ود بلدي💔

21

سلطان عايش في حاله كئيبه واتصالات نورس ليهو قلت..ولما يتصل هو بتختصرو ..سلطان بقي متصبر وعايز يفهم الحاصل شنو بالظبط..

يوم الجمعه سلطان اتصل علي نورس ..وقال ليها انتظرك في المحطة عشان نمش لنسيبه..
لبست نورس وطلعت مشت لسلطان وركبو مواصلات الوادي ام درمان عشان يوصلو الحتانه لنسيبه..وطول الطريق نورس مكشرة ورابطة وشها وخاته كوع يدها علي الشباك ومتكيه بخدها علي كف يدها..سلطان يتلفت يعاين لنورس وهو حزين ودموعو غالباهو ع طرف عينو..سلطان حزين علي حالة نورس.وانو شكلها حتي اتغير واتبدل بالكآبه...

سلطان :نورس..نورس نورس.
نورس:اتلفتت وعاينت لسلطان وهزت براسا(نعم)
سلطان:انزلي معاي في اقرب مستوصف نخش لدكتور
نورس:اناكويسه ماف شي
سلطان:نورس شوفي حالتك كيف..لو في حاجه داساها كلميني..
نورس:هزت براسا(لا)ورجعت اتكت علي الشباك..
سلطان :
اااه يانورس الخليتي حالي مبهدل..
واااه ياقلبي اصبر ولو قليل اتحمل...
القمر البمد لي نورو..
روح وبالضلام اتبدل...
والفرح البكون يوماتي
سافر وللحزن وكل..
ااه يانورس الزدتي اليتيم حرمانو..
باقي السكر العندك صبح حنضل...

نورس:
انا الفيني ابدا مالقيت تفسيرو..
انا الجوايا مزحوم خاطري بتكسيرو..
وحات الله الجمعني عليك
حاسس قلبي بتقصيرو..
ماعارفه الحصل في روحي.
كيفن اعرف الجواها..
مالحاصل دة سر في بيرو..
كاني العرفه فيك غبيتا..
الجوايا اصبح زيرو..
الريد نارا باتت خامدة..
والشوق اتثلج تأثيرو..
مسجون الغرام أتعتق
من سجن المحبة أثيرو..

سلطان:ردي علي ولو بكلمة..
اشرقي يا شمس في الضلمه..
اضحكي بطرف اسنانك.
فكي احزاني من حزم الالم والضمه..

ردي علي عليك الله..
يانورس كفاك سكات..
ارخي حبال الوجع والآآآه...
ردي قليبي عابر ليكي..
فتش سكتك وماتااااه..

نورس وسلطان بين ضيم من سكات والم من نار..
الواضح انو نورس من تسمع صوت سلطان او تشوفو بتحس بضيق عجيب.بس مابارادتا.وهي حست بانو خارج يدها انها تتعامل مع سلطان كدة..ّ

وصلو بيت نسيبه بالوصف الدقيق..دخلت نورس وحضنت نسيبه وبكت شديد لدرجة انها شهقت بصوت عالي خلي سلطان يسمعو وهو موجود في غرفة الضيوف سلطان..قام اتحرك علي اتجاه الصوت بس خجل من صحبو عبود ورجع تاني وهو ماحاسس بعمل في شنو ..بدا يفتش في جيوب البنطلون ويتلفت جاي وجاي وغالبو القعاد ..وبقا بين نارين..نار صوت نورس الباكي..ونار الوجع والضيق الفيهو..قعد سلطان وعبود بتونس معاهو بس هو مامنتبه وبهز في رجلو ..ومره يرجع يرقد في السرير ومرة يقوم ومره يشيل الرمود ويقلب في التلفزيون..

