تائهة بين دوائر الانتقام الجزء الثانى - الكاتبه اسراء احمد

الفصل الثامن

في المستشفي عند سارة بليل بعد ما كلهم مشيوا ...نايمة سارة وكريم علي كرسي جنبها وسيف واقف علي باب المستشفي بيشرب سيجارته وبيكلم سمر ...
اتفتح باب اوضة سارة ودخلت ممرضة لابسة كمامة مخبية وشها وجوانتي طبي وجت عند الكانيولا اللي في ايد سارة وحطت جواها دوا واتسحبت براحة وخرجت ...
بعد ساعة قامت سارة مرة واحدة وبصرخة : ااااااااااااااااااه الحقوني اااااااااااااااااه ، ومسكت سارة بطنها وبتتألم بشدة ...
صحي كريم من صوت سارة ..
كريم بفزع : سارة مالك ؟ ايه اللي حصل ؟
سارة بصريخ وعياط ومسكت في البالطو بتاع كريم : الحقني يا ابية ، نار في جسمي ناااااااااااااااار مش قادرة كل جسمي بيوجعني اااااااااااااااااه ...
كريم وبيكشف علي سارة وبيحاول يعرف مشكلتها وكل شئ طبيعي ومش لاقي سبب للالم ...
كريم خرج يجري بره اوضة سارة ولقى واحدة من الممرضات : بقولك هو دكتور مجدي في مكتبه ؟!
الممرضة : لا يا دكتور مشي من بدري .. هو في حاجة ؟؟
سابها كريم ومشي رجع لاوضته تاني ... سيف خلص مكالمته ورجع وشاف منظر سارة وصريخها من الالم ..
سيف بقلق : في ايه اللي حصل يا كريم ؟!!
كريم بزعيق : مش عارف ، مش عارف والله ، فجاة قامت تصرخ وبتتألم زي ما انت شايف كده ومش عارف مالها وبكلم دكتور مجدي مبيردش ..
سيف : سارة حبيبتي حاسة بايه ؟
سارة بصريخ : نااااااااااااااااااار ، الحقووووووووووووووني ...
سيف وطلع موبايله وطلب رقم ..
سيف : الو يا دكتور مهاب اسف اني بتصل بيك في الوقت ده بس سارة البنت اللي انا ماسك قضيتها في مشكلة معاها ومش عارفين فيها ايه ..
مهاب : ولا يهمك يا سيف انا كده كده صاحي . في ايه ؟
سيف : مش عارفين كانت نايمة وفجاة صرخت وبتقول في نار في جسمها ، الله الله الله الحق يا كريم .. ( سارة بدا انفها تنزف وبوقها يخرج منه دم والملاية البيضاء اللي كانت متغطية بيها ظهرت فيها بقع دم ) مهاب البنت عمالة تنزف من كل حته ..
مهاب : سيف انت فين دلوقتي ؟
سيف بضيق : في المستشفي ..
مهاب : اديني اي دكتور من عندك بسرعة ..( سيف ادى الموبايل لكريم )
كريم : الو ..
مهاب : بقولك بسرعة هتجيب 5 ملل من مادة ****** وتحط عليهم 2 ملل من مادة ******* وهتديهم للبنت بسرعة بحقنة في الوريد بسرعة حالا ....
كريم بتعجب شديد ونزل الموبايل من علي ودنه وبيبص لسيف : سيف مين ده اللي بكلمه ؟
سيف : ده دكتور مهاب .. دكتور من الشغل عندي . ليه ؟!!
كريم : ده بيقولي علاجها اني احط مادتين علي بعض لو حطيتهم اصلا سارة تموت فيها مستحيل يتخلطوا علي بعض ..
سيف : لالالا اسمع الكلام بس انا واثق فيه .. واخد سيف الموبايل من كريم .
مهاب : الو ،، الو
سيف : ايوة يا مهاب معاك
مهاب : سيف حالا تدوها الحقنة دي لو استنيتوا اكتر من كده المادة اللي اتحقنت بيها هتبتدي تدمر خلايا المخ بسرعة يا سيف ...
سيف بفزع : طيب طيب حالا ... وقفل سيف الخط ..
وكان في الوقت ده كريم راح حضر الحقنة اللي فيها العلاج وواقف متردد انه يدي لسارة الحقنة ...
اخد سيف منه الحقنة واداها لسارة وسط المها وصريخها الشديد ...
بعد دقايق وقف نزيف سارة وبدات تهدى ونفسها ينتظم ورجعها سيف علي مخدتها تاني وبدات تنام ....
مرت ساعة وسط توتر سيف وكريم وهم بيراقبوا سارة بعد ما طلبوا من الممرضة تغيير هدوم سارة وفرش السرير ...
