تائهة بين دوائر الانتقام الجزء الثانى - الكاتبه اسراء احمد

الفصل الثالث عشر

ليلة كاملة عدت علي سارة بكوابيس مزعجة مش عايزة تفارقها ، كلمات حسام كل شوية ترن في ودنها ( انتي بنت مش كويسة ،، انتي متاحة للجميع ،، مش هتفرق لو حد تاني لمسك ....)
فضلت سارة طول الليل سخنة وجنبها كريم وياسمين اللي مافرقوهاش لحظة وياسمين نامت جنبها ,, وكريم نام علي كنبة قريبة من السرير .. حاولت سهير تنزلها معاها البيت رفض كريم وشكرية رفض تام بحجة ان البيتين واحد وخليها براحتها لحد ما تفوق وتنزل .. نزلت سهير وابراهيم وكلهم حزن ... وبدات سهير تبص له نظرات عتاب .. وابراهيم مش مستحمل تأنيب ضميره ...
تاني يوم الصبح في بيت كريم .... صحيت سارة لقت ياسمين نايمة جنبها وكريم نايم علي الكنبة اللي جنب السرير ، حاولت تتحرك عشان تقوم فاتفزعت ياسمين ..
ياسمين : سارة حبيبتي ، انتي عايزة تروحي فين ؟
سارة : عايزة اروح الحمام ، خليكي انتي نايمة ..
ياسمين وبتمسح وشها : ياااااه هي الساعه كام ؟! بصت ياسمين في الساعة اللي متعلقة علي الحيطة .. يا نهار ابيض الساعة تسعة ونص انا فاتتني المحاضرة الاولي .. قامت ياسمين بسرعة من جنب سارة وراحت الحمام عشان تلحق محاضرتها .. وقعدت سارة علي السرير وبتمسح وشها بايديها وبتتنهد ، افتكرت اللي حصلها وبدات دموعها غصب عنها تنزل ..
سارة في نفسها : معقول كل ده كان بيمثل عليا ؟!! معقول انا كنت هبلة كده ؟ تجاهلت كلام خالد ومحمد وياسمين ، وقال ايه قلت اضمن عريس عشان مش هلاقي حد يحبني بعد اللي حصل لي ، وطلع حتي حسام زي ماجد وزي عاصم بل يمكن اسوا ، ( سندت سارة راسها علي مسند السرير ) طلع حيوان مش بيفكر غير في شهوته ، وبعدين يا سارة في اللي بيحصل ده ، ويا ترى رد فعل اخواتي لما يعرفوا ايه ؟ يا نهار ابيض ..
قطع تفكير سارة ياسمين اللي بتكلمها
ياسمين : ساااااااااارة ..
اتفزعت سارة وكريم علي صوت ياسمين ..
سارة بضيق : ايه يا ياسمين ده فزعتيني ..
كريم : ايه يا بت الغباء ده ؟! مش تراعي ان في ناس نايمة ؟؟
ياسمين بخجل : انا اسفة يا ابية والله ما كان قصدي بس كنت بكلم سارة وهي في عالم تاني بس نسيت انك نايم هنا ...
كريم قعد علي الكنبة وبيمسح وشه : ياه الساعة عشرة الا ربع انا مروحتش المستشفي ولا حتي اعتذرت .. بص كريم لسارة : انتي عامله ايه دلوقتي ؟!
سارة بهدوء : الحمدلله ..
قام كريم وقرب من سارة وحط ايده علي راسها وبكل هدوء : الحمدلله مش سخنة ..
سارة : انا عايزة انزل البيت ، زمانهم جايين ..
ياسمين : هم مين دول ؟!
سارة : خالد واسلام ومحمود ومحمد هم قالوا انهم جايين النهاردة ، ارجوكم مش عايزة حد يقولهم حاجة ..
كريم : متقلقيش خالو ابراهيم نبه علي الكل ان محدش يجيب سيرة ليهم باللي حصل ..
سارة : طيب الحمدلله ،، حاولت سارة تقوم وداخت ووقعدت تاني عالسرير ..
كريم : انتي مستعجله علي النزول ليه ، شكلك لسه تعبان ..
سارة : لا لازم انزل قبل ما يجووا عشان لو لاقوني هنا هيشكوا ان في حاجة ..
كريم : طيب استني نفطر وننزل ..
