عشقت صعيدي (الجزء الأول) -الكاتبه أميرة السمدونى

المقدمه

يمكن الرواية مش العمل الأول ليا، والتاني وناس كتير هتشوف إن الفصحى أقوى من العامية، أكيد طبعاً ولي أعمال فصحى، الرواية دى تاني رواية في عالم الأدب لي، وقررت أخلى البساط فيها أحمدى، وأتكلم بتلقائية ومرح، وبطبيعتي وبدون أي حواجز، فخليت الجزء الأول كله عامي على لسان بطلتنا إسراء هنضحك كتير وهنبكي كتير بردو غلاسة هههههه، قصة العمل مش مقصود بيها أبداً الهجوم على أهلنا في الصعيد، لا فوق رأسي طبعاً، هسيب لكم من بين السطور تستشفوا القضايا المجتمعية ال العمل بيناقشها، وبنسبة للهجة فدى لهجة الصعيد الجواني، ومش مقصود فيها أبداً التقليل من الصعايدة، ما أنا بتكلم قاهري أهو وعادى وفخورة بلغتي سواء عامية أو فصحى.

في الحقيقة الجزء الأول من العمل أتكتب ما شاء الله في ظروف زي الفل، حبيت أهرب منها بفضفضة، هزار وجد، أحداث العمل كهيكل حقيقية زي شخصية كاملة وإسراء ووليد، وفي أحداث كتير حصلت، في الواقع، مع حبة بهارات من عندي ومن خيالي ههههه، عشان احافظ على خصوصية حياة الأبطال، جربت كتير أحول العمل لفصحى ومحستلوش طعم زى أول مرة أتكتب فيها عشان كده قررت أنزله عامي وأتمنى أفيدكم وتستمتعوا