نورس بهناك هدأت وبدت تتونس مع نسيبه وقالت ليها بس كنت مشتاقه ليكي..
نسيبه جهزت الفطور. ..ونورس راقدة في برندة المطبخ متعبة الجسد شاحبة اللون ..
نسيبه:نورس انتي وسلطان مختلفين
نورس:لا ليه
نسيبه:انا لما شلت المويه ومشيت ليهم حالة سلطان ماعجبتني
نورس:مالو سلطان بكون تعبان من شغل السوق..
نسيبه:انا بحن علي سلطان دة انسان مسكين شديد..يعني تحسي بيهو ناقصاهو حاجه كدة..طيب وحنين وعبود مابخير فيهو زول.عندو سلطان والكلام انتهي..
نورس:نسيبه البلد كيف والفريق والاخبار
نسيبه:حست انو نورس غيرت الموضوع..اتونست معاها وماانتبهت تاني..

جا وقت الفطور قعدو كلهم في صفرة وصينية فطور بوجبة بلديه دسمة..عصيدة بنعيميه وسلطات وضيافه معتبرة..
نورس قعدت تشيل لقمة وتقعد مسافه ومسافه وترجع تشيل لقمه..ونسيبه وعبود بتونسو مع نورس وسلطان ..
بس سلطان منتبه لتحركات نورس
سلطان:نورس اكلك ضعيف نورس لازم تمشي الدكتور
نورس:مدنقرة وبتاكل في اللقمة ببطئ وبنفس طامه..ماردت ومامنتبه للبدور في السفرة..
نسيبه:نورس نورس نورس..اجيب ليك حاجه تانيه تاكليها امكن ماعجبتك العصيدة..
عبود:سلامتك نورس ان شاءالله خير?

نورس قامت وطلعت برة ..قام وراها سلطان ومشي يحصلا..
نسيبه وعبود احتارو في نورس 😨😨

نورس اتجهت علي الوضايه تغسل يدها .سلطان طوالي قام معاها ومشي ليها ..

نورس بدت تغسل ايدا في الوضايه..وشافت سلطان بس ماأهتمت بيهو وعايزة ترجع للصاله....
سلطان:نورس وقفي ارجوك لحظة يانورس ماممكن البتعملي فيهو دة..انتي ليه بتعذبيني كدة.مالك الحاصل عليكي شنو بتعملي كدة.انا غلطتة عليكي بشنو..
نورس وقفت بس أدت ضهرها لسلطان..وقالت:سلطان انا كويسه ماف شي

سلطان:لحظة تعالي يانورس اقعدي هنا ودخلو هي و سلطان برندة المطبخ .

سلطان:لو لقيتي زول احسن مني يانورس الله يهنيك بيهو .بس أأكد ليك مابكون حنين عليك اكتر مني..عندك الحق انك تمشي برأي ابوكي وامك بس صارحيني ووقفيني عند حدودي وانا بتعذب واتقطع واتعهد ليك اني مااقرب عليك واضايقك..انا لوكنت حديد كان سحت من عمايلك لي..وبدأ سلطان يبكي وايديهو غطت عيونو ..اتنفض سلطان بحرارة البكا ونورس ماهزا فيها شي

نورس:انا ماعندي اي زول تاني ولا امي وابوي عندهم دخل بالحاصل دة بس ياسلطان انا عايزة ابعد شويه امكن اقدر اجمع حالتي المشتته ووضعي الملخبط..سلطان امسح رقمي جيب تلفونك دة انا بمسحو..وحاولت نورس تشيل التلفون من سلطان .سلطان رفض .قاومت نورس بكل قوتا تشيل التلفون وسلطان يرفض ويهدي فيها:نورس قولي بسم الله نورس لاحولا ولاقوة الا بالله نورس في شنو انتي مانورس الانا بعرفا..اصبري اهدي يانورس..

نورس مشت خطوتين لبرة وجات راجعه ونفسا قايم وبعنف مسكت تلفونا وقالت:انا البريحك ياسلطان واريح نفسي وضربت التلفون بالارض بقوة...سلطان حاول ينقذ التلفون لكن نورس سبقتو وضربتو تاني باألارض لحد ما التلفون اتفصل عن كامل بعضو..❕❕