كلم كريم دكتور مجدي واخد اجازة ، دخلت سارة الحمام وخرجت لقت شكرية صاحية وبدات تحضر الفطار ..
سارة : صباح الخير يا عمتو ..
شكرية : صباح النور يا حبيبتي ، طمنيني عنك انتي كويسة ؟
سارة وبتبص للارض : الحمدلله كويسة ..
جه كريم من وراها وبيرفع لها راسها بصوباعه : مش انتي اللي المفروض تبصي في الارض ، اللي لازم يتكسف ويبص في الارض ناس تانية ..
سارة وبتتنهد : متشكرة اوي يا ابية علي وقفتك جنبي ، لولا اللي عملته معايا كان زماني ضعت اكتر مانا ضايعة ..
كريم وحط ايده علي كتفها واخدها بره المطبخ : يابت يا هبلة انتي وياسمين واحد وبعدين اي حد مكاني كان هيعمل كده ..
سارة بحزن : ما هو حسام اهو معملش زيك ، واستحل لنفسه حاجات مش بتاعته ..
كريم : انسي بقى عشان تعرفي تعيشي ..
سارة وبتبص لفوق وبتنهيدة : ياااااااارب ...
فطروا كلهم وياسمين نزلت كليتها وسارة وكريم نازلين علي السلم ..
كريم : اوووة ، انا نسيت موبايلي ، هطلع اجيبه بسرعة ونازل لك متنزليش استنيني ...
سارة : هقدر انزل لوحدي ..
كريم : اسمعي الكلام ..
سارة بتنهيدة : حاضر ..واقفة سارة وشافت حسام طالع جاي ناحيتها اتفزعت اول ما شافته طالعة تجري مسكها حسام من ايديها حاولت تصوت كتم بوقها بايده ..
حسام بحزن : اسمعي بس ، ماتجريش انا جاي اعتذر ، والله انا مش عارف ايه اللي حصل لي امبارح ، انا مكنتش في وعيي انا اسف ..
فجاة سحبت سارة ايده من علي بوقها بعنف ورمت ايده التانية من علي ايديها ولفت له وبكل قوتها ضربته علي وشه بالقلم .. في نفس الوقت كان طالع اخواتها ونزول كريم ليها تاني ..
سارة بعياط وصوت مكتوم : اسف ؟!! اللي هو ازاي ؟!! انتي غلطتك هتمحيها ب اسف ؟!! مش شايف انها كلمة مش مناسبة ...
كريم وجري علي حسام وضربه : انت ايه اللي جابك هنا يا كلب ، وبيضربه كريم وحسام مش بيقاوم ولا حد من اخوات سارة فكر يبعدهم عن بعض حتي .. جريوا كلهم علي سارة اللي قعدت علي السلم وانهارت في العياط ..
محمود بفزع : ايه اللي حصل يا سارة ؟!!
خالد بغضب : الكلب ده عملك ايه ؟!
ساب كريم حسام وراح لسارة ومسكها من ايديها وقومها .. وحسام نزل تاني بسرعة واختفى..
كريم : قومي يا سارة ندخل جوة مش هنقعد علي السلم ..
سارة ومسحت دموعها بايديها التانيه وقامت مع كريم وفتح محمد الباب بمفتاحه ودخلوا كلهم وعلي وشهم علامات التعجب ومستنين تفسير علي اللي حصل ..
كريم : ادخلي يا سارة اوضتك ريحي شوية ..
محمد بضيق : هي مين دي اللي تدخل اوضتها ؟!! تعالي يابت هنا .. ايه اللي حصل علي السلم ده دلوقتي ؟!!
كريم بتردد وبيحاول يخفي توتره وبيفكر في كذبة : حسام اتخانق مع سارة خناقة كبيرة وحاول يضربها وطبعا كلنا وقفنا له وقال ايه جاي يعتذرلها ، فصراحة ماتحكمتش في عصبيتي واول ما شفته ضربته . بس ده كل اللي حصل ..
خالد وعينه بقت محاصرة سارة اللي اتخنقت من محاصرته ليها وبتحاول تهرب من عينيه ..
محمود بضيق : وكان عايز يضربها ليه ؟ بيستغل اننا مش موجودين يعني ؟!
كريم بتوتر : كان ، كان يعني غيرته وبيغير عليها عشان كنت قاعد معاها طول الوقت فاتضايق غالبا .. معرفش بقى تفكيره ايه ، بس المهم انه ضايق سارة جدا واتخانقوا ..
