خلصت تاليه امتحانات بس امجد م قدر يجي يشرح ليها بسبب ظروف اخوه المرضيه بس تمني م قصرت معاها قامت بالواجب وزياده اما ناديه كانت قايمه بالشغل في بيت الازياء علي اكمل وجه وكمان ممشيه امور البيت يعني كانت نعم الخاله ،،،،
احمد وهو داخل علي غرفه العمليات مسك يد امه وقال : اوعديني لو حصل لي حاجه م تبكي علي ،،، انا عارف الدموع حاجه م بيدنا بس عايزك تدعي لي ودا بس البنفعني...
اشتياق وعيونها اتملت دموع : حبيبي ان شاء الله م اشوف فيك مكروه... ح تبقي كويس وتجي تنور بيتك ي نور عيني ،،
احمد ولسه ماسك يدها : انتي م زعلانه مني صاح ؟
اشتياق : انت زعلتني في شنو ي روحي... عافيه ورضيانه عنك ي قطعه من روحي... طمن بالك وخليك في نفسك وقول يارب تشفيني...
احمد : يارب
فجأه جات تمني جاريه عليه وسلمت وقالت : ربنا يجعل ليك فيها الشفاء ان شاء الله 😭
احمد : اصيله ي تمني...... امي فعلا اختارت لي بت اصول بس انا فرطت فيك لكن
سكت وعاين لي امجد وواصل : لكن في البقدرك ويعوضك عن الظلم العيشتك ليه ،،، ربنا يسعدكم ،،،،
ابتسم وهو بعاين للكل وقال ; ي جماعه يعني انا داخل عمليه ومودعني بالدموع حرام عليكم دي الروح المعنويه الح تخلوني ادخل بيها غرفه العمليات ؟
دخل احمد غرفه العمليات والكل في توتر وقلق ويمشمو ويجو ،،،
*في جانب اخر *
الدكتور : وين دكتور ناجي اختصاصي التخدير ؟
الممرضه : اعتذر بس جا دكتور عماد بدلو !!
الدكتور : منتهي الاستهتار يغيب علي كيفه وناسي عنده عمليه مهمه جدا...
💜💜💜💜💜💜💜💜
اشتياق عاينت لي امجد وتمني في غضب وبعدها قالت : احمد بقصد شنو ؟ بي قوله في البقدرك ويعوضك عن الظلم العيشتك ليه ،،،
امجد : ي امي اسي دا وقته ؟
اشتياق : يعني كلام اخوك الزمان انك خاتي عينك علي مرته صاح؟
امجد طلع بره صاله الانتظار وقعد في كرسي... إمتنان طبطبت علي كتف اشتياق وقالت بصوت منخفص : ماما معليش كلنا متوترين بس لازم نصبر .
اشتياق بكت وقالت : اخوك مقهور الخيانه جاتو من اقرب الناس ليه في الاول اخوه وتاني هبه مرته 😩😩 عشان كدا مرض بالمغسه .
تمني طلعت بسرعه من جنبهم وامجد لحقا وهو بقول : تمني...... تمني انتظري ،،،
وقفت ومسحت دموعها وامجد قرب منها وقال : م تزعلي من امي انتي عارفه هي بتحبك قدر شنو بس مرض احمد مخليها م عارفه بتقول في شنو ؟ اعذريها .
تمني : طيب انا ماشه طمني علي احمد .
💜💜💜💜💜💜💜💜
هبه رسلت لي اهلها عشان يجو يعيشو معاها هناك وهي بتفتش لي شغل عشان تعيش مرتاحه في بلد الغربه اما احمد بعد شالت معظم ثروته قنعت منو ورسلت ليه طالبه الطلاق بس اتضح انو يوم طلع ورقه تمني كانت معاها ورقتا هي كمان...
مرت ساعات في غرفه العمليات ومافي خبر والكل اتوتر وحس بالقلق وبعد فتره جا الدكتور طالع وطلع الكمامه ووشو م بتفسر وقال وراسه محني : والله ي جماعه عملنا كل م بوسعنا بس حصلت مضاعفات اثناء العمليه ،،، الدوام لله ان شاء الله البركه فيكم ......
فجأه لحظه صمت اصابت الجميع ،،،، الكل بين مكذب ومصدق... امجد مسك الدكتور من الكولا حقته وصرخ : كيف يموت ؟ موش قلت العمليه بسيطه استئصال ورم ليه الحصل شنو ؟ كيف مات ؟ 😭
الاطباء جو من جوه وابعدو الطبيب البلغهم الخبر وواحد منهم قال : البركه فيكم م بيدنا شي ،،، الورم انتشر بطريقه غير متوقعه معليش الخبر صعب عليكم بس دي اراده ربنا ،،، واذا شاكين في شي ممكن تشرحو الجثه ،،، مره تانيه نحن آسفين 😞
اشتياق بقت تصرخ وتقول : لٱ لٱ م يهبشو ولدي 😩 كفايه العذاب الضاقو لو عندنا حق عندكم خليناكم لي الذي لا يغفل ولا ينام... وووب علي قلبي كان حاسي انك مودعني يانور عيني 😩 الله يلزمني الصبر الله يلزمني الصبر ،،،،
ووقعت اشتياق من طولهاوغابت عن الوعي ،،، اصابتها نوبه قلبيه فضلت في العنايه 10 يوم وبعدها طلعت البيت بحاله نفسيه سيئه جدا وكانت محمله امجد ذنب مرض و موت اخوه ورفضت تقابل تمني خالص ،،،،
💜💜💜💜💜💜💜💜
مرت شهور واشتياق في حاله عزله كامله ومعتكفه داخل الغرفه الكلام عند اللزوم فقط ودا كان مضايق امجد وإمتنان واضطر يجيبو عمتها نفيسه تجي تقعد معاها وتخفف عنها لانو امجد في الشغل وإمتنان في الجامعه ،،،،
حسام سليم جا البيت عشان يعزي وكمان زار امجد في المصنع وكرر طلبه حق الزواج من إمتنان ورد امجد : إمتنان اتقدم ليها اعز اصدقائي بس هي رفضت وانا م بكذب عليك متابع اخبارك كلها اول بي اول والحمد لله مافي حاجه م تمام ماشي بما يرضي الله ودا بدل علي انك جادي مع اختي وعايز تبني معاها حياة كريمه ،، عموما ي سيدي الف مبروك وربنا يتمم علي خير ،،،
حسام بالفرحه حضن امجد وقال : طيب انا جاهز وتمني خلصت السميستر الرابع رايك شنو نعمل العرس بعد شهر ؟
امجد بان عليه الحزن وقال : انت عارف المرحوم احمد لسه م تم سته شهور ومستحيل نعمل فرح بس ممكن تعقد وتسوق مرتك...
حسام : انا آسف الفرحه نستني الحداد م مشكله المهم عندي إمتنان تكون مرتي م مهم فرح ولا اي مظاهر م ليها لازمه ،،،
امجد : طيب مواعيد الزواج بقعد مع الحجه ونشوف الوقت المناسب وبديك خبر .
يتبع....
