ود بلدي💔

10

في جانب الديوان...
ابوي اتفضلو الدار داركم..
عم سلطان..انا اسمي حامد الجعفري العم الكبير لسلطان.ودة محمد الاخ الكبير لسلطان..اخوي ابو سلطان متغرب لظروف عمل وكلني اني اجي مع سلطان.وسلطان كلمني انك عندك علم باساس الموضوع..ممكن اتعرف بيك ياود عمي..
ابوب:انا مبارك عبدالله الهادي..من قبيلة الهادياب...مزارع والحمدلله عندي اولادي اكبرهم نورس..
اتشرفنا بيك..قبيلتك من دهب بنسمع بالهادياب كتير
.سلطان:جيتك ياعمي واملي فيك بعد الله كبير..
ابوي:ياولدي صلاتك وايمانك. واخلاقك.وسعيك.مؤهل قبل تقول..وعايزك تشيل رهبة السؤال دة من عاتقك عشان دي الاصول..
سلطان:ياعمي والله انا بقرا وبشتغل وبعد اتخرج اول عام من التخرج اتم زواجي بمشيئة الله.انا بيتي جاهز في الفريق وبأثثو باذن الله..واوعدك مااقيف عائق في طريق نورس لاي مطلب وحلم..
ابوي:الفيها الخير بتتقدم
انا بديك كلام ياولدي من جيهتي انا ماعندي مانع انت ود دكران والله .وبقيت قدر كلامك.
اول يوم اتقدمت لي بعد قفلت منك الخط جاني تلفون من ودعمتها وقال عايز يخطبا لتاجر في ام درمان..انا وريتو انو سبقك زول واديتو كلمة وموعد..وللان ماوريت امها بالعريس الجابو عوض....
سلطان حسي انو انتصر في معركه كبيرة خالص..حسي انو مهوي من الارض وعايز يطير..
ابوي:ونورس امانه في ايدك وهي في الجامعه.تصونا جوة عيونك انا وثقت فيك اكتر من اديها لصاحب ود اختي..
سلطان وابوي والضيوف اخدو زمن ...وانا قربت ألد تيمان بالخوف...وامي بس قاعدة وخاته يدها في خدها...😒😒
اقعد اقوم اقعد اقوم اتاوق بالباب ماف شي برة..ونسيبه بقت تنضف في المطبخ..
المغرب اذن وفرشو المصالي في الحوش وصلو جماعه واستاذنو طلعو..
ابوي جا قال لي مبروك يانورس انا اديتو وعد بس بدون ختوبه وموضوع..
جريت علي تلفوني لقيتو كاتب(انا في نهاية الشارع وقفت عمي واخوي قبالة الظلط وراجيك)ناديت نسيبه.. وامي ملهيه بتسمع في ابوي..
سرعه سحبنا الشنطة ومرقناها براااحه .
نسيبه مشت وصلت لسلطان وادتو الشنطة وجات براحه دخلت غرفتي وانا بديت اصلي المغرب..
امي برة تنقنق ليه مابتاخد راي هي برضها بتي زي مابتك..
ابوي ضحك وقال ليها.ديل جوني راجل لراجل..
صليت ولقيت نسيبه فتحت كيس الهدايا كبير.الشمار حرقا اكتر مني وماصبرت اني اصلي😘فتحتو لقت علبة شكلاتة وعبايه وتلفون C3وكريم دوف مع صابون وعطر شالز.وكرت مكتوب فيهو(لا اعلم الغيب..لكني اعلم ان دعائي سيغير الاقدار وان الله لايخيب امانينا وسيجمعنا علي خير ياوجه الخير ...مجنونك سلطان)..
ختيت كفوفي في وشي وبكيت شديد.. ..ونسيبه تبكي معاي.وتضحكني.شفتي سليمان يجي من الدهب فتيلة جرسلين ساي مابجيبا الناشف المقحط..ويقولي شنو اصبري قرب مترين ونلقي الدهب.تلاته سنين يحفر ساي زي الارنبه...
اتصلت لسلطان..قال لي مبروك ليك ولي ومن اليلا دي انا بعد ابوك الحكم2سمعتي ياوليه?
اي سمعت يا ضلي وضراي..
ان قلت لي اقعي البحر..
بقعو واخوض النار براي..
امرك مطاع ياتوأمي..
انا لالا ابدا مابقول..
انا نطقي ليك حاضر وآآآي....
...
نورس قهوتك كانت مزاج...
شالت توتري فتحت جواي نفاج..
سكتت زحام الخوف جوااي
جاني السكون جوة ارتجاج..
مايحرمني منك الله يوم..
ياأم محمد وام ريتاج...