سارة باندفاع : ومش هنكمل وخلاص هنفسخ الخطوبة دي .. وبدات دموعها تنزل .. عن اذنكم انا تعبانة ..
اسلام : طيب انتي كنتي فين فوق ؟! كنتي نازلة منين ؟!
كريم : زهقت واصرت ياسمين انها تبات معاها فيها مشكلة دي ؟!! مالكم ايه التحقيق اللي انتوا عاملينه للبت دي ؟! ادخلي يا سارة ادخلي ..
دخلت سارة وهي بتعبط وخايفة من اكتشاف الكذبة بس بتتخيل لو اخواتها عرفوا اللي حصل والمشاكل اللي ممكن تحصل لو عرفوا ..
كريم : بما انكم جيتوا هطلع انا انام لي شوية بما اني اجازة ، لو في حاجة نادوا عليا يلا حمدلله علي سلامتكم ..
الكل : الله يسلمك ..
مشي كريم وكلهم بيبصوا لبعض ، وخالد بقى مقتنع بشدة ان مش ده اللي حصل .. دخلوا اوضهم عشان يرتاحوا ، وصحيت سهير واتفاجئت بوجودهم ورحبت بيهم ..
سهير : والله البيت وحش اوي من غيركم ..
خالد بضحك : بجد يا سوسو وحشناكي .
سهير : اوي اوي والله ، اليومين دول فرقوا معايا اوي ربنا يخليكم ليا ..
خالد : ويخليكي لينا يا مامتي يا حلوة ، وباس خالد راسها .. احنا هنام يومين تلاتة كده عشان المشوار 7 ساعات بالباص علقة يعني ولما نصحى نبقي نقعد سوا ..
سهير : ماشي يا حبيبي نوم الهنا ..
خرجت سهير راحت لسارة في اوضتها ..
سهير : سارة حبيبتي عامله ايه دلوقتي ؟!! وقعدت سهير جنب سارة علي السرير ..
رمت سارة نفسها في حضن سهير وقعدت تعيط ..
سارة بعياط : انا تعبانة اوي يا ماما ومينفعش ابين عشان محدش يحس بحاجة . اول ما شفتهم النهاردة كان نفسي ارمي نفسي في حضنهم واعيط واقولهم ان انا بدونهم ولا حاجة ، حتي ابية سيف اللي دايما معايا في اشد ازماتي مش موجود ، اد ايه حسيت اني لوحدي ..
طبطبت سهير علي ظهر سارة ومسحت علي شعرها ..
سهير : معلش يا قلبي غمة وتزول ، الحمدلله اننا اكتشفناه علي حقيقته واحنا معاكي ، ما استفردش بيكي ، وكريم ربنا يحميه لشبابه انقذك من ايده ..
سارة بعياط وبعدت عن حضن سهير ..
سارة : اه والله ، ابية كريم ده نعمة ربنا انعم عليا بيها من السما ، ربنا يخليه ليا ولا يحرمني منه ابدا ..
سهير : حاولي تريحي جسمك شوية عشان هتروحي لدكتور يحيي العيادة بليل ، بابا عرف من كريم انك طلبتي تشوفيه وهياخدك ليه النهاردة ..
سارة بتتنهد : اه والله انا فعلا محتاجة اتكلم معاه بشدة ، طيب هو بابا قاله اللي حصل ؟
سهير : اه عرف اللي حصل ، وبيقول هو كان هيكلمك عشان تيجي له اصلا ..
سارة : طيب انا هحاول انام ، جالي صداع من كتر العياط ..
سهير : ماشي يا قلبي ، ربنا يريح قلبك ويزيح عنك الهم ..
خرجت سهير ونامت سارة علي سريرها وبتسحب الغطاء عليها لقت خالد واقف في وشها ..
سارة بفزع : بسم الله الرحمن الرحيم انت طلعت لي منين ؟! والله انت هتقطع لي الخلف في مرة يا رخم ، وحدفت سارة عليه المخدة ..
خالد ورمى المخدة تاني عليها وقعد علي طرف سرير سارة ، اخدت سارة المخدة منه وحطتها وراها وقعدت ..
