتي الطريشه دي ماتصدق تلقالا عواسه تعوس بيها الفريق..) ها بت يانورس تعالي دايراك..
نورس:أصبري يمة نرص عدة الجمعيه في حوش الطباخ ونجيك..
عمة نورس:بتك المسنوحة دي مالا مابتسلم ولاعشان انا بقطع في البصل خلتني وفاتت.بتك دي من لقت ارياح الخرطوم اتعلمت رفع نخرة تاني..وحتي المشيه كيفن بقت..وبتلقي العبايات البتلمع دي وين..ماشبه مجيب ابوها المجلدن..
ام نورس:بلعت ريقا بببببسم الله كيفن ماسلمت عليك ...ححححسي تسلم عليك.
تعالي يانورس انا بنده ليك خلي الفي ايدك وتعالي😠😠
نورس:اها يمة حبيبتي جيتك
امها:لشنو يابت مابتسلمي علي عمتك.
نورس:وينا عمتي يمة.والله ماشفتها..واتلفتت نورس جاي وجاي لمحت عمتا ..جرت عليها ونزلت علي ركبيها وقعدت حضنت عمتا وباستا في راسا...عمتي كيفك.وحات الله ماشفتك..الحريم كتار وانتي وسطن مافرزتك..اعفي لي والله ملخومة مع البنوت.مشي وجيه وعدة وبنجهز في خبايز العقد والحلاوة..جيبي ياعمتي اقطع حبة بصل ..كفاك ياعمتي بتجرحي يدك انتي عندك سكري ماكويس معاك..
جات ام نسيبه:لالا تعالي يانورس نسيبه عايزاك تكوي ليها شعرا وتجهزي ليها التوب والغوايش..
مشت نورس علي نسيبه..

وجات بت عمة نورس رويدة لو متزكرنها..ودخلت جم نورس والعروس والبنات قاعدين كتار ..بدت رويدة تجدع في كلام بجاي وجاي..
رويدة:الوحدة كيفن تعرس زول لا اصل لافصل وكمان عقد بسرعه كدة..خايف تسالو عنو ولاشنو?هههههههه..وكمان خمستاشر اليلا العرس..هااامله كدي هي..
نسيبه:لو سمحتي يارويدة ماتدخلي في اقسام ربنا..وانتي في بيتي ماعايزة ارد عليك سلفا انتي عارفه طعم لساني👅وعارفه طعم يدي✋فابلزوق ياتساعدي البنات..ياتقعدي فراجه بادبك..🙅🙅🙅
نورس:😒😒😒😒😒😒
البنات:😨😏😔😱😁😠😞

رويدة:المفروض يانورس تدافعي لبت عمتك كان فيك اصلا خير..وماتقعدي صامته وتتفرجي..
نورس:أن جيتي لقول الحق يارويدة انتي غلطانه وماصح منك تقولي كلام مامنو فايدة..ايوة صح انتي بت عمتي وانا فيني خير.وعشان الخير دة بقول ليك الله يهديك ماتجيبي المشاكل لروحك..
رويدة:وكمان واقفه في صفها..رويدة قامت وبصوت عالي...ايوة نسيبه فاتحه ليك بيتم تكيه لصياعتك..تجي وتندفسي هنا باالساعات عشان تكلمي الاولاد بالتلفون ويحولو ليك رصيد تبيعي وتخشي بوتيك صديق ..خايفاها تفضحك لو مادافعتي عنها يعني..
نسيبه قامت زي النار :هووووي يارويدة .....وقاطعتا نورس.:لالا يانسيبه انتي عروس اقعدي واقصري الشر..يابنات بقول ليكم كلم انا عندي زول واحد بس سلطان ود الجعفري..وماف غيرو ..ايوة بتكلم معاه بالساعات وماف وحدة فيكن مابتحب وتتكلم..واصحح ليك معلومتك يارويدة امشي اسالي اخوك عوض من سلطان ...
وطلعت نسيبه ونورس ومشو بيت نورس وقفلو القرفه وبدت نورس تكوي لنسيبه شعرا وهم بضحكو وبتناقشو في تصرفات رويدا..

صبح الصباح..نورس ومعاها بنات خالت نسيبه قشو الحيشان وفرشو الملايات وولعو البخور في كل البيت وجهزو محل اهل العريس ..ومشو استحمو وغيرو وجهزو
وفي كل التفاصيل دي نورس وسلطان بالتفون مع بعض..نورس موصله سماعه التلفون وبتلف الطرحه وبتتكلم معاه ولما يجي زول بتسكت ..

نسيبه:عليك الله يانورس البسي فستاني الوردي دة بجي حلو معاك..
نورس:لالا عبايه بس.سلطان قال لي الاسود يليق بكي..ضحكو واتجهزو وقعدت نسيبه في الغرفه بتوب زهري لامع ومكياج جميل هادئ..كانت انيقه وحلوة..
لبست نورس عباية وطرحة سودا لامعه..وبدت شغاله مع البنات في وجبة الفطور..

جا البص باهل العريس..وصفارة البص ماليه الفريق ممزوجة بزغاريد الحريم..طلعو الحريم استقبلوهم بريحة فلير دمور.ومبخر بخور تيمان وعدن..

مشو الرجال العقد في الجامع..وكانت هناك المفاجأه لابو نورس...
يتبع..