سلطان..حبيبي
لمحتك بعيد تصلي الجماعه..
قمر جوة حوشنا مطبوع طباعه..
فرحت ومشيت ع غناعه..
اول مراكبك بسطت شراعا..

نورس..عيوني..
كان تدي سلطان بالصدفه طله..
تلمي  المصالي الدعيت فيها لينا
امكن اشوفك عسي او لعلي..

سلطاني..
كفاية اللمحتك ونورك أهلأ..
شالك المطرز خلي قلبي جلا..
ولا فيك مهندم لبسة ع الله..

نورسي..
خلاص حسي برجع اطلعيلي يلا..
هوووي ياسلطان يلا فوت يفتح الله...😝😝

وتاني اليوم الكلام عرفوهو الفريق جت عليهم..
وعرفو انو عمتي دي دجاله بشهادة..

بس امي ماسلمت من نقتها وطعينا بالكلام فلانه وفلانه..
سلطان بقي مسافر راجع الخرطوم.بعد باكرّ..
بقيت مبسوطة شديد ومصاحبة ابوي شديد..
يشاغلني ويتونس معاي..
مرة قال لي سوي شاي ..جبت ليهو الشاي بكبايه القهوة الصغيرة..
كورك لي في المطبخ..ها نورس هاا عووووك..الشاغل بالك يتهنابو..

امي:بقيتو عندكم كلامات بيناتكم تعرفوها براكم..
سلطان علمني تنشيط النت وعمل لي صفحة في الفيس باسم ام ريتاج .وصفحتو باسم نورس العشق...
بقيت اتونس معاه وينزل منشور ويعلق واعلق ونتناقش..
سافر سلطان الخرطوم.وقلبي سافر معاهو تاني تلاته شهور مابشوفو..
بقيت امشي بيت نسيبه عشان اتونس معاهو براحتي..
العصريه جات عمتي البيت..
لشنو يامبارك تتفق مع رجال بدون تشاور اخوانك.
رد ابوي:لما يبقي وقتو بنشاورم.
عمتي:اللحس مخك شنو يامبارك عندو شنو ود الجعفري غير كتابو شان تدي بتك ..
ابوي:عندو قرة صلاه في جبينو تلمحيها من شارع الخليل..(شارع بعيد من بيتنا )
عمتي:مرتك الدلاهه دي فايدتا شنو ماعرفت تربي بتك وتعقل مخك
ابوي:ام اولادي ماتغلطي فيها ماكفاك ظالماه طول عمرك..ظلمك دة مابأنبك لدقيقه وراسك في المخدة..انتي الجنياتك بجننوك وبخلوك تكوسي المشاكل في الفريق.يملو راسك وانتي تلفحي توبك وتشيلي وش الفساله
انا طلعت جيت من الغرفه
قلت ليها عمتي..اتفضل اقعدي واقصري الشر..ابوي بريدك ولازم تاخدي بخاطرو مش تحذي في خاطرو.وياعمتي نحن غلطنا عليك بشنو..
وامي ساكته تعاين..
عمتي اتفضلي قولي بسم الله انجيب ليك قهوتي البتريديها
عمتي:بعد كلام ابوك دة تحرم علي الموية من الزير ..وطلعت فاتت..
يتبع....