عشقت صعيدي (الجزء الأول) -الكاتبه أميرة السمدونى

الفصل الحادي عشر

هاشم مكنتش متوقعة أشوفه لانه أنهى فترة إقامته وعرفت ده من الإستقبال الصبح طبعا بعد زن ومحاولات كتير، القرية كانت هادية جدا في الوقت ده، بس هو مكنش هادى كل حاجة فيه بتتكلم، عنيه عبارة عن جمرات من نار، كان جرىء جدا في الليلة دى ووقح لأبعد حد، جه من غير سلام ولا كلام لونه مخطوف، بدأ الكلام وهو بيزعق باصص لى بقرف وجوزى واقف يتابع الوضع بهدوء قبل ما يقولى وهو فاتح تلفونه في وش وليد:-

-مكنتش أعرف إنك بالقذراة دى، يا شيخة بلاش تحترمى مراتى بس على الأقل خلى في إعتبار للراجل ال أنتى شايلة اسمه

وليد بص بسرعة على الشاشة وهو مذهول ومصدوم وحياكلنى الرسايل كانت فاضحة جدا، بتدل على خيانتى ومن رقمى فعلا بس أنا مبعتش حاجة ...! طيب مين ...؟،

بررت وأنا بنتفض وجسمى بدأ يصب مياه الموقف حقيقي صعب أوى:-

- دى ..دى مش رسايلى والله ما أعرف إزاى وصلت لك ..؟

رد بإنفعال أكبر :-

ايوة اتمسكنى وأعمليهم عليا، ده أحنا دافنينه سوى

شهقت بغضب رهيب جدا لأنه ملمسنيش في الفترة ال عرفنا فيها بعض، ممسكش حتى أيدى طيب مين ال زقه عليا ...؟، أيه مصلحته ...؟ دى مش دماغ هاشم أبدا أكيد الموضوع فيه إن، علقت وانا ببلع ريقى ووليد واقف متنح مش مستوعب الموقف أخر حاجة كان يتوقعها هى خيانتى :-

-دفنينه أيه يا كداب يا ضلالى عاوز توقع بينى وبين جوزى بس ده بعدك نجوم السما أقرب لك

بص لوليد قبل ما يمشى وهو بيقوله :-

-هههههه كنت فاكر دمك حامى حطلقها أو تقلتها بس واضح أنك معلى الأريل من زمان وكان لازم أعرف ده من أول مقابلة

، مسكه من ياقة القميص وهو بيزقه ناحية حيطة الكافيه بإنزعاج وعصبية وغضب كبير جدا وهو بيكز على أسنانه وبيخنقه :-

-مرتى أشرف منك ومن عيلتك كليتها، لو اسمها جه على لسانك تانى حجطهولك"حقطعهولك "...!!

حاولت أحوش كتير ما بينهم لحد ما فصلت وليد بالعافية عن هاشم ال خد ديله في سنانه وطار، وأنا بعيط مش عارفة أيه المصيبة ال طبت علينا دى، ولا عارفة أبدأ أشرح منين ولا عارفة أثبت له برائتى إزاى..، تشبثت بأيد وليد ال كان بيهرب بنظراته منى وبينفخ بإستياء والنار بتاكل قلبه فقولت:-

-وليد متصدقهوش ...أنا عمرى ما أخونك ده...

قطع جملتى لما رفع كفه في وشى بإعتراض وهو بيزعق:-

-لليييييييييييييييييييييييه كنتى بتحبينى عاد ومنش خابر..!مش أنتى ال جلتيلى بعضمة لسانك من يومين انا مبحبكش بحب هاشم، ماشى يا بنت برعى خلى الحب الاول ينفعك