حنان جابت الشاي في الحديقه ومعاه بسكويت اليانسون واول م تمني عينها وقعت عليه... صرخت في فرح 😍 وشالت وحده واكلتها وقالت : الله بسكويتي المفضل 😅 شكرا حنان .
حنان : دي خاله منال من جات من الشغل قالت لي امشي محل الحلويات وجيبي بسكويت اليانسون عشان تمني بتحبو 😅
تمني باست امها وقالت : تسلمي حبيبتي ي ست الكل ❤ تاليه جات جاريه حضنت تمني وهي بتقول : حبيبتي جيتي بتين ؟ ليه ماما م كلمتيني ؟ 😔 منال ضحكت وقالت ليها اكلمك عشان م تديني فرصه اتكلم معاها 😅 عارفاك لمن تلقي اختك دي تاني م عندك لي زول حاجه......
تمني : مشتاقه ليك حبيبتي ❤ رايك شنو تجي الخميس الجايي تقعدي معاي لحدي السبت ؟... تاليه في فرح : وااااااو شكرا 😍...
طلعت حنان من الغرفه وكانت شايله كيس كبير في يدها واتعترت وقعت والحاجات كلها اتكبت علي الارض.... تمني عاينت وقالت لي امها في دهشه : البامبرز دا حق منو ؟ يعني منو؟ في البيت دا بحتاج ليه وكمان المقاس حق الكبار ؟
منال ارتبكت ومشت بسرعه لملمت الحاجات وصرخت في حنان : دا شنو دا ؟ بقيتي م مركزه خالص امك شغاله معانا قبل م الد تمني دي وم حصل غلطت.... ركزي شويه ياخ 😡
حنان : انا آسفه
تمني : خلاص ماما حصل خير .
حنان شالت الحاجات ودخلت جوه ومنال قالت لي تمني : ابوها كبر المسكينه شايله همو بقي م بقدر يمشي الحمام بقت المسكينه تضطر تشتري ليه البامبرز ..
تمني : حرااام البامبرز بقي غالي شديد وهم علي قدر حالهم .. عليك الله ي ماما زودي ليها المرتب عشان تقدر تشتريه بدون م يأثر عليها .
منال : حااضر ي بتي
سكتت مسافه وبعدها قالت : ناديه قريبتنا بتتذكريها ؟امي وامها بنات خالات....قرت معاي....... مره نزلت عندنا لمن جابت امها عيانه للعلاج.... المهم هي طبعا زوجها اتوفي وامها الفضلت ليها من عايلتها كمان اتوفت قلت ليها تعالي اقعدي معاي منو تساعدني في الشغل وتتقلني في البيت........السكران الحيران دا م واعي لي طول اليوم .
تمني : اووو خالتو ناديه بحبها جدا ياريت تقعد معانا علي طول 😊
منال : هههه اااي والله هي طيبه وبتتحبي بس انتبهي م تقولي ليها كلمه خالتو دي لانها م بتحب يكبروها قولي ليها ناديه او ندويه اوناني زي م تحبي 😅
تمني : هههههه طيب حاضر 😊 ح تجي بتين هي ؟
منال : يعني م اكتر من اسبوع ..
تمني : طيب ي روحي نبهيني عشان اجي استقبلها معاك 😊😊
منال : حاااضر حبيبتي
◾◾◾◾◾◾◾◾
سمعت تمني صوت بوري طويل جنب الباب ودا خلاها تودع امها وتاليه بسرعه وتمشي عشان م تأخر امجد... بس اتفآجأت بي السواق ومعاه إمتنان 🤔 المهم سلمت عليهم وقالت لي إمتنان الا تدخل تسلم علي ناس البيت بس اعتذرت وقالت ليها : آسفه م بقدر اسلم علي ماما منال لاني بي مزاج سيئ جدا الليله..... يوم بجي معاك اقعد معاها كتير والله مشتاقه ليها 😔 هي وتاليه حبيبه قلبي❤
