امجد لقي اشتياق في الهول ومعاها نفيسه سلم عليهم وردت بي برود : اهلا
امجد حكي عن رغبه حسام سليم وبس خلص كلامه اشتياق هاجت : شنوووو ؟ خلاص كلكم عايزين تفرحو بعد اخوكم مات ؟ كان هو العقبه في طريقكم ؟ حسبي الله ونعم الوكيل 😩
امجد : ي امي احمد غالي علينا كلنا وموتو ح يفضل جرح في قلبي لحدي م اموت واحصله... بس الحياة م بتقيف ،،، من حقها إمتنان تفرح وتتستر وتمشي بيت حلالها مع الراجل الاختارو قلبها ،
اشتياق : مافي زول مجروح زيي انا مافي زول شالو في بطنو تسعه شهور انا الوجعتي كبيره ..
نفيسه : بصراحه ي اشتياق ي بتي م ليك حق... احمد الطير في سماه وجعو وبكي عليه فمابالك اخوانه .. عمري م شفتك مهزوزه كدا... نار الحشي حاااره وربنا يبرد عليك بس اولادك ديل عايني ليهم... ليه بتحملي امجد ذنب حاجه هو م عنده دخل فيها... البت دي طليقه اخوه هو كان بحبها من بعيد وقبل حتي م يشوفها المرحوم واتفآجأ يوم العقد انها مقسومه لي اخوه،،، ساعه مشيتي وطلبتيها للزواج امجد كان في كوريا يعني م شافا الا ساعه الزفاف وكانت صدمته كبيره بس كتم في قلبه وسكت وصبر واتحمل وعمره م غلط ولا عاين ليها عين خيانه او غدر... اتقي الله ظلمتي ولدك وظلمتي تمني الكانت اغلي من روحك...
راجعي نفسك وولدي دا قلبو اتكسر كم مره م تزيديها عليه ..
💜💜💜💜💜💜💜💜
هاشم اتعافي تماما والدكتور قرر ليه جلسات دلك طبيعي في الاسبوع مرتين وممكن تتعمل في البيت عادي ،،،
ناديه ملتزمه بي علاجه واكله وشرابه وم مقصره فيه خالص...
تاليه جابت مجموع كبير ونزلت اولي ثانوي وكانت مجتهده بس دائما بتسأل تمني عن ابوها ليه قتل امها والبنات في المدرسه بعايروها بالحاجه دي بس تمني قالت ليها : ابوك م قصدو يقتل ماما وقعت غصبا عنو.. سامحيه عشان ربنا يسامحه...
تاليه : لا انا بخاف منو م عايزه اشوفو لانو ح يكتلني زي م كتل ماما بعدين اذا كان م قاصد ليه الشرطه مسكتو ؟
💜💜💜💜💜💜💜💜
في اسئله كتيره في راس تمني بتبحث ليها عن اجابه ومافي زول بجاوب عليها الا نادر لذلك قررت تمشي تزوره في السجن ،،،، اتصلت بي امجد عشان يجيب ليها اذن زياره وكان ردو : تمني م تمشي للراجل دا .. بصراحه انا م مطمن عليك واذا اصريتي لازم ادخل معاك ،،،
تمني : لا في كلام م بينفع يتقال الا بيني وبينه .
امجد وبدا عليه الحزن : ايوااا انا آسف
تمني : لا ارجوك م تفهمني غلط... انت عارف مكانتك عندي بس في حاجات م بحكيها لي وانت معاي عايزه اجوبه كتيره علي اسئله ضلت جواي