خالد : بصي بقي يا سو ، التمثيلية الهبلة اللي عملتيها انتي وكريم تدخل علي اخواتك لكن عليا انا لا ، فخليكي حلوة كده واحكيلي الحيوان اللي اسمه حسام ده عمل فيكي ايه ؟ وايه اللي خلاكي ضربتيه كده ؟ دي ضربة واحدة مقهورة مكسورة ، مش واحدة خطيبها كان هيضربها او غلط فيها ..
سارة بتوتر : زي ما قال ابية كريم ...
قاطعها خالد : ااااه استني ، متحاوليش تكذبي عشان بيبان عليكي ااوي ، ده غير اني لو اكتشفت اني بتكذبي عليا انا هزعل منك يا سارة بشدة ، ومش هكلمك تاني بجد ، واظن انتي عارفة زعلي كويس ..
سارة : وانا معنديش حاجة اقولها غير اللي قالها ابية كريم ..
خالد بخبث : اللي هي ايه ؟
سارة بتوتر شديد وعيونها بتبعد عن مواجهة خالد وبتفرك ايديها في بعضها بتوتر : مفيش كنا عند عمو شاكر وقاعدة انا وابية كريم وبنضحك هو اتضايق وزعق فيا جامد وكان هيضربني زي ما قال ابية كريم وشتمني ، وو وبس مفيش ..
خالد وبيبص لها بمكر وبيرفع حاجبه : متاكدة ؟!!
سارة : اه متاكدة ..
خالد : طيب انتي مش عايزة تبصي لي ليه ؟!!
سارة وبصت لخالد نظرة سريعة ورجعت تاني بعدت عينيها عنه : لا عادي مش هبصلك ليه ؟!!
خالد ووقف وضرب ضربة خفيفة علي رجله : عموما براحتك يا سارة ، بس اليوم اللي هكتشف انك بتكذبي عليا متلوميش الا نفسك ... وخرج خالد وسابها وهي رجعت تعيط تاني ونامت علي مخدتها مستسلمة كالعادة لالآمها ....
.......................................
عند سمر وسيف ...................
واقفين علي البحر هم الاثنين بعد ما لبست سمر مايوة طويل محترم .. وسيف بيتكلم في التليفون ..
سيف : بص يا آسر ، انا عايزك تجيبلي الواد ده من تحت الارض ، وتحجزه عندنا لحد ما ارجع ..
آسر بصدمة : بتقول فين يا سيف ؟ في السجون بتاعتنا احنا ؟! انت اكيد بتهرج . ليه عمل ايه لكل ده ؟!!
سيف بهدوء : مد ايده علي حاجة مش بتاعته ، وحاجة تخصني ، وانا اللي يجي ناحية حاجة تخصني اقطع له ايده ، لا ايده ايه رقبته .. اسمع الكلام وقول ل وليد يتوصى بيه علي الاخر لحد ما ارجع ..
آسر : لااااااا ، انت اكيد مجنون ، كمان وليد ، ليه هو كان هيقلب نظام الحكم ولا ايه ؟
سيف بضيق : اسمع الكلام يا آسر وانت ساكت ، هو انا لازم اعيد الكلمة مليون مرة ؟؟
آسر باستسلام : حاضر اي اوامر تانية ؟
سيف بهدوء : لا ، واقفل بقى زهقتني خليني اشوف ورايا ايه ( وبيبص سيف لسمر اللي واقفة جنبه وحاضنة ذراعه ) ..
آسر : الله يسهله يا عم ، وراك ايه يعني ؟! عريس ومتدلع تلاقيك اخر دلع ..
سيف بضحك : يخربيت نبرك الفقر ، اهو قركم ده هيجيبنا ورا .. يلا امشي يا ابو عين مدورة وقفل سيف الخط..
سيف : سمسمة هتنزلي المية ؟ ولا بتخافي ..
سمر ووقفت قدام سيف وحطت ايديها علي رقبته : هخاف وانا معاك ؟
سيف :لا انا كده هضعف ومش هيبقى في بحر النهاردة خالص ..
سمر وبعدت عنه : لالالا خلاص ، يلا بينا بس انا مش بعرف اعوم ..
سيف : ولا يهمك يا قمري انا اعلمك ، هاتي ايديك وتعالي معايا ..
قلع سيف التيشرت بتاعه وحطه علي الكرسي بتاعه اللي قدام البحر ، لاحظت سمر نظرات بعض البنات لسيف اللي انبهروا بجسمه و بعضلاته .. اخدت التيشرت بعصبية ومدت ايديها بالتيشرت لسيف..