رن تليفون سيف وكان مهاب ..
سيف : ايوة يا مهاب .
مهاب : طمني يا سيف ايه الاخبار ؟
سيف : هديت ونامت والحمدلله نبضها وضغطها كله طبيعي ..
مهاب : سيف البنت دي اتحقنت بمادة ***** ، المادة دي بيستخدموها للتعذيب ، بتعمل زي الم شديد في الجسم و بتخلي الشخص يفقد السيطرة علي نفسه تماما مابيقدرش يتحرك، ده غير الشعور كان جسمه مولع نار ..
سيف بضيق : فعلا كانت عمالة تصرخ وتقول حاسة بنار جوه جسمي .. طيب يا مهاب هي مفعول الحقنة دي بيبدا بعد اد ايه ؟ يعني سارة اتحقنت بيها من اد ايه كده ؟
مهاب : مفعولها بيبدا بعد 10 او 12 دقيقة بالكتير ، يعني هي حد دخل حقنها بيها وهي معاك يا استاذ ..
سيف : وده معناه ..
قاطعه مهاب : انه حد من جوه المستشفي . انا كده عملت اللي عليا . لما تفوق كلمني ضروري عشان لو في اي مضاعفات ..
سيف : ان شاء الله ، متشكر اوي يا مهاب ، اسف علي ازعاجك .. وقفل سيف الخط ..
كريم : هو مين دكتور مهاب ده يا سيف ؟
سيف وبيرجع راسه لورا علي كرسيه وبيمسح علي شعره ووشه : ده يا سيدي دكتور شغله كله في الحاجات اللي بيتم التعذيب بيها سواء ادوات مسممة او مواد طبيه او اجهزة بتتزرع في الجسم ، وهو اللي بيعالج اغلب الناس اللي زي سارة كده او اي واحد من الظباط المعرضين طبعا انهم في اي وقت يقعوا تحت ايد عصابة او مافيا ويتم تعذبيهم بحاجات زي كده ...
كريم : انا فعلا استغربت كلامه كان بيقولي احط مادتين علي بعض اللي احنا متحذرين من انهم يتاخد ادوية زي كده سوا لنفس المريض ، لا ويقولي في الوريد يعني ايه لو حاجة مضرة يبقي جاب من الاخر ...
سيف : الحمدلله ربنا سترها ...
فجاة اتفتح باب الاوضة وكان آسر اللي سيف كلمه بعد اللي حصل ..
آسر : سيف تعالى كده لحظة بص علي الفيديو ده .
سيف وقام : انت لحقت تفرغ الكاميرات ؟ ،، كريم هروح مع اسر ولو سارة فاقت كلمني .. وراح سيف مع اسر ..
...............................
في بيت سميرة وحسام ... سميرة في اوضة حسام وبتفتش فيها ...
سميرة : ما هو انا لازم اعرف الظرف ده فين ؟ او فيه ايه ؟
وفجاة لقت الظرف تحت هدومه ..فتحته سميرة وشافت صور سارة ومن الصدمة الصور وقعت منها ....
حسام ودخل اوضته وشاف صور سارة علي الارض وجري يلمها: ماما انتي بتعملي ايه ؟
سميرة بفزع: ايه الصور دي ؟
حسام بتوتر : انتي بتفتشي في حاجتي ؟!!!
سميرة ومسكته من هدومه ووقفته وبحدة : انا بقولك ايه الصور دي ؟
حسام : صور اتبعتت لي وماعرفش من مين ...
سميرة وضربته علي وشه بالقلم وبكل حدة : انا مش بحب سارة اه ومش عايزها وسطينا ، لكن انك تركب عليها صور زي كده وبالحقارة دي ، انا متخيلتش اني ممكن تكون ****** كده اوي ..
حسام : اهدي بس يا ماما ، ايه اللي انتي بتقوليه ده ؟!! انا هركب الصور دي ليه اصلا ؟
سميرة وبدات تعيط : انا منستش ****** ، منستش اللي عملته ، حرام عليك البت مش ناقصة ، ابعد عنها يا حسام ، وقسما برب العزة ان اذيت البت دي والله لا انت ابني ولا اعرفك ..
حسام بزعيق : بس بقي ، ايه اللي انتي بتقوليه ده ، ده ال ***** اللي خطفها هو اللي بعت لي الصور دي عشان اسيبها ، انتي فهمتي ايه ؟ وبعدين انتي لسه فاكرة الحوار ده ؟!! ما تنسي بقي وتسامحي ده ربنا بيغفر ويسامح انتي لا ...
