عشقت صعيدي (الجزء الأول) -الكاتبه أميرة السمدونى

الفصل الرابع

دخلت هند وهى بتبربش وعاملة فيها مكسوفة، بتحاول تحكم دور البنت الوديعة، بس المكياج ال كترته بغباوة خلاها أشبه بأمنا الغولة، ماما فضلت تبرق لها متغاظة من المنظر وهند ولا هنا ادى جزات أنها مرضتش تسبها في لمساتها "أو تلاحيسها على رأى أمى "، خرجت هند مع ياسين للبالكونة معاها نوتة ملاحظات وقلم في أيد والأيد التانية ماسكة بيها مج كابتشينو، فضلوا يجى عشر دقايق كده مبيتكلموش، هند بتجمع فيها خطتها الدفاعية، لحد ما حس بملل وأنه قدام فيلم صامت فقال:-

- مبسوط بوجودى هنا وحاسس إنها حتبقى بشرة خير

رفعت حواجبها مش عاجبها الكلام ورسمت بسمة شريرة ال هو" غلبان أوى الشاب ده وأمه داعية عليه " وراحت كاتبة :-
- ممم متفائل وإيجابى ومقبل على الحياة
قال لها وهو حاطط أيده على دقنه بإبتسامة سخيفة وحاطط رجل على رجل:-

-ربنا يخليكى، أنا اصلا وأنا ....

بحلقت له جامد وهى بتزق رجله بعصبية أو بإستهبال:-
- أخرس أنت صاحبنى، وأيه ده حاطط رجل على رجل ..!!، أنا حبقى زوجة ديمقراطية أه بس مش للدرجة دى
قرب منها حاول يشوف بتكتب أيه فلمح " متكبر ورغاى " رفعت عنيها وكأنها عاوزة تهزقه وراحت ضايفة :-

- وكمان حشرى

نفخ بغضب من جنانها :-

- هو في أيه...!!

مدتلوش إهتمام وسرحت ربع دقيقة كده قبل ما تقوله :-
- لو أنت قدام بحر وأمك وأختك ومراتك بتغرق حتنقذ مين ...؟
رد بمنتهى التلقائية وجواه بيقول"اللهم طولك يا روح":-
- نبع الحنان طبعا

لوت بوقها بعصبية وهى بتضيف لقائمة السلبيات :-
- ابن أمه وضعيف الشخصية

رفع طرف عنيه وشاف ال كتبته فقالها وهو بيحاول يجيب أخرها:-
- أو انقذ مراتى حبيبتى

شطبت ابن أمه وعدلتها " ناكر للجميل وغير صالح للتعامل الادمى "

خبط بإيديه على الترابيزة بإنفعال كان حيدلق فيه النسكافيه :-
- في أيه يا حاجة هو أنترفيو ...!!

رجعت بضهرها لوراء وهى بتبص له ببرود معلقة:-
- مممم وكمان عصبى ومتهور، لا يصلح لتحمل المسئوليات
قام بسرعة قبل ما يرتكب جناية جاله صوتها بتقوله :-
- أقعد لسه مخلصتش كلامى، لو في يوم قابلت زميلى حتسيبنى أسلم عليه

ضيق عينيه بخبث وهو مقرر انه حيظبطها بس الاول يشوف عاوزة توصل لأيه :-

- لو بالأيد لا طبعا

خدت شفطة من الكابتشينو قبل ما تقول بمنتهى الهدوء:-
- متسلط ورجعى

عكس كلامه عشان يشوف دماغها أيه :-

- خلاص حسيبك تسلمى عليه هو يعنى حيأكلك ...

رتبت أوراقها وهى بتأخد أخر شفطة وبتقوم :-