سمر بعصبية : البس التيشرت هتنزل بيه ..
سيف بتعجب : ازاي يعني انزل بالتيشرت؟! ده اشمعني ؟!!
سمر بضيق وبتنفخ وبتضرب رجلها في الارض وعينيها مراقبة البنات اللي بتبص علي سيف ..
سمر : اهو هو ده شرطي عشان ننزل البحر يلا البس التيشرت ..
سيف واخد منها التيشرت ولاحظ نظرات سمر وبيبص وراه لاحظ نظرات البنات ليه وفهم سبب ضيق سمر ..
سيف بخبث : امممممممم بقى الموضوع كده ، انت بتغير يا جميل ؟!
سمر : اه بغير والبس بقى عشان مرتكبش جناية ..
سيف : بيتاملوا في مخلوقات ربنا هنقولهم لا وبعدين دول اجانب لازم تشجعي السياحة .. ولا انتي عميلة ..
سمر وضربته في صدره : لا انا هعملك عمل انت وهم لو ملبستش التيشرت حالا ، يالا ..
سيف : خلاص براحة ماتزوقيش هلبسه .. ولبس سيف التيشرت .. ها هننزل ولا في تعليمات تانية يا فندم ..
سمر : لا خلاص يلا بينا ..
مشيوا الاثنين ناحية البحر وسيف بيبص وراه ناحية البنات ..
سمر بزعيق : سيييييييييييف ..
سيف بضحك : جاي يا قمري ...
.............................................
بليل في بيت ابراهيم ............
سارة في اوضتها بتجهز عشان تروح لدكتور يحيي ...
ابراهيم بيخبط علي اوضة سارة ....
سارة : ادخل .
ابراهيم : جهزتي يا حبيبتي عشان منتاخرش علي ميعادنا ..
سارة : دقيقة واحدة يا بابا ، هلف الطرحة بس ..
خلصت سارة وخرجت بره عند باب الشقة بتلبس جزمتها ..
اسلام : ايه ده انتوا رايحين فين ؟
ابراهيم : سارة عندها ميعاد مع دكتور يحيي ..
اسلام وقرب من سارة وحط ايده علي كتفها : ربنا يشفيكي ويرجعلك عقلك ..
بصت سارة لاسلام نظرة سخرية ..
سارة : رخم ..
خرج ابراهيم وسارة ووصلوا عند دكتور يحيي ..
السكرتيرة : ايوة اتفضلوا ..
ابراهيم : عندنا ميعاد باسم سارة احمد الساعة 8 .
السكرتيرة : ايوة فعلا ،، طيب اتفضلوا استريحوا هبلغ الدكتور ..
دخلت الممرضة دقيقة وخرجت ..
السكرتيرة : اتفضلوا الدكتور منتظركم ..
دخلت سارة وابراهيم شافت يحيي ومعاه بنت تانية لابسة فستان عند ركبتها وبكم طويل رافعة شعرها ديل حصان وشكلها امور وهادي اووي ..
يحيي : يا اهلا يا اهلا ، ازيك يا استاذ ابراهيم ، ازيك يا سارة .. اتفضلوا اقعدوا..
قعدوا سارة وابراهيم ..
يحيي : ها تشربوا ايه ؟
ابراهيم : ولا اي حاجة .. مش عايز اعطلكم ..
يحيي : لا ابدا لا عطلة ولا حاجة ، تشرب قهوة .
ابراهيم بابتسامة : لو مصر تبقي مظبوطة بعد اذنك ..
خرج يحيي للسكرتيرة دقيقة وخرج ..
يحيي : دلوقتي يا استاذ ابراهيم انا هاخد سارة وندى وهندخل الاوضة اللي جوة وحضرتك هتنتظر هنا ، خمس دقايق والقهوة تكون هنا ..
ابراهيم : براحتكم اتفضلوا ...
دخلت سارة ويحيي وندى الاوضة ، كان في 3 كراسي عاملين زي دائرة قعد يحيي وقعدوا قدامه سارة وندى ..
يحيي : مبدئيا كده سارة دي ندى ، ندى دي سارة .. من هنا ورايح يا سارة انتي وندى جلساتكم هتبقى سوا ، كل واحدة هتحكي مشكلتها وهتحاول التانية تديها رايها بل وتحاول تساعدها .. دلوقتي هنبدا بسارة ..