سميرة بعياط : مش مصدقاك ، بس مش هقولك غير انك لو اذيتها يا حسام قلبي وربي غضبانين عليك ... وخرجت وسابته وهي منهارة ..
حسام بضيق ورمى الصور كلها في الارض ومسك الطفاية اللي جنب سريره رماها علي المراية واتكسرت ....
..................................................
في المستشفي في اوضة الامن ...
سيف : مين الست دي ؟ هي اللي حقنت سارة بحاجة ،، اه يا بنت ******* والله لاوريها .. بص سيف لظابط الامن اللي معاهم ... دي ممرضة هنا في المستشفي ؟
ظابط الامن : حضرتك هي مش باين ملامحها ...
نجاة بتوتر : انا .. انا اعرفها ..
اسر : مين دي ؟ انطقي ..
نجاة : بس هي ممكن تتسجن ؟!
سيف بضيق ومسكها من ذراعها بغضب : انتي مالك ؟ انطقي مين دي بسرعة ؟
نجاة بخوف : دي عبير ممرضة معانا هنا عرفتها من جسمها وطرحتها اللي مابتلبسش غيرها ..
سيف وشد نجاة من ايديها بعنف وماشي من الاوضة : تعالي وريني فين الزفتة دي ....
مشي سيف واسر ونجاة لاوضة الممرضات وسالوا عن عبير مالقوهاش .. خرجوا الاستقبال بلغوهم ان شغلها خلص ومشيت من بدري ...
سيف بحدة : هات لي عنوانها حالا ...
وبالفعل موظف الاستقبال جاب عنوانها وراح لها هو و آسر .....
......................................................
في اوضة سارة ...............
بدات تتحرك سارة في سريرها بألم ....كريم وقام وقف جنبها وبيجس راسها وبيطمن من حرارتها ..بدات سارة تفتح عينها وشافت كريم ..
سارة بضعف : انت مين ؟!!
كريم بقلق : هو مين اللي مين ؟ انتي مش عارفاني ؟!
سارة : لا مش شيفاك كويس ، انت ابية كريم ..
كريم وبيتنهد : حرام عليكي يا شيخة فزعتيني قولت البت فقدت الذاكرة ولا ايه ؟! ما هو ده اللي ناقصك يا سارة ..
سارة : ليه هو ايه اللي حصل ؟ وهفقد الذاكرة ليه ؟
كريم : انتي نسيتي كنتي عاملة ازاي من شوية ؟
سارة : ازاي ؟ مش فاكرة .. ابية انا عطشانة اووي .
كريم : بلاش تفتكري احسن ... طلع كريم موبايله من جيبه واتصل علي سيف ..
كريم : سيف انت روحت فين ؟
سيف : بشوف الزفته اللي حقنت سارة ، ليه ؟
كريم : عايز اعرف سارة ينفع تاكل او تشرب ولا لا ؟
سيف : استني خليك معايا ... آسر اتصل لي بمهاب واساله سارة ينفع تاكل او تشرب ولا لا ..
وبالفعل اتصل آسر بالدكتور مهاب اللي عرفه لو عدت ساعة وهو مؤشرات جسمها كلها كويسة عادي ...
سيف : عادي يا كريم طالما هي كويسة ومؤشراتها كويسة .. هي فاقت ؟
كريم : اه فاقت ومش فاكرة اللي حصل .. وهي كويسة الحمدلله . لو في جديد بلغني .. سلام
سيف : اوك ، سلام ...
............................................
عند عاصم .................
عاصم : ههههههههههههههههههههههههههه ، والله لاوريها العذاب اشكال والوان ، عشان حتة العيلة دي تضيع مني اخويا واغلي حاجة في حياتي .. بس هي شافت مني حاجة امال لو عرفت الجهاز اللي حطيناه .. هههههههههههه
شادي : تستاهل حد قالها تلعب معانا ...
عاصم : خلي بالك اللي مقوي ظهر البت دي سيف من غيره هي ولا حاجة لو بس نفخنا فيها تنتهي .. سيف ده ليه روقة كده ويوم معايا .. حسابه تقل معايا اووي ..
شادي : هتعمله ايه ؟
عاصم : لا اتقل ، كل حاجة في وقتها حلوة ، مش هو قعد سنة يبكي علي اهله ، انا هخليه يقع مايقومش .. عارف لو قتلت الشخص كده هتريحه لكن لو قتلت اللي بيحبهم هتقتله بس هيفضل عايش ..
شادي : وهو بيحب مين ؟! بص له عاصم نظرة انها معروفة يعني ..
ضحكوا هم الاثنين بشدة ..
عاصم : يوم الحساب قرب للكل ومش هرحم حد ..
.................................