سارة : هو لازم نتكلم قصاد بعض ؟!
يحيي : اه ولو سمحتي اتفضلي ..
سارة بتردد : ابدا منين ؟
يحيي : من اي حتة انتي حابه تبداي منها ..
سارة وعينيها اتملت بالدموع : هبدأ بأهم حدث من وجهة نظري ، اللي حصل لي من حسام امبارح يا دكتور اظن حضرتك عرفت ..
يحيي : ايوة عرفت ، بس احب اسمعه منك ..
سارة بعياط وبدات تحكي اللي حصل وندى تأثرت جدا باللي حكته سارة ...
سارة بعياط شديد وبتحاول تطلع صوتها : عارف يا دكتور ، اكتر حاجة وجعتني نظرته ليا ، هو انا فعلا كل الناس بتبص لي كده شايفين اني متاحة ليهم ؟! شايفين اني بتاعتهم ، طيب بأي حق ؟ مين اللي سمح لهم بنظراتهم دي ؟ مين اللي سمحلهم يتحكموا في حياتي كده ، مين ؟ مين ؟ مين ؟؟
انهارت سارة من العياط وندى بتطبطب عليها وقامت جابت لها منديل وبتمد ايديها بيه .. اخدته سارة منها وشكرتها ..
يحيي : كملي يا سارة .
سارة وبتحاول توقف عياطها وبصوت مبحوح : عارف يا دكتور انا بقيت بتخيل ان كل الرجالة ده تفكيرهم وكلهم بيبصوا لي نفس النظرة ، طيب اقول لحضرتك حاجة النهاردة كنت خايفة من بابا ابراهيم ، خايفة من ابية كريم اللي انقذني من ايد حسام ، خايفة من اسلام اخويا ، بقيت فعلا اخاف من اني اشوف اي راجل ، كلام حسام شكله هيعلم فيا كتير ..
ندى : انا تجربتي مع الرجالة واللي هي مش افضل منك كتير ، بس هم مش زي بعض . اكيد فيهم اللي بتحسي معاه بالامان ، وبتعتبريه امانك وحمايتك بتستني تلمحيه او تشوفيه ..
سارة بضحكة كلها حزن : فيه ولو اقولك ان حواليا منهم كتير ، بس تجربتي مكانتش مع واحد دول 3 كل واحد طبيعة علاقتي بيه بشكل مختلف وكل واحد بيأذيني في جسمي بطريقة مختلفة ، وحسام بالذات قطم ظهري ..
ندى : بس اكيد طالما جيتي برجلك هنا فانتي اقوى من كل ده وعايزة تخلصي منه ..
سارة : عايزة بس مش عارفة ازاي ؟
يحيي : كونك انك عايزة ده لوحده اول خطوة .. سارة قادرة تكملي ولا كفاية ؟
سارة : لا مش قادرة حاسة اني محتاجة راحة ، مش قادرة يا دكتور اعذرني ..
يحيي : لا ابدا ولا يهمك ، المرة اللي جايه مشكلة ندى ..
سارة : ان شاء الله، مبسوطة اني شفتك يا ندى ..
ندى بابتسامة هادية : وانا كمان ، هستناكي المرة اللي جايه ..
سارة قامت : يلا عن اذنكم ، السلام عليكم ..
يحيي وندى : وعليكم السلام .. ومشيت سارة ..
ندى : عسولة اوي سارة دي يا ابية ..
يحيي : ومكسورة اوي يا ندى ، نفسي تبقي اقوى من كده ومش هسيبها غير لما تبقى قوية كفاية انها تواجه مشاكلها او علي الاقل تتحداها ..
............................
سارة خرجت مع ابراهيم وطلبت منه تتمشي شوية اخدها بالعربية ونزلها عند كورنيش النيل وبدا الجو يبرد اوي ، فقرروا يرجعوا البيت ..
رجعوا البيت وسارة وشها اصفر وعينيها حمراء من كتر العياط ، واستاذنتهم هتدخل تاخد دش تفوق شوية .. دخلت سارة اوضتها ووقفت قدام دولابها بتحضر هدومها وفجاة لقت باب اوضتها اتقفل بصت للباب بفزع ..
عاصم : ازيك يا سارة ...